ஈரான் மற்றும் இஸ்ரேல் இடையே நிலவி வரும் போர் பதற்றம் மூன்றாவது வாரத்தை எட்டியுள்ள நிலையில், இது இந்திய வர்த்தகத்திற்குப் பெரும் ‘லாஜிஸ்டிக்ஸ்’ சவால்களை ஏற்படுத்தியுள்ளதாக மத்திய வர்த்தக செயலாளர் ராஜேஷ் அகர்வால் தெரிவித்தார்.
வர்த்தக பாதிப்புகள் குறித்துச் செய்தியாளர் சந்திப்பில் பேசிய ராஜேஷ் அகர்வால் கூறியதாவது: தற்போது பல சவால்களை எதிர்கொண்டு வருகிறோம். குறிப்பாக, விமானப் போக்குவரத்துப் பாதிப்பால் வான்வழிச் சரக்குப் போக்குவரத்து சிக்கல்களைச் சந்தித்து வருகிறது. இந்தியாவிலிருந்து அந்த நாடுகளுக்குச் செல்லும் ஏற்றுமதியும், அங்கிருந்து வரும் இறக்குமதியும் இதனால் பாதிக்கப்படும். ஏனெனில் அந்த நாடுகள் பல அத்தியாவசியப் பொருட்களுக்கு இந்தியாவைச் சார்ந்துள்ளன. இருப்பினும், வர்த்தகப் பாதைகளைத் தொடர்ந்து செயல்பாட்டில் வைத்திருக்க இரு தரப்பும் தீவிரமாகப் பணியாற்றி வருவதாகவும், பாதிப்புகள் இருந்தாலும் வர்த்தகம் முற்றிலும் நின்றுவிடாது என்றும் அவர் உறுதி அளித்தார்.
மேலும் அவர் கூறுகையில், சூழ்நிலையை உன்னிப்பாகக் கண்காணிக்க அரசு சிறப்பு ஏற்பாடுகளைச் செய்துள்ளது. வெளிநாட்டு வர்த்தக இயக்குநரகத்தின் கீழ் அமைக்கப்பட்ட அமைச்சகங்களுக்கு இடையிலான குழு, ஒவ்வொரு நாளும் காலையில் கூடி நிலைமையை ஆய்வு செய்கிறது. மேற்கு ஆசிய நெருக்கடியால் ஏற்பட்டுள்ள பாதிப்புகளைக் கருத்தில் கொண்டு, ஏற்றுமதி கடப்பாடுகளை நிறைவேற்றுவதற்கான காலக்கெடு 2026 ஆக 31 வரை நீட்டிக்கப்பட்டுள்ளது. மார்ச் 2 முதல் 12 வரை நடத்தப்பட்ட சிறப்பு முகாம் மூலம் 3,796 நிலுவை வழக்குகள் தீர்க்கப்பட்டு, ஏற்றுமதியாளர்களின் பணப்புழக்கம் மேம்படுத்தப்பட்டுள்ளது.
சீனாவிலிருந்து இறக்குமதி செய்யப்படும் ‘பிவிசி சஸ்பென்ஷன்’ தொடர்பாக மானிய எதிர்ப்பு வரி விசாரணை தொடங்கியுள்ளது. மேலும், சீனாவிலிருந்து இறக்குமதி செய்யப்படும் சில வேதிப்பொருட்கள் தொடர்பான ஆன்டி-டம்பிங் விசாரணைகளும் இறுதி கட்டத்தை எட்டியுள்ளன. மேற்கு ஆசியப் போர் சூழலால் உலகளாவிய வர்த்தக விநியோகச் சங்கிலியில் பாதிப்பு ஏற்பட்டுள்ள போதிலும், இந்திய ஏற்றுமதியாளர்களைப் பாதுகாக்கவும், வர்த்தகத்தைத் தடையின்றித் தொடரவும் மத்திய அரசு பல்வேறு பாதுகாப்பு நடவடிக்கைகளை எடுத்து வருகிறது என்று கூறினார்
