‘விஸ்வநாத் அண்ட் சன்ஸ்’ படம் குடும்ப சித்திரம் என்றழைக்கப்பட்டாலும், அதில் கதையின் முக்கிய புள்ளியாக முக்கியவத்துவம் வாய்ந்த, வாடகை தாய் முறைமை விவாதத்திற்குரியது.
படத்தில் கல்லூரி மாணவி வாடகைத்தாயாக மாறுவது சரியா, தவறா? என்ற கதாபாத்திரம் சார்ந்த கேள்வி என்றால், அதை நேரடியாக “சரி” அல்லது “தவறு” என்று மட்டும் சொல்ல முடியாது.
ஒரு இளம்பெண் எந்த சூழ்நிலையில் அதற்கு சம்மதிக்கிறாள் என்பது தான்., சரி–தவறை தீர்மானிக்கும் முக்கிய அம்சம். நாயகி ஒரு அனாதை. குறிப்பாக தன் இறுதி ஆண்டுக்கான படிப்புக்கான செலவை சமாளிக்க, வாடகைத்தாயாக சம்மதிக்கிறாள். இந்திய கலாச்சாரத்தில் வளர்ந்த ஒரு பெண், அமெரிக்காவில் படிக்கிற போது எடுக்கப்படுகிற இந்த முடிவு, தவறான முன்னுதாரணமாகி விடும் என பலர் வாதிடுவதில் நியாயம் இருக்கத்தான் செய்கிறது.
சூழல், நடைபெறும் இடம் இவற்றை கருத்தில் கொள்ள வேண்டியுள்ளது. நாயகி ஒரு கல்லூரி மாணவி என்பதால், வாழ்க்கை அனுபவமும் எதிர்காலத் திட்டங்களும் இன்னும் உருவாகிக் கொண்டிருக்கும் வயது. கர்ப்பம் என்பது சாதாரணமாக “ஒருவருக்காக உதவி செய்வது” போன்ற விஷயம் அல்ல; உடல், மனம்,மருத்துவ ஆபத்து ஆகியவை சம்பந்தப்பட்ட மிகப் பெரிய முடிவு. தனது பண தேவைக்காக மட்டுமே இதற்கு சம்மதிக்கிறாள்.
சரோகசி என்பது தவறு அல்ல. இந்தியாவில் வணிகரீதியான சரோகசி தடை செய்யப்பட்டுள்ளது. ஆனால் பல அமெரிக்க மாகாணங்கள், திருமணமாகாதவர்கள், தனி நபர்கள் மற்றும் எல்.ஜி.பி.டி.தம்பதியினர் வாடகைத் தாய் முறையைப் பயன்படுத்துவதை முழுமையாக அங்கீகரிக்கின்றன.
இது ஒருபுறம் குழந்தை பாக்கியம் இல்லாதவர்களின் துயரைப் போக்கும் மருத்துவ அறிவியல் முன்னேற்றமாகவும், மறுபுறம் மனிதஉடல் வணிகமயமாக்கப்படும் நெறிமுறைச் சிக்கலாகவும் விவாதிக்கப்பட்டு வருகிற சூழலில், சினிமா இதை “தியாகம்” அல்லது “ஒரு குடும்பத்திற்காக செய்த நல்ல காரியம்” என்று மட்டும் முன்னிறுத்தும் புனைவாக சித்தரிக்கப்பட்டிருந்தால், அது விமர்சிக்கப்பட வேண்டிய ஒன்று.
வாடகைத் தாய் முறையைக் கலாச்சார சீரழிவு அல்லது அறநெறி மீறல் என்று விமர்சிப்பவர்கள், இளைய தலைமுறையை தவறான வழியில் நடத்தி செல்லும் என்கிற கருத்தியலில் வாதிடலாம். இந்த திரைப்படத்தின் நெறியாள்கை சொல்லும் நெறி என்ன என்பதை படம் பார்த்துவிட்டு மறுபரிசீலனை செய்வது உசிதம்.
எந்த ஒரு அறிவியல் கண்டுபிடிப்புக்கும், மறுபக்கம் ஒன்று உண்டு. சினிமாத்தனம் இல்லாமல் சினிமா எடுப்பது சிரமம் தான்.
இங்கிலாந்திலிருந்து சங்கர்
