திருவண்ணாமலை மாவட்டம், கலசப்பாக்கம் ஒன்றியம், சீட்டம்பட்டு ஊராட்சியில் நடைபெற்று வரும் வளா்ச்சிப் பணிகளை மாவட்ட ஆட்சியா் தா்பகராஜ் நேரில் ஆய்வு செய்தாா்.
சீட்டம்பட்டு ஊராட்சியில் கலசப்பாக்கம் எம்எல்ஏ சரவணன் முன்னிலையில் மகாத்மா காந்தி தேசிய ஊரக வேலை உறுதித் திட்டத்தின் கீழ் ரூ.27.13 லட்சத்தில் புதிய ஓரடுக்கு சிமென்ட் சாலை அமைக்கும் பணியை மாவட்ட ஆட்சியா் தா்ப்பகராஜ் தொடங்கிவைத்தாா்.
இதைத்தொடா்ந்து அந்த ஊராட்சியில் உள்ள ஊராட்சி ஒன்றிய நடுநிலைப் பள்ளியில் மாணவ, மாணவிகளின் கற்றல் திறனையும், அடிப்படை வசதிகளையும், உணவுக் கூடத்தில் தயாரிக்கப்பட்ட உணவினை உண்டும் அவா் ஆய்வு மேற்கொண்டாா்.
மேலும் சிறு பாசன ஏரிகள் புனரமைக்கும் திட்டத்தின் கீழ் ரூ.8.40 லட்சத்தில் நடைபெற்று வரும் பாடியம்புதூா் சிறுபாசன ஏரி புனரமைத்தல் பணிகளை அவா் பாா்வையிட்டு ஆய்வு செய்தாா்.
அப்போது பணிகளை விரைவாகவும் தரமாகவும் மேற்கொள்ள துறைச் சாா்ந்த அலுவலா்களுக்கு அறிவுறுத்தினாா். தொடர்ந்து ஆட்சியர் பேசியதாவது:
கலசபாக்கம் ஊராட்சி ஒன்றியத்தில் உள்ள சீட்டம்பட்டு ஊராட்சியில் பல்வேறு வளர்ச்சி பணிகள் நடைபெற்று வருவதை ஆய்வு செய்ததில் முதல் கட்டமாக சீட்டம்பட்டு ஊராட்சியில் உள்ள ஊராட்சி ஒன்றிய நடுநிலைப்பள்ளி ஆய்வு செய்து மாணவர்களின் கல்வித் திறன் பற்றி கேட்டு அறிந்து மாணவர்களிடம் வாசிப்பு திறன் குறித்து ஆய்வு மேற்கொள்ளப்பட்டது.
அதன் பின்னர் அதே கிராமத்தில் உள்ள ஏரி ரூ.8.40 லட்சத்தில் ஏரி புனரமைத்தல் பணியை ஆய்வு செய்து பணிகள் இன்னும் விறுவிறுப்பாக நடைபெற வேண்டும், பணிகளை காலதாமதம் செய்யாமல் விரைந்து முடிக்கவும் அறிவுறுத்தப்பட்டது.
அதேபோல் மகாத்மா காந்தி தேசிய ஊரக வேலை உறுதித் திட்டத்தின் கீழ் நடைபெற்று வரும் வளர்ச்சி பணிகளையும் ஆய்வு மேற்கொண்டு பணிகள் அனைத்தும் தரமாகவும் சரியாகவும் நடைபெற வேண்டும், காலதாமதம் செய்யாமல் பணிகளை விரைந்து முடிக்க அறிவுறுத்தப்பட்டது. அதே போல் 100 நாள் பணியில் எந்த ஒரு முறைகேடும் இல்லாமல் சரியான முறையில் நடைபெற வேண்டும்.
ஊராட்சி ஒன்றிய நடுநிலைப் பள்ளியில் மாணவர்களில் கல்வி திறனை ஆய்வு செய்ததில் மாணவர்களுக்கு இன்னும் கல்வித்திறனை அதிகப்படுத்த வேண்டும், மாணவர்களின் கல்வி மிக முக்கியமானது அதனால் மாணவர்களுக்கு சிறந்த முறையில் கல்வி கற்றுக் கொடுக்க வேண்டும், மாணவர்கள் கல்வியில் பெரிய அளவில் சாதிக்க வேண்டும். அதனால் ஆசிரியர்கள் நீங்கள் மாணவர்களுக்கு சிறந்த முறையில் கல்வி கற்றுக் கொடுங்கள் என்று கூறினார்.
இந்த ஆய்வின் போது ஊரக வளா்ச்சி முகமை திட்ட இயக்குநா் மணி மற்றும் துறை சாா்ந்த அலுவலா்கள் உடனிருந்தனா்.
