ஆர். புதுப்பட்டினத்தில் எம். எஸ். சுவாமிநாதன் ஆராய்ச்சி நிறுவனம் நடத்திய கடற்கரை தூய்மைப்படுத்தும் பணி

எம். எஸ். சுவாமிநாதன் ஆராய்ச்சி நிறுவனம் ஏற்பாடு செய்த கடற்கரை தூய்மைப்படுத்தும் பணி மீமிசல் அருகே உள்ள ஆர்.புதுப்பட்டினத்தில் நடைபெற்றது.

நிகழ்விற்கு எம். எஸ். சுவாமிநாதன் ஆராய்ச்சி நிறுவன முதன்மை விஞ்ஞானி ஆர்.ராஜ்குமார் தலைமை வகித்தார். அவர் பேசுகையில்,

பாரத ரத்னா எம். எஸ். சுவாமிநாதன் நூற்றாண்டு விழாவை முன்னிட்டு சர்வதேச அளவில் பல்வேறு நிகழ்வுகள் நடைபெற்று வருகின்றன. அதன் ஒரு பகுதியாக சர்வதேச அளவில் 100 கடற்கரைகளை தூய்மைப்படுத்துதல் மற்றும் விழிப்புணர்வு ஏற்படுத்துதல் நிகழ்வு செப்டம்பர் 17 முதல் 23 வரை நடைபெற்று வருகின்றது.

இதன் ஒரு பகுதியாக புதுக்கோட்டை மாவட்டத்தில் தூய்மைப்படுத்துதல் பணி பல்வேறு அமைப்புகளுடன் ஒருங்கிணைந்து ஆர்.புதுப்பட்டினத்தில் நடைபெறுகின்றது. இந்த நிகழ்வில் பல்வேறு அமைப்புகள் பங்கேற்றுள்ளது மகிழ்ச்சியளிக்கின்றது.

கடல் மாசுபாட்டை தடுப்பது மற்றும் கடற்கரைகளை மாசுபடுத்தாமல் ஆரோக்கியமாகவும், அழகாகவும் பாதுகாப்பதற்கான விழிப்புணர்வு ஏற்படுத்துவது தான் இந்த நிகழ்வின் முக்கிய நோக்கமாகும்.

கடல் வாழ் உயிரினங்களை பாதுகாக்கவும், கடற்கரைகளின் அழகையும் ஆரோக்கியத்தையும் பேணவும், பாதுகாக்கவும் நம்மால் இயன்றதை செய்ய உறுதியேற்போம் என்றார்.

தமிழ்நாடு மாசு கட்டுப்பாட்டு வாரிய உதவிப் பொறியாளர் அருண்குமார் தூய்மைப்படுத்தும் பணியை துவக்கி வைத்து உரையாற்றினார். நிகழ்வில் மாவட்ட குழந்தைகள் நல அலுவலர் கே.சதாசிவம், உறுப்பினர் சாமிநாதன், ரோட்டரி சங்கத்தின் தலைவர் ஜி.ரஜினிகாந், இளையோர் செஞ்சிலுவை சங்க ஒருங்கிணைப்பாளர் பி.தமிழ்செல்வன், கடலோர காவல் படை அலுவலர் ஜே.ராஜா, மீன்வளத்துறை அலுவலர் வி.நேத்தாஜி, ஊர் தலைவர் எம். சரவணன் தேசிய இணைய கல்விக்கழக பிரதிநிதி ஆறுமுகம் ஆகியோர் உரையாற்றினர்.

அனைவரும் உறுதிமொழி எடுத்த பின் தூய்மை படுத்தும் பணி துவங்கியது. நிகழ்வில் பல்வேறு அமைப்புகளைச் சேர்ந்த 95 நபர்கள் பங்கேற்றார்கள். 236 கிலோ கழிவுகள் சேகரிக்கப்பட்டது.

எம். எஸ். சுவாமிநாதன் ஆராய்ச்சி நிறுவன கள ஒருங்கிணைப்பாளர் ஜி.முருகன் அனைவரையும் வரவேற்றார். எஸ்.சிலம்பரசன் நன்றி கூறினார்.