நாமக்கல்லில் நடைபெற்ற மக்கள் குறைதீர்க்கும் நாள் கூட்டத்தில், 9 பயனாளிகளுக்கு ரூ. 6.49 லட்சம் மதிப்பில் நலத்திட்டஉதவிகளை மாவட்ட ஆட்சியர் வழங்கினார்.
நாமக்கல் கலெக்டர் அலுவலகத்தில் நடைபெற்ற மக்கள் குறைதீர்க்கும் நாள் கூட்டத்திற்கு நடைபெற்றது. மாவட்ட ஆட்சியர் உமா தலைமை வகித்து பொதுமக்களிடம் இருந்து கோரிக்கை மனுக்களைப் பெற்று குறைகளை கேட்டறிந்தார்.
கூட்டத்தில், முதியோர், விதவை மற்றும் கல்வி உதவித்தொகை, இலவச வீட்டு மனைப்பட்டா, வங்கி கடன் உதவி, குடிசை மாற்று வாரிய வீடு, குடிநீர் மற்றும் சாலை வசதி உள்ளிட்ட அடிப்படை வசதிகள் வேண்டி, பல்வேறு கோரிக்கைகள் குறித்து மொத்தம், 420 மனுக்கள் வரப்பெற்றன.
அவற்றை பெற்றுக் கொண்ட கலெக்டர், பரிசீலனை செய்து உரிய அலுவலர்களிடம் வழங்கி, மனுக்கள் மீது உடனடி நடவடிக்கை எடுக்க வேண்டும் என உத்தரவிட்டார்.
தொடர்ந்து, தொழிலாளர் நலத்துறை சார்பில், 2023ம் ஆண்டு எலக்ட்ரீசியன் வேலை செய்து கொண்டிருந்தபோது ஏற்பட்ட விபத்தில் உயிரிழந்த, திருச்செங்கோடு தாலுகா, கிழுவன்காட்டை சேர்ந்த ராஜமாணிக்கம் என்பவரின் மனைவி சுமதியிடம், தமிழக கட்டுமானத் தொழிலாளர்கள் நல வாரியம் சார்பில், பணியிடத்து விபத்து மரண உதவித்தொகை ரூ. 5 லட்சத்திற்கான காசோலையை ஆட்சியர் வழங்கினார்.
திருச்செங்கோடு அரசு ஆண்கள் மேல்நிலைப்பள்ளியில் பயின்ற, கட்டுமான கூலித்தொழிலாளி மகன் சந்தோஷிற்கு, மருத்துவ படிப்பு பயில, ரூ. 50,000, திருச்செங்கோடு அரசு நிதி உதவி பெறும் பள்ளியில் பயின்ற கலவை கலப்பவரின் மகள் சவுமியாவிற்கு, மருத்துவ படிப்பு பயில ரூ. 50,000 கல்வி உதவித்தொகை வழங்கப்பட்டது.
மாற்றுத்திறனாளிகள் நலத்துறை சார்பில், 5 பேருக்கு, மூன்று சக்கர நாற்காலி, மடக்கு சக்கர நாற்காலி, முழங்கை ஊன்று கோல், தாங்கு கட்டை, காதொலி கருவிகள் வழங்கப்பட்டன. நிகழ்ச்சியில் மொத்தம் 9 பேருக்கு ரூ. 6.49 லட்சம் மதிப்பில் அரசு நலத்திட்ட உதவிகள் வழங்கப்பட்டது. தனி டி.ஆர்.ஓ., சரவணன், சமூக பாதுகாப்பு திட்ட சப்கலெக்டர் பிரபாகரன் உள்ளிட்ட துறை அதிகாரிகள் கூட்டத்தில் கலந்துகொண்டனர்.
