வங்கித்துறையில், 5 நாட்கள் மட்டுமே பணிபுரியும் முறையை அமல்படுத்த வேண்டும், வங்கி ஊழியர்களுக்கு, பி.எல்.ஐ., என்ற செயல்திறன் அடிப்படையில், ஊக்கத்தொகை திட்டத்தை அமல்படுத்த வேண்டும் என்பவை உள்ளிட்ட பல்வேறு கோரிக்கைகளை வலியுறுத்தி, நாடு முழுவதும், இன்று ஒரு நாள் வேலை நிறுத்த போராட்டத்திற்கு, வங்கி தொழிற்சங்கங்களின் கூட்டமைப்பு அழைப்புவிடுத்திருந்தது.
அதன்படி, நாடு முழுவதும் இன்று ஒருநாள் வேலை நிறுத்தப்போராட்டத்தில் வங்கி ஊழியர்கள் ஈடுபட்டனர். நாமக்கல் மாவட்டத்தில் வேலை நிறுத்தம் காரணமாக, வங்கிகள் வெறிச்சோடி காணப்பட்டது. சில வங்கிகிள் முழுமையாக மூடப்பட்டிருந்தன. வங்கிக்கு வந்த வாடிக்கையாளர்கள் வரவு-செலவு செய்ய முடியாமல் ஏமாற்றத்துடன் திரும்பினர்.
இது குறித்து, நாமக்கல் வங்கி தொழிற்சங்கங்கள் கூட்டமைப்பின், மாவட்ட ஒருங்கிணைப்பாளர் வெங்கடசுப்ரமணியம் கூறியதாவது: வங்கி ஊழியர்களின் நீண்டகால கோரிக்கையான, அனைத்து சனிக்கிழமைகளிலும் விடுமுறை வழங்க வேண்டும் என்ற கோரிக்கையை மத்திய அரசு தொடர்ந்து காலதாமதப்படுத்தி வருகிறது. சனிக்கிழமை மற்றும் ஞாயிற்றுக்கிழமைகளில் விடுமுறை வழங்கினால், அதற்கு ஈடாக, வாடிக்கையாளர்களுக்கான வணிக சேவை நேரத்தை கூடுதலாக, 40 நிமிடங்கள் அதிகரித்து பணியாற்ற வங்கி ஊழியர்கள் தயாராக இருப்பதாக மத்திய அரசிடம் தெரிவிக்கப்பட்டுள்ளது.
வங்கிகளில் கிளார்க் மற்றும் துணை ஊழியர்களை போதுமான அளவில் பணியமர்த்துதல், தேசிய ஓய்வூதியத் திட்டத்தை பழைய ஓய்வூதியத் திட்டமாக மாற்றுதல், பணிக் கொடை உச்சவரம்பை அதிகரித்தல், வங்கிகளில் தொழிலாளர் மற்றும் அதிகாரி இயக்குனர் பதவிகளை வேண்டும் என்றே நிரப்பாமல் இருப்பது உள்ளிட்ட பல்வேறு கோரிக்கைகளை வலியுறுத்தி நாடு முழுவதும் இன்று ஒரு நாள் வேலை நிறுத்தப்போராட்டத்தில் ஈடுபட்டோம்.
நாமக்கல் மாவட்டத்தில், தொழிற்சங்க கூட்டமைப்பினர், 2,000க்கும் மேற்பட்டோர் இந்த போராட்டத்தில் பங்கேற்றனர். 140 பொதுத்துறை வங்கிகளில், பணப்பரிவர்த்தனை பாதிக்கப்பட்டது. இப்போராட்டம் காரணமாக, மாவட்டத்தில் ஒரு நாள் மட்டும் ரூ. 200 கோடி அளவிற்கு பணபரிவர்த்தனை பாதிக்கப்பட்டது என்று கூறினார்.
