நாமக்கல்:
இந்திய அரசியல் நிர்ணய சபையின் உறுப்பினராக இருந்தவரும்,சுதந்திரப் போராட்ட தியாகியுமான டி.எம்.காளியண்ணன் பெயரை நாமக்கல் அரசு மருத்துவக்கல்லூரிக்கு சூட்டாவிட்டால், கொங்கு அமைப்புகளை ஒன்றுதிரட்டி, உண்ணாவிரதம் உள்ளிட்ட தொடர் போராட்டங்கம் நடத்தப்படும் என கொங்குநாட்டு வேளாளர் சங்கத்தினர் தெரிவித்துள்ளனர்.
இது குறித்து, நாமக்கல் கொங்கு நாட்டு வேளாளர் சங்கம் சங்கத்தின் தலைவர் பி.கே.வெங்கடாஜலம், செய்தியாளர்களிடம் கூறியதாவது:
இந்திய அரசியல் நிர்ணய சபை, சுதந்திர இந்தியாவின் முதல் பார்லிமெண்டில் எம்.பி., தமிழகத்தின் முதல் சட்டசபையில் எம்எல்ஏவாக இருந்தவரும், மகாத்மா காந்தி, நேரு, அம்பேத்கர், காமராஜர் போன்ற மூத்த அரசியல் தலைவர்களுடன் இணைந்து, தேசிய அரசியலில் பல்வேறு நற்பணிகளை ஆற்றியவரும், சுதந்திரப் போராட்ட தியாகியுமானவர் டி.எம்.காளியண்ணன். அவர் தனது சொந்த நிலம் 2 ஆயிரம் ஏக்கரை ஏழைகளுக்கு தானமாக வழங்கியுள்ளார். தமிழகம் முழுவதும் பல பள்ளி, கல்லூரிகள் உருவாவதற்கும், கொல்லிமலைக்கு ரோடு வசதி செய்து தரவும் காரணமாக இருந்துள்ளார்.
பெருமைக்குரிய தியாகி காளியண்ணன் பெயரை, நாமக்கல் மாவட்ட அரசு மருத்துவக் கல்லூரிக்கு சூட்ட வேண்டும் என்று, அதிமுக ஆட்சியில் இருந்தபோதும், கடந்த 4 ஆண்டுகளாக திமுக ஆட்சியிலும், கொங்கு அமைப்புகள் சார்பாகவும், பல்வேறு அரசியல் கட்சிகள் சார்பாகவும் கோரிக்கை விடுத்து வருகிறோம். இதுவரை அந்த கோரிக்கை நிறைவேற்றப்படவில்லை. இந்த நிலையில் நாமக்கல் அரசு மருத்துவக்கல்லூரிக்கு காளியண்ணன் பெயரை சூட்டுவதில் தமிழக அரசு காலம் தாழ்த்தி வருவதற்கான உண்மையான காரணம் தெரியவில்லை.
எனவே தமிழக முதல்வர் நேரடியாக இந்த விசயத்தில் தலையிட்டு, உடனடியாக நாமக்கல் அரசு மருத்துவக்கல்லூரிக்கு தியாகி காளியண்ணன் பெயர் சூட்ட நடவடிக்கை எடுக்காவிட்டால், நாமக்கல், திருச்செங்கோடு, சேலம், ஈரோடு, கரூர், கோவை, திண்டுக்கல் உள்ளிட்ட மாவட்டங்களில் உள்ள கொங்கு அமைப்புகளை ஒன்றுதிரட்டி, தமிழக அரசின் கவனத்தை ஈர்க்கும் வகையில் உண்ணாவிரதப் போராட்டம் உள்ளிட்ட தொடர் போராட்டங்களில் ஈடுபட உள்ளோம் என அவர் கூறினார்.
