பிரபல தனியார் தொலைக்காட்சியில் வெளியாகும் சீரியலில் நடிக்கும் வில்லன் நடிகர் காமராஜ் வீட்டில் புகுந்த நல்ல பாம்பை தீயணைப்பு வீரர்கள் சாதுர்யமாக பிடித்தனர்.
சென்னை மதுரவாயல் கிருஷ்ணா நகர் 1வது தெருவில் வசிப்பவர் காமராஜ். இவர் பிரபல தனியார் தொலைக்காட்சியில் வெளியாகும் பிரபல சீரியல் ஒன்றில் வில்லன் கதாபாத்திரத்தில் நடித்து வருகிறார்.
இன்று இவரது வீட்டில் நல்ல பாம்பு ஒன்று புகுந்தது. இதனால் அதிர்ச்சியடைந்த காமராஜ் குடும்பத்தினர் கோயம்பேடு தீயணைப்பு துறையினருக்கு தகவல் தெரிவித்தனர்.
சம்பவ இடத்திற்கு விரைந்த தீயணைப்பு வீரர்கள் உரிய உபகரணங்களை பயன்படுத்தி, பத்திரமாக பாம்பை பிடித்தனர்.
தண்ணீர் பைப்பின் பின்புறத்தில் பிடிக்கப்பட்ட அந்த பாம்பு, நல்ல பாம்பு குட்டி என்பது தெரியவந்தது. இதையடுத்து அதனை பாட்டில் ஒன்றில் அடைத்து எடுத்துச்சென்ற தீயணைப்பு துறையினர், வண்டலூர் பூங்காவில் உள்ள பாம்புப் பண்ணையில் ஒப்படைத்தனர்.
சீரியல் நடிகர் ஒருவரின் வீட்டில் பாம்பு புகுந்த சம்பவம் அப்பகுதியில் பரபரப்பை ஏற்படுத்தியது.
