முதலில் இந்த ஆண்டு ஜனவரி 9 ஆம் தேதி வெளியாகும் எனத் திட்டமிடப்பட்டிருந்த விஜய்யின் ‘ ஜன நாயகன்’ திரைப்படம், தற்போது திரையரங்கு வெளியீட்டை நெருங்கி வருகிறது. படக்குழுவினர் இன்னும் அதிகாரப்பூர்வமாக புதிய தேதியை அறிவிக்கவில்லை என்றாலும், இப்படம் ஜூலை மாத இறுதிக்குள் திரையரங்குகளில் வெளியாகும் என எதிர்பார்க்கப்படுகிறது.
மத்திய திரைப்படச் சான்றிதழ் வாரியம் இப்படத்திற்கு ‘ஏ’ சான்றிதழ் வழங்கியுள்ளது. சான்றிதழ் ஆவணத்தின்படி, ‘ஜன நாயகன்’ திரைப்படம் 183 நிமிடங்கள் 11 வினாடிகள் (3 மணிநேரம் 3 நிமிடங்கள்) ஓடும் நேரத்தைக் கொண்டுள்ளது .
திரைப்படம் திரையரங்குகளில் வெளியாவதற்கு முன்பு, மத்திய திரைப்பட விழா ஆணையம் 12 மாற்றங்களைப் பரிந்துரைத்துள்ளது. சென்சார் போர்டு நீக்கிய 12 தணிக்கை மாற்றங்களின் பட்டியல்:
- படத்தில் ஆடியோ மற்றும் வீடியோவில் ‘டிவிகே’ (தமிழக வெற்றிக் கழகம்) என்ற வார்த்தை வரும் அனைத்து இடங்களையும் முழுமையாக நீக்க தணிக்கை வாரியம் உத்தரவிட்டுள்ளது.
- படத்தில் ஒரு காட்சியில் இடம்பெற்ற, ஒரு புத்தகத்தின் அட்டையில் டாக்டர் பி.ஆர். அம்பேத்கர் தோன்றும் காட்சிகள் மாற்றியமைக்கப்பட்டுள்ளன. “அம்பேத்கர். முதல் டிவிகே சட்டம்” என்று குறிப்பிடும் உரையாடல் மாற்றப்பட்டுள்ளது,
- அதே நேரத்தில் ஆடியோ மற்றும் வீடியோ இரண்டிலும் “டிவிகே” என்ற வார்த்தையின் பயன்பாடு முடக்கப்பட்டு மாற்றியமைக்கப்பட்டுள்ளது.
- ஒரு காட்சியில் இடம்பெற்ற இந்திய தேசியக் கொடியின் காட்சிகளை நீக்குமாறும் வாரியம் உத்தரவிட்டது.
- ‘பாகவதான்’, ‘ரங்கநாதர்’ ஆகிய வார்த்தைகளுடன், ‘தே** பையா’ மற்றும் ‘**தா’ ஆகிய வார்த்தைகளும் மியூட் செய்யப்பட்டுள்ளன
- ஆபரேஷன் மெலூஹாவை விளக்கும் உரையாடலில் ‘ஓம்’ என்ற சொல் எங்கெல்லாம் பயன்படுத்தப்படுகிறதோ, அங்கெல்லாம் அதை நீக்க வேண்டும் என்பது மற்றொரு மாற்றமாகும்.
- அதே காட்சியில், சதாம் உசேன் தூக்கிலிடப்பட்டதைக் குறிப்பிடும் ஒரு உரையாடலும் மியூட் செய்யப்பட்டுள்ளது அல்லது மாற்றப்பட்டுள்ளது.
- மாவட்ட ஆட்சியர் அலுவலகச் சின்னம் மரியாதையற்ற முறையில் கீழே உருட்டிவிடப்படுவது போன்ற காட்சியை நீக்கி மாற்றுமாறு மேலும் உத்தரவிட்டது.
- அத்துடன்,”பொண்ணோட…” என்று தொடங்கும் ஒரு முழு நீள வசனத்தை முற்றிலும் மியூட் செய்ய சென்சார் போர்டு உத்தரவிட்டுள்ளது.
- ‘இந்தியா ஏன் கால்ல விழ வைக்கிறேன்’ என்றவசனமும் தணிக்கை செய்யப்பட்டுள்ளது.
- குழந்தை எரிக்கும் காட்சி நீக்கப்பட்டு மாற்றப்பட்டுள்ளது, அதே நேரத்தில் ‘சிலுவைல’ என்ற வார்த்தை மியூட் செய்யப்பட்டுள்ளது.
- இறுதியாக, திரைப்படத்தில் ‘ஷீலா ராணி’ என்ற பெயர் இடம்பெறும் இடங்களில் எல்லாம் அதை மாற்றுமாறு தயாரிப்பாளர்களுக்கு அறிவுறுத்தியது.
மொத்தத்தில், 20 வினாடிகள் நீக்கத்திற்கும் 10 வினாடிகள் மாற்றீட்டிற்கும் வாரியம் உத்தரவிட்டபோதிலும், திரைப்படத்தின் இறுதி ஓடும் நேரம் 183 நிமிடங்கள் 11 வினாடிகளாக மாற்றமின்றி இருந்தது.
ஜன நாயகன் இந்த ஆண்டின் மிகவும் எதிர்பார்க்கப்படும் தமிழ் வெளியீடுகளில் ஒன்றாகும். முதலில் 2026 பொங்கல் பண்டிகையை முன்னிட்டு ஜனவரி 9-ஆம் தேதியே வெளியாகவிருந்த இப்படம், அரசியல் காரணங்கள் மற்றும் சென்சார் போர்டு உடனான சட்டப் போராட்டங்களால் தள்ளிப்போனது. இடையில் ஏப்ரல் மாதத்தில் இதன் எடிட் செய்யப்படாத முழுப் படமும் இணையத்தில் கசிந்து பரபரப்பை ஏற்படுத்தியது. அந்தப் பதிப்பை 1.2 கோடி பேர் பார்த்ததாக நீதிமன்றத்தில் காவல்துறை தெரிவித்தது.
அனைத்துச் சோதனைகளையும் கடந்து, விஜய் தமிழக முதலமைச்சராகப் பொறுப்பேற்ற பிறகு வெளியாகும் அவரது கடைசிப் படம் என்பதால், ‘ஜனநாயகன்’ படத்திற்குத் தற்போதே ஒட்டுமொத்த இந்தியத் திரையுலகிலும் எதிர்பார்ப்பு உச்சத்தைத் தொட்டுள்ளது.
