நாமக்கல் மாவட்டத்தில் உள்ள 6 சட்டசபை தொகுதிகளில் மொத்தம் 13 லட்சத்து 10 ஆயிரத்து 951 வாக்காளர்கள் உள்ளனர். இறுதி பட்டியலில் மொத்தம் 1 லட்சத்து 55 ஆயிரத்து 709 பேர் நீக்கப்பட்டுள்ளனர்.
நாமக்கல்லில், மாவட்ட தேர்தல் அலுவலரும், மாவட்ட ஆட்சியருமான துர்கா மூர்த்தி, இன்று இறுதி வாக்காளர் பட்டியலை வெளியிட்டார். அதில், 6 சட்டசபை தொகுதிகளில், ஆண் வாக்காளர்கள் 6,35,299 பேர், பெண் வாக்காளர்கள் 6,75,452 பேர், இதர வாக்காளர்கள் 200 பேர் என மொத்தம் 13,10,951 வாக்காளர்கள் உள்ளனர்.
எஸ்ஐஆர் நடவடிக்கைக்குப் பிறகு வாக்காளர் பட்டியலில் இருந்து மொத்தம் 1,55,709 வாக்காளர்கள் நீக்கப்பட்டுள்ளனர்.
நாமக்கல் மாவட்டத்தில் ராசிபுரம் (தனி), சேந்தமங்கலம் (எஸ்டி/தனி), நாமக்கல், ப.வேலூர், திருச்செங்கோடு, குமாரபாளையம் ஆகிய 6 சட்டசபை தொகுதிகள் உள்ளன. அதில், மொத்தம் 1,780 வாக்குச்சாவடிகள் உள்ளன.
இந்நிலையில், கடந்த டிச. 19ம் தேதி வரைவு வாக்காளர் பட்டியல் வெளியிடப்பட்டு, அதில் விடுபட்ட வாக்காளர்களை சேர்க்கும் பணி நடைபெற்றது. அதில் மொத்தம் 37,997 பேர் சேர்க்கப்பட்டு தற்போது இறுதி வாக்காளர் பட்டியல் வெளிப்பட்டுள்ளது.
தொகுதி வாரியாக இறுதி வாக்காளர்கள் விபரம்:
- ராசிபுரம் (தனி): ஆண்கள் 1,07,813, பெண்கள் 1,12,728, இதரர்கள் 13 பேர் என மொத்தம் 2,20,554 வாக்காளர்கள் உள்ளனர். இவர்கள் வாக்களிக்கு மொத்தம் 285 வாக்குச்சாவடிகள் அமைக்கப்பட்டுள்ளன.
- சேந்தமங்கலம் (எஸ்டி/தனி): ஆண்கள் 1,11,214, பெண்கள் 1,16,087, இதரர்கள் 26 பேர் எனம் 2,27,327 வாக்காளர்கள் உள்ளனர். இவர்கள் வாக்களிக்க 304 வாக்குச்சாவடிகள் அமைக்கப்பட்டுள்ளன.
- நாமக்கல்: ஆண்கள் 1,13,217, பெண்கள் 1,22,093, இதரர்கள் 41 பேர் என மொத்தம் 2,35,351 வாக்காளர்கள் உள்ளனர். இவர்கள் வாக்களிக்க மொத்தம் 310 வாக்குச்சாவடிகள் அமைக்கப்பட்டுள்ளன.
- பரமத்தி வேலூர்: ஆண்கள் 97,727, பெண்கள் 1,05,830, இதரர்கள் 10 பேர் என மொத்தம் 2,03,567 வாக்காளர்கள் உள்ளனர். இவர்கள் வாக்களிக்க 268 வாக்குச்சாவடிகள் அமைக்கப்பட்டுள்ளன.
- திருச்செங்கோடு: ஆண்கள் 1,00,412, பெண்கள் 1,06,475, இதரர்கள் 41 பேர் என மொத்தம் 2,06,928 வாக்காளர்கள் உள்ளனர். இவர்கள் வாக்களிக்க மொத்தம் 289 வாக்குச்சாவடிகள் அமைக்கப்பட்டுள்ளன.
- குமாரபாளையம்: ஆண்கள் 1,04,916, பெண்கள் 1,12,239, இதரர்கள் 69 பேர் என மொத்தம் 2,17,224 வாக்காளர்கள் உள்ளனர். இவர்கள் வாக்களிக்க மொத்தம் 324 வாக்குச்சாவடிகள் அமைக்கப்பட்டுள்ளன.
வாக்காளர் பட்டியில் எஸ்ஐஆர் திருத்தப்பணியின்போது இறந்துபோனவர்கள், நிரந்தரமாக இடம் மாறி சென்றவர்கள், இரண்டு இடங்களில் பெயர் இடம் பெற்றவர்கள், கண்டுபிடிக்க முடியாதவர்கள் ஆகிய வாக்காளர்கள் 1 லட்சத்து 55 ஆயிரத்து 709 பேர் வாக்காளர் பட்டியலில் இருந்து நீக்கப்பட்டுள்ளனர்.
தொகுதி வாரியாக நீக்கப்பட்டவர்கள் விபரம்:
ராசிபுரம் (எஸ்.சி.,) 15,274, சேந்தமங்கலம் (எஸ்.டி.,), 22,050, நாமக்கல் 28,701, ப.வேலூர் 19,065, திருச்செங்கோடு 25,930, குமாரபாளையம் 44,689.
இது குறித்து, மாவட்ட ஆட்சியர் துர்கா மூர்த்தி கூறியதாவது: இறுதி வாக்காளர் பட்டியல் வெளியீட்டின் தொடர்ச்சியாக, இன்று முதல், 2026-க்கான தொடர் திருத்தப்பணிகள் நடக்கிறது. இத்தொடர் திருத்தப்பணியின்போது, கடந்த, ஜன., 1ல் 18 வயது பூர்த்தியடைந்தவர்கள் (அதாவது 31.12.2007 அன்றோ அல்லது அதற்கு முன்னரோ பிறந்தவர்கள்) தங்களின் பெயர்களை வாக்காளர் பட்டியலில் சேர்த்துக்கொள்ள விண்ணப்பிக்கலாம்.
மேலும், 17 வயது பூர்த்தியடைந்தவர்களும், தங்களின் பெயர்களை வாக்காளர் பட்டியலில் சேர்த்துக்கொள்ள விண்ணப்பிக்கலாம். இவர்களின் பெயரானது, 18 வயது பூர்த்தியடையும் காலாண்டில் வெளியிடப்படும்.
வாக்காளர் பட்டியலில் இடம் பெறும். இறுதி வாக்காளர் பட்டியலில் பெயர் விடுபட்டுள்ள தகுதியான வாக்காளர்களும், இதுவரை வாக்காளர் பட்டியலில் தங்களது பெயரை சேர்த்துக் கொள்ளாதவர்களும், திருத்தங்கள் செய்ய விரும்புபவர்களும், உரிய விண்ணப்பங்களை சம்மந்தப்பட்ட மாநகராட்சி, தாலுகா, நகராட்சி, ஆர்.டி.ஓ., அலுவலகங்களில் அளிக்கலாம் என கூறினார்.
