நாமக்கல் மண்டலத்தில், உச்சபட்சமாக ரூ. 6.40க்கு விற்பனையாகி வந்த முட்டை விலை, 2 வாரங்களில் ஒரு முட்டைக்கு ரூ. 1.40 சரிவடைந்து நேற்று ஒரு முட்டையின் விலை ரூ. 5 ஆக நிர்ணயிக்கப்பட்டது. கோழிப்பண்ணைத் தொழிலில் நாள் ஒன்றுக்கு ரூ. 8 கோடி இழப்பு ஏற்பட்டு வருவதால் பண்ணையாளர்கள் பாதிக்கப்பட்டுள்ளனர்.
நாமக்கல், சேலம், ஈரோடு, பெருந்துறை, கோவை உள்ளிட்ட நாமக்கல் மண்டலத்தில், 1,000க்கும் மேற்பட்ட கோழிப்பண்ணைகள் உள்ளன. இங்கு, 7 கோடி முட்டைக் கோழிகள் வளர்க்கப்படுகின்றன. அவற்றின் மூலம், தினசரி சுமார் 6 கோடி முட்டைகள் உற்பத்தி செய்யப்படுகிறது.
உற்பத்தியாகும் முட்டைகள், தமிழக அரசின் சத்துணவு திட்டத்திற்கும், வெளிநாட்டிற்கும் ஏற்றுமதி செய்யப்படுகிறது. மேலும், கேரளா உள்ளிட்ட வெளி மாநிலங்களுக்கும், தமிழகத்தின் பல்வேறு மாவட்டங்களுக்கும், விற்பனைக்காக தினமும் லாரிகள் மூலம் அனுப்பி வைக்கப்படுகிறது.
தினசரி பண்ணைகளில், முட்டை கொள்முதல் விலையை என்இசிசி அறிவித்து வருகிறது. அதை பண்ணையாளர்கள் கடைபிடித்து வருகின்றனர். கோழிப்பண்ணை வரலாற்றில் முட்டை விலை அதிகபட்சமாக கடந்த டிசம்பர் மாதம் ஒரு முட்டையின் விலை ரூ. 6.40 ஆக நிர்ணயிக்கப்பட்டு தொடர்ந்து வந்தது.
பின்னர் கடந்த ஜன. 5ம் தேதி ஒரு முட்டைவிலை 20 பைசா குறைந்து ரூ. 6.20 ஆனது. பின்னர் படிப்படியாக குறைந்து கடந்த வாரம் ரூ. 5.60க்கு விற்பனையானது. 17ம் தேதி முட்டை விலை 30 பைசா குறைக்கப்பட்டு ரூ. 5.30 ஆக நிர்ணயிக்கப்பட்டது.
இந்த நிலையில் இன்று மாலை என்இசிசி நாமக்கல் மண்டல தலைவர் சிங்கராஜ் தலைமையில் நடைபெற்ற கூட்டத்தில், முட்டை விலை மேலும் 30 பைசா குறைக்கப்பட்டு, ஒரு முட்டையின் பண்ணைக் கொள்முதல் விலை ரூ. 5 ஆக நிர்ணயிக்கப்பட்டது.
முட்டை விலை தொடர் திடீர் வீழ்ச்சியால் பண்ணையாளர்கள் அதிர்ச்சி அடைந்துள்ளனர். கடந்த 5ம் தேதி ரூ. ;6.40க்கு விற்பனை செய்யப்பட்ட முட்டை விலை 2 வாரங்களில் ரூ. 1.40 சரிவடைந்து ரூ. 5 ஆனதால், ஒரு முட்டைக்கு ரூ. 1.40 இழப்பு ஏற்பட்டுள்ளது.
இதனால் நாமக்கல் மண்டலத்தில் நாள்தோறும் 6 கோடி முட்டை உற்பத்தியாகும், கோழிப்பண்ணை தொழிலில் நாள் ஒன்றுக்கு ரூ. 8 கோடி அளவில் இழப்பு ஏற்பட்டு பண்ணையாளர்கள் பாதிக்கப்பட்டுள்ளனர்.
முக்கிய நகரங்களில் ஒரு முட்டையின் விலை (பைசாக்களில்) : சென்னை 590, பர்வாலா 517, பெங்களூர் 575, டெல்லி 560, ஹொஸ்பேட் 515, ஹைதராபாத் 510, கொல்கத்தா 580, மும்பை 590, மைசூர் 575, விஜயவாடா 525.
கோழி விலை: பிராய்லர் கோழி உயிருடன் ஒரு கிலோ ரூ. 152 ஆக அறிவிக்கப்பட்டுள்ளது. முட்டைக்கோழி உயிருடன் ஒரு கிலோ ரூ. 82 ஆக சிகா நிர்ணயித்துள்ளது.
