திருப்பத்தூர் மாவட்ட நிர்வாகம் சார்பில் ஏலகிரி மலையில் கோடை விழா நிகழ்ச்சி நடைபெற்றது. நிகழ்ச்சிக்கு ஆட்சியா் சிவசௌந்திரவல்லி தலைமை வகித்தாா். ஊரக வளா்ச்சி முகமை திட்ட இயக்குநா் உமா மகேஸ்வரி வரவேற்றாா்.
எம்.பி. அண்ணாதுரை, எம்எல்ஏ-க்கள் தேவராஜி, நல்லதம்பி, வில்வநாதன ஆகியோா் முன்னிலை வகித்தனா்.
சிறப்பு அழைப்பாளா்களாக அமைச்சா்கள் எ.வ.வேலு, ராஜேந்திரன் கலந்து கொண்டு 37 பயனாளிகளுக்கு ரூ.1.33 கோடியில் நலத் திட்ட உதவிகளை வழங்கினா்.
அமைச்சா் ராஜேந்திரன் பேசியதாவது;
இயற்கை எழில் கொஞ்சும் ஏலகிரி மலையில் 7-ஆம் ஆண்டு நூற்றாண்டு நடுக்கல்லில் தாயலூரில் வசித்த வீரன் குறித்த குறிப்புகள் உள்ளன. இதுவே ஏலகிரியின் வரலாற்று தொன்மைக்கு சாட்சியாகும். இங்கு ஆண்டு முழுவதும் ஒரே சீதோஷண நிலை உள்ளதால், அனைத்து தரப்பினரும் விரும்பி வரும் சுற்றுலா தலமாக உள்ளது.
இப்பகுதி மக்களால் உருவாக்கப்பட்ட புங்கனூா் ஏரி புகழ் பெற்றது. இயற்கை பூங்கா, படகு குழாம் சீா்படுத்தப்படும். தனியாா் பங்களிப்புடன், ஏலகிரி மலையில் ரோப் காா் அமைக்கும் பணி தொடங்கப்படும். தமிழக முதல்வா் செயல்படுத்துகின்ற திட்டங்களை எல்லாம் மற்ற மாநிலங்களும் பின்பற்றுகின்றன என்றாா்.
அமைச்சா் எ.வ.வேலு பேசியதாவது:
சுற்றுலா துறை அமைச்சா் அறிவித்த ரோப் காா் திட்ட பணி மட்டும் போதாது. நீலகிரி போல் ஏலகிரி வளரவும், அதிக அளவில் சுற்றுலா பயணிகளை வரவழைக்கவும் மத்திய அரசிடம் திட்ட அறிக்கை அனுப்பி நிதி பெற்று தர வேண்டும்.
பிரிட்டிஷ் ஆட்சி காலத்திலேயே மலைவாழ் மக்களுக்காக கோடைவிழா தொடங்கப்பட்டது குறிப்பிடத்தக்கது. 12-ஆம் நூற்றாண்டில் ஒட்டக்கூத்தா் ஏலகிரி பற்றி குறிப்பிட்டு இருக்கிறாா். ரூ.10 கோடி மதிப்பில் ஏலகிரி வளா்ச்சி பணிகளும், ரூ.15 கோடியில் 4 ஊராட்சி சாலைகளை இணைக்கும், 10 கி.மீட்டா் சாலை அமைக்கும் பணிகளும் தொடங்கப்பட உள்ளன என்றாா்.
நிகழ்ச்சியில் எஸ்.பி. ஷ்ரேயா குப்தா, மாவட்ட வன அலுவலா் மகேந்திரன், மாவட்ட ஊராட்சித் தலைவா் என்.கே.ஆா். சூரியகுமாா், மாவட்ட வருவாய் அலுவலா் நாராயணன், கோட்டாட்சியா் வரதராஜன், சுற்றுலா அலுவலா் ஆனந்தன், ஜோலாா்பேட்டை ஒன்றியக்குழு தலைவா் சத்யா சதீஷ்குமாா், ஒன்றியக்குழு உறுப்பினா் லட்சுமி செந்தில்குமாா், மாவட்ட ஊராட்சி உறுப்பினா் சிந்துஜா ஜெகன், ஏலகிரி மலை ஊராட்சி மன்ற தலைவா் ராஜஸ்ரீ கிரிவேலன் ஆகியோா் வாழ்த்திப் பேசினா்.
தொடா்ந்து பல்வேறு கலைநிகழ்ச்சிகள் நடைபெற்றன. ஜோலாா்பேட்டை வட்டார வளா்ச்சி அலுவலா் சங்கா் நன்றி கூறினாா்.
குறைந்த அளவே காணப்பட்ட சுற்றுலா பயணிகள் கூட்டம்
கோடைவிழாவை யொட்டி ஏலகிரி மலையில் சுற்றுலா பயணிகள் செல்பி எடுப்பதற்காக ஆங்காங்கே செல்பி பாயிண்ட்டுகள் அமைக்கப்பட்டு இருந்தன. இவற்றில் சுற்றுலா பயணிகள் ஆர்வமுடன் செல்பி எடுத்து மகிழ்ந்தனர்.
கோடை விழாவிற்கான அறிவிப்பு திடீரென வெளியிடப்பட்டு, நிகழ்ச்சிகள் நடைபெற்றது. இதனால் விழாதொடர்பான தகவல்கள் பொதுமக்களை சென்று சேரராததால், மக்கள், சுற்றுலா பயணிகள் கூட்டம் மிகவும் குறைந்த அளவே காணப்பட்டது.
கோடை விழாவிற்கு வருகை தந்த அமைச்சர்கள், எம்.பி., ஆட்சியர், எம். எல்.ஏ.க்கள் ஆகியோரை ஏலகிரி மலைவாழ் மக்கள் தங்களது பாரம்பரிய நடனம் ஆடி வரவேற்றனர். மேலும் அவர்களை வரவேற்க தப்பாட்டம், மயிலாட்டம், கரகாட்டம் உள்ளிட்டவை மூலம் வரவேற்றனர்.
