சோமவார விரதம் என்பது சிவபெருமானுக்குரிய விரதமாகும். புதிதாக சோமவார விரதம் துவக்குபவர்கள் கார்த்திகை மாதத்தில் துவங்குவது சிறப்பு. பொதுவாகவே அனைத்து திங்கட்கிழமைகளிலும் கடைபிடிக்கப்படும் விரதத்திற்கு சோமவார விரதம் என்பார்கள். அதிலும் கார்த்திகை மாதத்தில் வரும் திங்கட்கிழமைகளில் கடைப்பிடிக்கப்படும் கார்த்திகை சோமவார விரதம் மிக மிக அற்புத பலன்களை தரக் கூடியதாகும்.
இந்த ஆண்டு மிகவும் விசேஷமாக கார்த்திகை முதல் நாளான நவம்பர் 17ம் தேதியும், கார்த்திகை கடைசி நாளான டிசம்பர் 15ம் தேதியும் சோமவாரமாகவே அமைந்துள்ளது
கார்த்திகை மாத சோம வாரத்தில் அனைத்து சிவன் கோவில்களிலும் சங்காபிஷேகம் நடத்தப்படுவது வழக்கம். இதனால் அனைத்து பாவங்களும் நீங்கும் என்பது ஐதீகம்.
கார்த்திகை மாதத்தில் இறைவன் அக்னிப் பிழம்பாக இருப்பார். அவரைக் குளிர்விக்கும் பொருட்டு சங்காபிஷேகம் செய்வார்கள். கார்த்திகை மாதம் சூரியன் பகை வீடான விருச்சிகத்தில் சஞ்சரிப்பார். அப்போது சந்திரன் நீச்சத்தில் இருப்பதால் தோஷம் , இந்த தோஷத்தை நீக்கவே சங்காபிஷேகம் நடத்தப்படுகிறது என்பர்.
வைணவத்தில் சங்கு வீரத்தின் சின்னமாகத் திகழ்கிறது. பகவான் கிருஷ்ணனின் பாஞ்சஜன்யம் என்ற சங்கொலி கேட்டு குருக்ஷேத்ரமே நடுங்கியது.
அபிஷேகத்திற்கு சங்கைப் பயன்படுத்துவானேன் என்று கேட்கலாம். சங்கு, இயற்கையாக கிடைக்கக் கூடியது. வெண்மையானது. சுட்டாலும் வெண்மை தருவது. மனித மனங்களும் சங்கைப்போல, நிலையான தன்மையுடையதாக இருக்க வேண்டும் என்பதை வலியுறுத்தவே சங்காபிஷேகம் செய்யப்படுகிறது.
மகான் ஸ்ரீ சேஷாத்திரி ஆசிரமத்தில்
திருவண்ணாமலை கிரிவல பாதையில் உள்ள மகான் ஸ்ரீ சேஷாத்திரி ஆசிரமத்தில் கார்த்திகை சோமவார விழா சிறப்பாக நடைபெற்றது. சோமவார விழாவை முன்னிட்டு, சிவாச்சாரியார்கள் யாக பூஜை செய்து நெல் தானியத்தை பரப்பி, அதில் 108 வலம்புரி சங்குகளை அடுக்கி புனித நீரை நிரப்பி, வேத மந்திரங்கள் முழங்க சிறப்பு பூஜைகள் செய்தனர்.
பூஜைக்கு பின்னர் சங்குகளில் உள்ள புனித நீரை எடுத்துச் சென்று மூலஸ்தானத்தில் உள்ள ஸ்ரீ சேஷாத்ரி சுவாமிகள், மனசா தேவி அம்பாளுக்கு சிறப்பு அபிஷேகம் செய்தனர். இந்த சிறப்பு வழிபாட்டில் திரளான பக்தர்கள் கலந்துகொண்டு தரிசனம் செய்தனர். தொடர்ந்து சிறப்பு அன்னதானம் நடைபெற்றது.
சங்காபிஷேக யாக பூஜை
