ஹாலிவுட்டின் உயரிய விருதாகக் கருதப்படும் 98-வது அகாடமி விருதுகள் வழங்கும் விழா லாஸ் ஏஞ்சல்ஸில் உள்ள டால்பி தியேட்டரில் கோலாகலமாக நடைபெற்றது. இதில் லியோனார்டோ டிகாப்ரியோ நடித்த ‘ஒன் பேட்டில் ஆஃப்டர் அனதர்’ திரைப்படம் சிறந்த படம் மற்றும் சிறந்த இயக்குனர் உட்பட 6 விருதுகளை வென்றது.
‘சின்னர்ஸ்’ படத்திற்காக மைக்கேல் பி ஜோர்டான் சிறந்த நடிகருக்கான விருதை வென்று வரலாறு படைத்தார். விருதைப் பெற்ற பின் உணர்ச்சிவசப்பட்ட அவர், “கடவுள் நல்லவர். எனக்கு இந்த வாய்ப்பையும் அடையாளத்தையும் வழங்கிய இயக்குனர் ரையான் கூக்லருக்கு நன்றி” எனத் தெரிவித்தார். இதே படத்திற்காக ரையான் கூக்லர் சிறந்த அசல் திரைக்கதை விருதை வென்றார்.
‘ஹேம்நெட்’ படத்தில் மகனை இழந்த தாயின் வலியைத் தத்ரூபமாகப் பிரதிபலித்த ஜெஸ்ஸி பக்லி சிறந்த நடிகையாகத் தேர்ந்தெடுக்கப்பட்டார்.
சிறந்த துணை நடிகர் விருதை ‘ஒன் பேட்டில் ஆஃப்டர் அனதர்’ படத்தில் நடித்த ஷான் பென் தனது மூன்றாவது ஆஸ்கர் விருதை வென்றார். இதன் மூலம் மூன்று ஆஸ்கர் வென்ற நான்காவது ஆண் நடிகர் என்ற சாதனையை படைத்தார்.
சிறந்த துணை நடிகைக்கான விருதை ‘வெப்பன்ஸ்’ படத்திற்காக ஆமி மேடிகன் பெற்றார். உக்ரைன் மீதான ரஷ்யப் படையெடுப்பின் போது பேச்சுரிமை நசுக்கப்பட்டதை மையமாகக் கொண்ட ‘மிஸ்டர் நோபடி அகைன்ஸ்ட் புதின்’ சிறந்த ஆவணப்பட விருதைப் பெற்றது. நெட்ஃபிக்ஸ் நிறுவனத்தின் மிகவும் பிரபலமான ‘கே-பாப் டெமன் ஹண்டர்ஸ்’ சிறந்த அனிமேஷன் படம் மற்றும் சிறந்த அசல் பாடல் என இரண்டு விருதுகளை வென்றது.
‘சின்னர்ஸ்’ படத்திற்காக சிறந்த ஒளிப்பதிவாளர் விருதை வென்றதன் மூலம், ஆட்டம் துரால்ட் அர்காபா இவ்விருதைப் பெறும் முதல் பெண் என்ற சரித்திர சாதனையைப் படைத்தார்.
ஆஸ்கர் வரலாற்றில் முதல்முறையாக அறிமுகப்படுத்தப்பட்ட ‘சிறந்த கேஸ்டிங்’ விருதை கசாண்ட்ரா குலுகுண்டிஸ் (ஒன் பேட்டில் ஆஃப்டர் அனதர்) வென்றார்.
விருது வழங்கும் மேடையில் போர் எதிர்ப்பு மற்றும் அரசியல் கருத்துகளும் எதிரொலித்தன. சிறந்த சர்வதேசத் திரைப்பட விருதை வழங்கிய ஜேவியர் பார்டெம், “போருக்கு வேண்டாம், பாலஸ்தீனத்திற்கு விடுதலை” என முழக்கமிட்டார். மேலும், அமெரிக்காவின் தற்போதைய அரசியல் சூழல் மற்றும் டொனால்ட் ட்ரம்ப் குறித்தும் தொகுப்பாளர்கள் நகைச்சுவையாக விமர்சித்தனர்.
வெற்றியாளர்களின் முழுப் பட்டியல்:
- சிறந்த திரைப்படம்: ஒன் பேட்டில் ஆஃப்டர் அனதர்
- சிறந்த இயக்குனர்: பால் தாமஸ் ஆண்டர்சன் — படம்: ஒன் பேட்டில் ஆஃப்டர் அனதர்
- சிறந்த நடிகர்: மைக்கேல் பி. ஜோர்டான் — படம்: சின்னர்ஸ்
- சிறந்த நடிகை: ஜெஸ்ஸி பக்லி — படம்: ஹேம்நெட்
- சிறந்த துணை நடிகர்: ஷான் பென் — படம்: ஒன் பேட்டில் ஆஃப்டர் அனதர்
- சிறந்த துணை நடிகை: ஆமி மேடிகன் — படம்: வெப்பன்ஸ்
- சிறந்த அசல் திரைக்கதை: ரையான் கூக்லர் — படம்: சின்னர்ஸ்
- சிறந்த தழுவல் திரைக்கதை: பால் தாமஸ் ஆண்டர்சன் — படம்: ஒன் பேட்டில் ஆஃப்டர் அனதர்
- சிறந்த சர்வதேசத் திரைப்படம்: சென்டிமென்டல் வேல்யூ
- சிறந்த ஆவணப்படம்: மிஸ்டர் நோபடி அகைன்ஸ்ட் புதின்
- சிறந்த அனிமேஷன் திரைப்படம்: கே-பாப் டெமன் ஹண்டர்ஸ்
- சிறந்த அசல் பாடல் — படம்: கே-பாப் டெமன் ஹண்டர்ஸ்
- சிறந்த பின்னணி இசை: லுட்விக் கோரன்சன் — (படம்: சின்னர்ஸ்)
- சிறந்த ஒளிப்பதிவு: ஆட்டம் துரால்ட் அர்காபா — படம்: சின்னர்ஸ்
- சிறந்த படத்தொகுப்பு: ஒன் பேட்டில் ஆஃப்டர் அனதர்
- சிறந்த தயாரிப்பு வடிவமைப்பு: பிராங்கண்ஸ்டைன்
- சிறந்த ஆடை வடிவமைப்பு: கேட் ஹாவ்லி — படம்: பிராங்கண்ஸ்டைன்
- சிறந்த ஒப்பனை மற்றும் சிகையலங்காரம்: பிராங்கண்ஸ்டைன்
- சிறந்த ஒலிப்பதிவு: எஃப்1 (
- சிறந்த விஷுவல் எஃபெக்ட்ஸ்: அவதார்: ஃபயர் அண்ட் ஆஷ்
