சுற்றுச்சூழல் விதிமுறைகளை பின்பற்றாததற்காக மாசு கட்டுப்பாட்டு வாரியத்தின் உத்தரவைத் தொடர்ந்து பெங்களூரு தெற்கு பகுதியில் அமைந்துள்ள வேல்ஸ் ஸ்டுடியோ (ஜோலிவுட்) நிறுவனத்திற்கு அதிகாரிகள் சீல் வைத்தனர்.
பெங்களூரு தெற்கு மாவட்டத்தின் பிடாடியில் உள்ள வேல்ஸ் ஸ்டுடியோவில் நீர் மற்றும் காற்று மாசுபாட்டின் விதிமுறைகளை மீறியதாகக் கூறி பிக் பாஸ் கன்னட ரியாலிட்டி ஷோ படப்பிடிப்பு தளத்தை மூட கர்நாடக மாநில மாசு கட்டுப்பாட்டு வாரியம் உத்தரவிட்டுள்ளதாக கூறப்படுகிறது.
கழிவுநீர் சுத்திகரிப்பு நிலையம் செயல்படவில்லை என்றும், கழிவுநீர் மேலாண்மைக்கான ஏற்பாடுகள் இல்லாததால் 2.5 லட்சம் லிட்டர் சுத்திகரிக்கப்படாத கழிவுநீர் கண்டறியப்பட்டுள்ளதாகவும் தெரிவிக்கப்பட்டுள்ளது. சுற்றுச்சூழல் விதிகளை மீறியதாக எழுந்த குற்றச்சாட்டுகள் காரணமாக, ராம்நகரின் பிடாடியில் உள்ள வேலா ஸ்டுடியோஸ் மூடப்பட்டது, மேலும் அங்கு நடைபெறும் பிக் பாஸ் கன்னட நிகழ்ச்சியும் நிறுத்தப்பட்டுள்ளது.
இது குறித்து கர்நாடக மாநில மாசுக்கட்டுப்பாட்டு வாரியத்தின் உறுப்பினர் செயலாளர் லிங்கராஜு, கூறுகையில், “பிக் பாஸ் பற்றியோ அல்லது வேறு எதைப் பற்றியோ வாரியத்திற்கு எதுவும் தெரியாது. வேல்ஸ் ஸ்டுடியோவில் நீர் மற்றும் காற்று சட்டத்தின் கீழ் உள்ள விதிகளின்படி செயல்படுவதற்கு அவர்களிடம் உண்மையான ஒப்புதல் இல்லை. இந்தக் காரணத்திற்காகவும், சில விதிமுறைகளை மீறுவதாலும் மூடல் உத்தரவு பிறப்பிக்கப்பட்டது.
அவர்கள் பொழுதுபோக்கு பூங்காக்களை நடத்துகிறார்கள். தினமும் 250,000 லிட்டர் கழிவுநீரை சுத்திகரிக்க வடிவமைக்கப்பட்ட கழிவுநீர் சுத்திகரிப்பு நிலையம் செயல்பாட்டில் இல்லை, மேலும் சில திடக்கழிவு மேலாண்மை விதிமுறைகளின்படி இல்லை.
எந்தவொரு தொழிற்துறையையோ அல்லது எந்தவொரு செயல்பாட்டையோ நடத்துவதற்கு அடிப்படை ஆவணமான ஒப்புதல் கூட அவர்களிடம் இல்லை. ஒப்புதலுக்கு அதற்காக அவர்கள் விண்ணப்பிக்கவில்லை, நாங்கள் பலமுறை அறிவிப்புகள் விடுத்தும், அவர்கள் அதைச் செய்யவில்லை என்று கூறினார்.
பிக் பாஸ் போட்டியாளர்கள் அந்த இடத்தை விட்டு வெளியேறிவிட்டனர்.அனைத்து போட்டியாளர்களும் இரவில் வீட்டிலிருந்து வெளியேற்றப்பட்டு ஈகிள்டன் ரிசார்ட்டுக்கு மாற்றப்பட்டுள்ளனர்.
