நெல்லையில் விற்பனைக்காக வீடுகளில் பதுக்கிய 1200க்கும் மேற்பட்ட வெளி மாநில மது பாட்டில்கள் பறிமுதல் செய்யப்பட்டுள்ளது. திமுக மாவட்ட கவுன்சிலர் மகேஷ் குமார் உள்ளிட்ட 5 பேர் கைது செய்யப்பட்டனர்.
நெல்லையை பேட்டையை அடுத்த கண்டியப்பேரி பகுதியில் ஒரு வீட்டில் மது பாட்டில்கள் பதுக்கி வைத்து விற்பனை செய்யப்படுவதாக மது விலக்கு தனிப்பிரிவு போலீசாருக்கு ரகசிய தகவல் கிடைத்தததையடுத்து கண்டியப் பேரி பகுதியில் சோதனை நடத்தினர்.
அப்போது அங்கு ஒரு வீட்டில் வெளி மாநில மது பாட்டில்கள் சுமார் 1108 பாட்டில்கள் பதுக்கி வைக்கப்பட்டிருந்தது. இதையடுத்து அந்த மது பாட்டில்களை போலீசார் பறிமுதல் செய்தனர். விசாரணையில் டவுன் செண்பகம் பிள்ளை தெருவை சேர்ந்த சாலமோன் தங்கராஜ் (வயது 32) என்பவரும், அவரது கூட்டாளிகள் 3 பேரும் சேர்ந்து மது பாட்டில்களை விற்பனைக்காக பதுக்கி வைத்திருப்பது தெரிய வந்தது.
செண்பகம் பிள்ளை தெருவில் உள்ள வீட்டில் போலீசார் சோதனை நடத்திய போது அங்கும் நூற்றுக்கும் மேற்பட்ட பாட்டில்கள் இருந்தது தெரிய வந்து அதனையும் போலீசார் பறிமுதல் செய்தனர்.
இதையடுத்து சாலமோன் தங்கராஜை போலீசார் கைது செய்தனர். அவரிடம் நடத்திய விசாரணையின் அடிப்படையில் களக்காட்டைச் சேர்ந்த ஜான்சன் தங்கராஜ் (31), கங்கைகொண்டான் அருகே உள்ள துறையூரைச் சேர்ந்த திமுக மாவட்ட கவுன்சிலரும், திட்டக்குழு உறுப்பினருமான மகேஷ் குமார் ( 31), மற்றும் சந்துரு, மணிகண்டன் ஆகியோரையும் போலீசார் கைது செய்தனர்.
அவர்களிடம் நடத்திய விசாரணையில் கோவாவில் இருந்து குறைந்த விலைக்கு 1200 க்கும் மேற்பட்ட மது பாட்டில்களை வாங்கி அங்கிருந்து கடத்தி வந்து நெல்லையில் உள்ள வீடுகளில் பதுக்கி வைத்து விற்பனை செய்ய வைத்திருந்தது தெரிய வந்தது.
தொடர்ந்து அவர்களிடம் விசாரணை நடத்தப்பட்டு வருகிறது. எவ்வளவு நாட்களாக இதுபோன்று வெளிமாநில மது பாட்டில்களை வாங்கி வந்து விற்பனை செய்து வந்தனர் என்பது குறித்து விசாரணை நடத்தப்பட்டு வருகிறது.
இச்சம்பவம் தொடர்பாக மேலும் 3 பேரை தேடி வருவதாகவும் கூறப்படுகிறது. திமுக மாவட்ட கவுன்சிலரே மதுக்கடத்தல் மற்றும் விற்பனையில் ஈடுபட்ட சம்பவம் திருநெல்வேலியில் பரபரப்பை ஏற்படுத்தியுள்ளது.
