குடும்ப நல வழக்கில் ஆஜரான வக்கீலுக்கு, கொலை மிரட்டல் விடுத்த நபரை, கைது செய்ய வலியுறுத்தியும், போலீசாரைக் கண்டித்தும், வக்கீல் சங்கங்கத்தினர், நீதிமன்றத்தை புறக்கணித்து எஸ்.பி. அலுவலகத்தை முற்றுகையிட்டதால் பரபரப்பு ஏற்பட்டது.
நாமக்கல் மாவட்டம், புதுச்சத்திரம் அடுத்த கண்ணூர்பட்டியை சேர்ந்தவர் முருகானந்தம். இவரது மனைவி சங்கீதா (23). தம்பதியருக்கு 5 மாத கைக்குழந்தை உள்ளது.
இந்நிலையில், சங்கீதா விவாகரத்து கேட்டு, வக்கீல் கணேசன் என்பவர் மூலம் நீதிமன்றத்தில் வழக்கு தொடர்ந்துள்ளார். இதற்கிடையில், வக்கீல் கணேசனை மொபைல் போனில் தொடர்பு கொண்ட முருகானந்தம், விவகாரத்து நோட்டீஸ் எனக்கு வந்தால், உன்னை கொலை செய்து விடுவேன் என மிரட்டியதாக கூறப்படுகிறது.
அதையடுத்து, மொபைல் போனில் கொலை மிரட்டல் விடுத்தது குறித்து, நாமக்கல் எஸ்.பி., ஆபீஸ் மற்றும் நல்லிபாளையம் போலீசில் வக்கீல் கணேசன் புகார் செய்தார்.
புகார் மீது வழக்குப் பதிவு செய்த காவல்துறையினர், கொலை மிரட்டல் விடுத்த முருகானந்தத்தை கைது செய்யவில்லை என தெரிகிறது.
இந்த நிலையில, கொலை மிரட்டல் விடுத்தவரை கைது செய்து நீதிமன்ற காவலுக்கு அனுப்ப வலியுறுத்தியும், நல்லிபாளையம் காவல்துறையினரை கண்டித்தும், நாமக்கல் வக்கீல்கள் நேற்று நீதிமன்ற புறக்கணிப்பில் ஈடுபட்டனர்.
தொடர்ந்து, நாமக்கல் ஒருங்கிணைந்த நீதிமன்ற வளாகம் முன், நாமக்கல் குற்றவியல் வக்கீல் சங்க தலைவர் அய்யாவு தலைமையில், 100க்கும் மேற்பட்ட வக்கீல்கள்கண்டன ஆர்ப்பாட்டத்தில் ஈடுபட்டு கோஷம் எழுப்பினர்.
அதைத்தொடர்ந்து, நீதிமன்றத்தில் இருந்து, எஸ்.பி., அலுவலகம் வரை ஊர்வலமாக சென்ற வக்கீல்கள், எஸ்.பி., அலுவலகத்தை முற்றுகையிட்டனர். அதனால், இதனால் அங்கு பரபரப்பு ஏற்பட்டது.
ஏடிஎஸ்பி., விஜயராகவன், வக்கீல்களுடன் பேச்சு வார்த்தை நடத்தினார். உரிய நடவடிக்கை எடுப்பதாக அவர் உறுதி அளித்தார். இதற்கிடையில், வக்கீலுக்கு கொலை மிரட்டல் விடுத்த முருகானந்தனை, நல்லிபாளையம் போலீசார் கைது செய்தனர். அதன்பின், முற்றுகை போராட்டத்தை கைவிட்டு வக்கீல்கள் கலைந்து சென்றனர்.
