திருமண விழாக்கள் என்றாலே கொண்டாட்டம், நடனம், விருந்து, மற்றும் ஆல்கஹால் பயன்பாடு அதிகம் இருக்கும். குறிப்பாக காக்டெய்ல் இரவு முடிந்த பிறகு, அதிகாலையில் நடைபெறும் திருமணச் சடங்குகளுக்கு எழுந்திருப்பது பல விருந்தினர்களுக்குச் சவாலாக இருக்கும். சோர்வு மற்றும் ‘ஹேங்ஓவர்’ உணர்வு காரணமாகப் பலரும் சோம்பலாகக் காணப்படுவதுண்டு.
இந்தச் சோர்வைப் போக்க விரைவான தீர்வைத் தேடி, தற்போது திருமண நிகழ்வுகளில் ஐ.வி. டிரிப்ஸ் எனப்படும் நரம்பு வழி திரவ சிகிச்சை வழங்கும் ‘டிரிப் பார்கள்’ அமைக்கும் புதிய ட்ரெண்ட் உருவாகியுள்ளது. சமூக வலைதளப் பிரபலங்கள் கூட தங்கள் திருமண நிகழ்வுகளில் இந்தச் சேவையை அளித்து வருவதால், இந்த வழக்கம் பிரபலமடைந்து வருகிறது.
விருந்தினர்களுக்கு உடனடியாக நீர்ச்சத்தை அளிக்கவும், ஹேங்ஓவரைப் போக்கவும், ஆற்றலை அதிகரிக்கவும் இந்த ஐ.வி. டிரிப் பயன்படுத்தப்படுவதாகக் கூறப்படுகிறது.
ஐ.வி. டிரிப்ஸ் உண்மையிலேயே பாதுகாப்பானதா?
ஐ.வி. டிரிப்ஸ் என்பவை நேரடியாக நரம்புக்குள் திரவம் மற்றும் ஊட்டச்சத்துக்களை அளிக்கும் முறையாகும். நீரிழப்பு, நோய் அல்லது உடல் பலவீனம் போன்ற மருத்துவக் காரணங்களுக்காக மட்டுமே இவை பயன்படுத்தப்பட வேண்டும் .
ஆரோக்கியமான நபர்கள், சவுகரியத்திற்காகவும், உடனடி ஆற்றலுக்காகவும் இதைச் பயன்படுத்துவது பாதுகாப்பானது அல்ல என்றும், தேவையற்ற பக்கவிளைவுகளை ஏற்படுத்தலாம்.
திருமண அரங்கில் ஐ.வி. டிரிப்ஸ் பயன்படுத்துவதால் ஏற்படும் ஆபத்துகள்:
ஐ.வி. டிரிப்ஸ் நேரடியாக இரத்த ஓட்டத்தில் செலுத்தப்படுவதால், மருத்துவக் கண்காணிப்பு மற்றும் அத்தியாவசியத் தேவையின்றி இதைப் பயன்படுத்துவது கடுமையான ஆபத்துகளை விளைவிக்கும்
தொற்று அபாயம்: ஊசி செருகப்படும் இடத்தில் தொற்று ஏற்படலாம். குறிப்பாக, திருமணங்கள் போன்ற பொதுவான, மருத்துவமனை அல்லாத இடங்களில் சரியான சுகாதார விதிகள் பின்பற்றப்படாவிட்டால், கிருமிகள் இரத்தத்தில் கலந்து காய்ச்சல் அல்லது செப்சிஸ் போன்ற உயிருக்கு ஆபத்தான நிலைமைகளைக்கூட ஏற்படுத்தலாம். ஒவ்வொருவருக்கும் புதிய, கிருமி நீக்கம் செய்யப்பட்ட ஊசி பயன்படுத்தப்படுவது கட்டாயம்.
எலக்ட்ரோலைட் சமநிலையின்மை: உடலில் உள்ள உப்புகள் அல்லது ஊட்டச்சத்துக்களின் அளவு தவறாகக் கொடுக்கப்பட்டால், எலக்ட்ரோலைட் சமநிலையின்மை ஏற்பட்டு உடல்நலக் குறைபாடுகள் உண்டாகலாம்.
இதயம் மற்றும் நுரையீரலுக்குச் சிரமம்: அதிகப்படியான திரவத்தை விரைவாகச் செலுத்துவது இதயம் அல்லது நுரையீரலுக்குச் சிரமத்தை அளித்து, மூச்சுத் திணறல் போன்ற சிக்கல்களுக்கு வழிவகுக்கும்.
நரம்புப் பாதிப்பு: ஊசி தவறாகச் செருகப்பட்டால் நரம்புகள் அல்லது சுற்றியுள்ள திசுக்கள் சேதமடையலாம்.
ஒவ்வாமை எதிர்வினைகள்: செலுத்தப்படும் திரவம் அல்லது மருந்துகளால் ஒவ்வாமை ஏற்பட வாய்ப்புள்ளது.
ஐ.வி. டிரிப்ஸ் போன்ற மருத்துவ நடைமுறைகள் கண்டிப்பாகப் பயிற்சி பெற்ற மருத்துவ ஊழியர்களால், சுத்தமான மற்றும் கட்டுப்படுத்தப்பட்ட மருத்துவச் சூழலில் மட்டுமே செய்யப்பட வேண்டும் ஆரோக்கியமான நபர்களுக்கு, போதுமான அளவு தண்ணீர் குடிப்பது, நன்றாகச் சாப்பிடுவது, மற்றும் போதுமான ஓய்வு எடுப்பது ஆகியவை சாதாரண சோர்வைப் போக்க போதுமானது என்று நிபுணர்கள் அறிவுறுத்துகின்றனர்.
திருமண நிகழ்வுகளில் இந்த அத்தியாவசியமற்ற மற்றும் ஆபத்தான ட்ரெண்டைத் தவிர்ப்பதே பாதுகாப்பானது.
