விநாயகர் சதுர்த்தியை முன்னிட்டு அரசு விதித்துள்ள கட்டுப்பாடுகளை முறையாக பின்பற்ற வேண்டும் என ஆய்வுக் கூட்டத்தில் மாவட்ட ஆட்சியர் தெரிவித்தார்.
விநாயகர் சதுர்த்தி விழாவிற்கு மேற்கொள்ள வேண்டிய முன்னேற்பாடுகள் பணிகள் குறித்து திருவண்ணாமலை மாவட்ட ஆட்சியர் தர்ப்பகராஜ், தலைமையில் மாவட்ட ஆட்சியர் கூட்டரங்கில் ஆலோசனைக் கூட்டம் நடைபெற்றது.
இக்கூட்டத்தில் மாவட்ட ஆட்சியர் தெரிவித்ததாவது: வருகின்ற ஆக 27ம் தேதி அன்று விநாயகர் சதுர்த்தி விழா நடைபெறுவதை முன்னிட்டு காவல்துறை சார்பாக சட்டம் ஒழுங்கு தொடர்பாக மேற்கொள்ள வேண்டிய முன்னேற்பாடுகள் குறித்தும், விநாயகர் சிலைகள் நிறுவுதல், வழிபடுதல் மற்றும் நீர்நிலைகளில் கரைப்பதற்கான வழிமுறைகள் குறிக்கும், அரசாணை மற்றும் சென்னை உயர் நீதிமன்றத்தின் வழிகாட்டுதல் நெறிமுறைகளை கண்டிப்பாக அனைவரும் கடைப்பிடிக்க வேண்டும் என கூறினார்
மாநகராட்சி, நகராட்சி மற்றும் ஊரக பகுதிகளில் உள்ள நீர் நிலைகளில் தேவையான பாதுகாப்பு கட்டமைப்புகளை தொடர்புடைய துறை அலுவலர்கள் ஏற்படுத்த வேண்டும் எனவும் துறை சார்ந்த அலுவலர்களுக்கு அறிவுறுத்தினார்.
அதேபோல், இயற்கை வண்ணங்களை மட்டுமே பயன்படுத்த வேண்டும். ரசாயன வண்ணங்களை பயன்படுத்த கூடாது. நீர்நிலைகளில் மாசு ஏற்படுத்தும் வகையில் சிலைகளை வடிவமைக்க கூடாது என அறிவுறுத்தினார்
திருவண்ணாமலை மாவட்டத்தில், விநாயகர் சிலைகளை கரைக்க மாவட்ட நிர்வாகத்தால் அனுமதிக்கப்பட்ட நீர்நிலைகளில் மட்டுமே சிலைகளை கரைக்க வேண்டும். விநாயகர் சிலையை அமைக்க விரும்புவோர், அரசின் நிலையான வழிகாட்டுதல்களை பின்பற்ற வேண்டும். காவல்துறையில் சட்டம் ஒழுங்கு பாதுகாப்பு நடவடிக்கைகளுக்கு ஒத்துழைப்பு தர வேண்டும்.
மேலும், சிலையின் உயரம் அடித்தளம் மற்றும் மேடை உட்பட 10 அடிக்குள் இருக்க வேண்டும். பிற மத வழிபாட்டு தலங்கள், கல்வி நிறுவனங்களுக்கு அருகில் சிலை அமைக்க கூடாது என்றும் தெரிவித்தார்.
இக்கூட்டத்தில் மாவட்ட காவல் கண்காணிப்பாளர் சுதாகர், மாவட்ட வருவாய் அலுவலர் இராம்பிரதீபன், மாவட்ட ஊரக வளர்ச்சி முகமை திட்ட இயக்குநர் மரு. மணி, செய்யாறு சார் ஆட்சியர் செல்வி அம்பிகா ஜெயின், உதவி ஆட்சியர் (பயிற்சி) செல்வி அம்ருதா எஸ்.குமார், திருவண்ணாமலை நகராட்சி ஆணையர் செல்வபாலாஜி மற்றும் துறை சார்ந்த அலுவலர்கள் கலந்து கொண்டனர்.
