இந்திய புலம்பெயர்ந்தோருக்கு ஒரு வரலாற்று முன்னேற்றமாக, தீபாவளியை அரசு விடுமுறையாக கலிபோர்னியா அதிகாரப்பூர்வமாக அங்கீகரித்துள்ளது.
ஏற்கெனவே, 2024 இல் பென்சில்வேனியாவும், 2025 இல் கனெக்டிகட் மாகாணங்கள் தீபாவளியை அரசு விடுமுறையாக அதிகாரப்பூர்வமாக அங்கீகரித்த நிலையில், மூன்றாவது அமெரிக்க மாநிலமாக கலிபோர்னியா மாறியுள்ளது.
தீபாவளியை அரசு விடுமுறை நாளாக அதிகாரப்பூர்வமாக அறிவிக்கும் AB268 என்ற சட்டமன்ற உறுப்பினர் ஆஷ் கல்ராவின் மசோதாவில் ஆளுநர் கவின் நியூசம் செவ்வாய்க்கிழமை கையெழுத்திட்டார். இந்த மசோதா செப்டம்பரில் கலிபோர்னியா சட்டமன்றத்தின் இரு அவைகளிலும் நிறைவேற்றப்பட்டு ஆளுநரின் ஒப்புதலுக்காகக் காத்திருந்தது.
ஆளுநர் கவின் நியூசம் அக். 12 ஆம் தேதிக்கு முன்னர் மசோதாவில் கையெழுத்திடுவார் என எதிர்பார்க்கப்பட்டது. இந்நிலையில், தீபாவளியை அதிகாரப்பூர்வ விடுமுறையாக அறிவிக்கும் ‘ஏபி 268’ என்ற மசோதாவுக்கு ஆளுநர் கவின் நியூசம் ஒப்புதல் அளித்து கையெழுத்திட்டுள்ளார்.
“கலிபோர்னியாவில் இந்திய அமெரிக்கர்கள் அதிக அளவில் வசிக்கின்றனர், மேலும் தீபாவளியை அதிகாரப்பூர்வ அரசு விடுமுறையாக நியமிப்பது, நமது பன்முகத்தன்மை கொண்ட மாநிலம் முழுவதும் கொண்டாடும் லட்சக்கணக்கான கலிஃபோர்னியர்களுக்கு அதன் செய்தியை மேம்படுத்தும், மேலும் அதை பலருக்கு அறிமுகப்படுத்த உதவும்” என்று கல்ரா கடந்த மாதம் கூறினார்.
“தீபாவளி நல்லெண்ணம், அமைதி மற்றும் பகிரப்பட்ட புதுப்பித்தல் உணர்வு ஆகியவற்றின் செய்தியுடன் சமூகங்களை ஒன்றிணைக்கிறது. கலிபோர்னியா தீபாவளியையும் அதன் பன்முகத்தன்மையையும் ஏற்றுக்கொள்ள வேண்டும், அதை இருளில் மறைத்து வைக்கக்கூடாது,” என்று அவர் மேலும் கூறினார்.
அக்டோபர் 2024ல் தீபாவளியை அதிகாரப்பூர்வமாக அங்கீகரித்த முதல் மாநிலமாக பென்சில்வேனியா ஆனது, அதைத் தொடர்ந்து இந்த ஆண்டு கனெக்டிகட். நியூயார்க் நகரமும் தீபாவளியை பொதுப் பள்ளிகளுக்கு விடுமுறையாக அறிவித்துள்ளது.
சமூகத் தலைவர்களும் புலம்பெயர் அமைப்புகளும் கலிபோர்னியாவின் முடிவை ஒரு வரலாற்று மைல்கல்லாகப் பாராட்டின. தீபாவளி அரசு விடுமுறையை அடுத்து கலிபோர்னியாவில் அரசு விடுமுறை நாள்கள் 11 ஆக உயர்ந்துள்ளது.
கலிபோர்னியாவை தாயகமாகக் கொண்ட ஒரு லட்சத்துக்கும் அதிகமான இந்திய அமெரிக்கர்களுக்கு, இது மிகுந்த பெருமை மற்றும் மகிழ்ச்சிக்கான தருணம். இந்த வரலாற்றுச் சிறப்புமிக்க முடிவு கலிபோர்னியாவின் வளர்ச்சி மற்றும் வெற்றிக்கு பங்களித்த இந்திய அமெரிக்கர்களின் தலைமுறைகளை கௌரவிக்கிறது என்று தெரிவித்துள்ளனர்.
புதிய மசோதாவின்படி தீபாவளியன்று கலிபோர்னியா மாகாணத்தில் அரசு வேலைக்குச் செல்வோர், சமூகக் கல்லூரிகள், பொதுப் பள்ளிகள் முதலியவற்றுக்கு விடுமுறை அளிக்கப்படும்.
