நாமக்கல் மாவட்ட ஆட்சியர் அலுவலகத்தில் மாவட்ட அளவிலான விவசாயிகள் குறைதீர்க்கும் நாள் கூட்டம் நடைபெற்றது. மாவட்ட ஆட்சியர் துர்கா மூர்த்தி தலைமை வகித்து பேசியதாவது:
நாமக்கல் மாவட்டத்தின், இயல்பு மழை அளவு 716.54 மி.மீ., தற்போது வரை 728.03 மி.மீ., மழை பெறப்பட்டுள்ளது. இயல்பு மழையளவை விட கூடுதலாக 11.49 மி.மீ. மழை பெறப்பட்டுள்ளது.
நடப்பாண்டில், நவம்பர் வரை, நெல் 8,201 எக்டர், சிறுதானியங்கள் 82,380 எக்டர், பயறு வகைகள் 11,336 எக்டர், எண்ணெய் வித்துக்கள் 30,796 எக்டர், பருத்தி 1,800 எக்டர், கரும்பு 9,051 எக்டர் என மொத்தம், ஒரு லட்சத்து 43,564 எக்டரில் வேளாண் பயிர்கள் சாகுபடி செய்யப்பட்டுள்ளது.
தோட்டக்கலைப் பயிர்களில், தக்காளி 594 எக்டர், கத்திரி 365 எக்டர், வெண்டை 284 எக்டர், மிளகாய் 117 எக்டர், மரவள்ளி 2,918 எக்டர், வெங்காயம் 3,409 எக்டர், மஞ்சள் 2,264 எக்டர், வாழை 2,471 எக்டர் பரப்பில் சாகுபடி செய்யப்பட்டுள்ளது.
மாவட்டத்தின் அனைத்துப் பகுதிகளிலும் விதைகள் மற்றும் உரங்கள் வேளாண்மை விரிவாக்க மையங்கள், தொடக்க வேளாண் கூட்டுறவு கடன் சங்கங்கள் மற்றும் தனியார் நிறுவனங்களில், விவசாயிகளின் தேவைக்கு ஏற்ப இருப்பு வைக்கப்பட்டுள்ளது.
விவசாயிகளுக்காக, உழவர் நல சேவை மையங்கள் அமைக்க தமிழக முதல்வர் உத்தரவிட்டுள்ளார். இதையொட்டி, நாமக்கல் மாவட்டத்தில் 34 உழவர் நல சேவை மையங்கள் அமைக்கப்பட்டுள்ளது என்று அவர் பேசினார்.
நிகழ்ச்சியில், 180 கோரிக்கை மனுக்களை, விவசாயிகள் வழங்கினர். அதையடுத்து, கடந்த, 16ம் தேதி, சென்னையில் நடந்த விழாவில், வேளாண் துறை சார்பில், 2024-25ம் ஆண்டு, மாநில அளவிலான பயிர் விளைச்சல் போட்டியில், நாமக்கல் மாவட்டம், எலச்சிபாளையம், மல்லசமுத்திரம், எருமப்பட்டி, புதுச்சத்திரம், பள்ளிபாளையம் ஆகிய வட்டாரங்களை சேர்ந்த 7 விவசாயிகள் வெற்றி பெற்று, ரூ. 11 லட்சம் பரிசு பெற்றனர்.
அவர்களுக்கு கலெக்டர் துர்கா மூர்த்தி சால்வை அணிவித்து பாராட்டினர். டி.ஆர்.ஓ., சரவணன், ஆர்.டி.ஓ., சாந்தி, கூட்டுறவு சங்கங்களின் இணைப்பதிவாளர் அருளரசு உள்ளிட்ட பல்வேறு துறை அரசு அதிகாரிகள் நிகழ்ச்சியில் கலந்துகொண்டனர்.
