நாமக்கல் :
முழங்கால் சுழற்சி முறையில், ஒரு நிமிடத்தில் 132 முறை சிலம்பம் சுற்றி, நாமக்கல் சிறுவன் கின்னஸ் சாதனை படைத்துள்ளார்.
நாமக்கல்லை சேர்ந்த ராஜ்குமார் என்பவர் மகன் தேவ சிவபாலன் (9). இவர், நாமக்கல் ஏகலைவா கலைக்கூடத்தில் சிலம்பம் பயிற்சி பெற்று வருகிறார். 5ம் வகுப்பு படிக்கும் தேவ சிவபாலன், சிலம்பம் சுழற்சியில் கின்னஸ் சாதனை புரிய வேண்டும் என ஆர்வம் கொண்டார். அதற்கான நிகழ்ச்சி, நாமக்கல், துறையூர் ரோட்டில் உள்ள, வீரராகவ பெருமாள் கோவில் திடலில் நடைபெற்றது. ஓய்வு பெற்ற டிஇஓ உதயகுமார் நிகழ்ச்சிக்கு தலைமை வகித்து துவக்கி வைத்தார்.
உழவர் பெருந்தலைவர் நாராயணசாமி நாயுடுவின், தமிழக விவசாயிகள் சங்க மாநில தலைவர் வேலுசாமி, வேளாண் உதவி இயக்குனர் வாசு, பழையபாளையம் அரசு மேல்நிலைப்பள்ளி தலைமையாசிரியர் மாரியப்ப பிள்ளை ஆகியோர் முன்னிலை வகித்தனர்.
தொடர்ந்து, ஒரு நிமிடத்தில் 132 முறை முழங்கால் சுழற்சி முறையில், சிலம்பம் சுழற்றி தேவசிபாலன் கின்னஸ் சாதனை படைத்தார். அவருக்கு அனைவரும் பாராட்டு தெரிவித்தனர். இந்த சாதனை நிகழ்ச்சியை, கின்னஸ் புத்தகத்தில் பதிவு செய்யும் அத்தாட்சி அலுவலர் ஜெட்லி நடுவராக இருந்து பதிவு செய்தார். இதற்கான ஏற்பாடுகளை, ஏகலைவா கலைக்கூட நிர்வாகிகள் செய்திருந்தனர்.
