தைப் பொங்கலை முன்னிட்டு மண்ணால் செய்யப்பட்ட அடுப்பு, பானையை கொள்முதல் செய்து பொதுமக்களுக்கு வழங்க வேண்டும் என மாவட்ட ஆட்சியரிடம் குலாலர் சங்கத்தினர் மனு அளித்தனர்.
நாமக்கல் மாவட்ட ஆட்சியர் அலுவலகஹில் மக்கள் குறைதீர் நாள் கூட்டம் நடைபெற்றது. மாவட்ட ஆட்சியர் துர்கா மூர்த்தி தலைமை வகித்து பொதுமக்களிடம் இருந்து கோரிக்கை மனுக்களைப் பெற்றார்.
கூட்டத்தில் குடிநீர், சாலை வசதி, முதியோர் உதவித்தாகை உள்ளிட்ட அடிப்படை வசதிகள் கேட்டு 557 மனுக்கள் அளிக்கப்பட்டன. மனுக்கள் மீது விசாரணை நடத்தி விரைவாக நடவடிக்கை மேற்கொள்ளும்படி அதிகாரிகளுக்கு உத்தரவிட்டார்.
தொடர்ந்து 10 தூய்மைப் பணியாளர்களுக்கு நலவாரிய அட்டை மற்றும் 12 மாற்றுத்திறனாளிகளுக்கு ரூ.95,909 மதிப்பிலான மின்மோட்டார் பொருந்திய தையல் மெசின்கள் உள்ளிட்ட நலத்திட்ட உதவிகள் வழங்கப்பட்டன. டிஆர்ஓ சரவணன், கூட்டுறவு சங்கங்களின் இணைப்பதிவாளர் அருளரசு உள்பட பலர் கூட்டத்தில் கலந்து கொண்டனர்.
இதனிடையே பல்வேறு கோரிக்கைகள் தொடர்பாக நாமக்கல் மாவட்ட குலாலர் சங்கத்தினர் மாவட்ட ஆட்சியரிடம் மனு அளித்தனர். அந்த மனுவில் குறிப்பிடப்பட்டுள்ள விவரம்:
நாமக்கல் மாவட்ட மண்பாண்ட தொழிலாளர்களுக்கு மழைக்கால நிவாரணத் தொகை கேட்டு 938 மனுக்கள் அரசுக்கு வழங்கினோம். அதில் 226 மனுக்களுக்கு மட்டுமே மழைக்கால நிவாரணத் தொகை வழங்கப்பட்டது. நிலுவையில் உள்ள மனுக்களுக்கும் நிவாரணத் தொகை வழங்க நடவடிக்கை எடுக்க வேண்டும்.
தை பொங்கலை முன்னிட்டு வேட்டி, சேலை வழங்குவது போல் மண்ணால் செய்யப்பட்ட அடுப்பு, பானை ஆகியவற்றை மண்பாண்ட தொழிலாளர்களிடம் கொள்முதல் செய்து மக்களுக்கு வழங்க வேண்டும்.
மண்பாண்ட தொழிலாளர்கள் நலவாரிய உறுப்பினர்களுக்கு கிடைக்க வேண்டிய கல்வி உதவித்தொகை, திருமண உதவித்தொகை உள்ளிட்ட நலத்திட்டங்கள் கிடைக்க நடவடிக்கை எடுக்க வேண்டும். மழைக்கால நிவாரணத் தொகையை ரூ.8 ஆயிரமாக உயர்த்தி வழங்க வேண்டும் என தெரிவிக்கப்பட்டுள்ளது.
