மயிலாடுதுறை மாவட்டம், தேரெழுந்தூர் வேதபுரீஸ்வரர் கோவிலில் உள்ள பழமையான கல்வெட்டுகளை படியெடுக்கும் பணியில், மத்திய தொல்லியல் துறை ஈடுபட்டுள்ளது.
மயிலாடுதுறை மாவட்டம் தேரெழுந்தூரில், பழமையான வேதபுரீஸ்வரர் எனும் சிவன் கோவில் உள்ளது. இங்கு, நிறைய கல்வெட்டுகள் உள்ளன.
மத்திய தொல்லியல் துறையின் தென்மாநில கல்வெட்டு பிரிவு இயக்குநர் முனிரத்தினம், கல்வெட்டாய்வாளர் நாகராஜன் உள்ளிட்ட குழுவினரிடம், படியெடுத்து ஆவணப்படுத்த உத்தரவிட்டார். தற்போது அப்பணி நடக்கிறது.
உதவி கல்வெட்டு நிபுணர் நாகராஜன் தலைமையிலான குழு, காத்தவராயன் மற்றும் மணிகண்டன் ஆகியோரின் உதவியுடன், 12 நாட்கள் நீடித்த பயிற்சியின் போது கோயிலிலிருந்து 10 கல்வெட்டுகளை நகலெடுத்தது. ‘அர்த்தமண்டபம்’ மற்றும் ‘மகாமண்டபம்’ கதவிலும் கல்வெட்டுகள் காணப்பட்டது.
இரண்டு கல்வெட்டுகள் முதலாம் குலோத்துங்க சோழனின் 34 மற்றும் 44வது ஆட்சி ஆண்டுகளைச் சேர்ந்தவை.
உதவி கல்வெட்டு நிபுணர் நாகராஜன் கூறுகையில், மயிலாடுதுறை மாவட்டம், குத்தாலம் ஒன்றியம், தேரெழுந்தூரில் உள்ள, வேதபுரீஸ்வரர் கோவில் அர்த்தமண்டபத்தின் கதவு துாண் உள்ளிட்ட இடங்களில், 10 கல்வெட்டுகளை படியெடுத்துள்ளோம்.
அதில் ஒரு கல்வெட்டு, குலோத்துங்க சோழனின் 44வது ஆட்சியாண்டில் பொறிக்கப்பட்டுள்ளது. அதாவது, 1114ல் பொறிக்கப்பட்டது. இதன்படி, இந்த ஊர், ‘திருவழுந்துார்’ என முற்காலத்தில் இருந்ததை அறிய முடிகிறது.
இந்த கோவிலுக்கு, நந்தா விளக்குகள் மற்றும் இரவு சந்தி விளக்கு என, ஐந்து விளக்குகளை, மாதம் ஒருவர் என, ஐந்து பேர் ஏற்ற வேண்டும் என்பதற்காக, கவினியன் வாமன் சிறிலங்கோவியன் என்பவர், கவினியன் வாமன் நாராயணன், செய்யிரிய சித்திரன், பரதாயன் கேரளன், நாராயணன், கரநாட்டான், திருவழுந்துாருடையான் தாநாட்டார் அணியளந்தார் நின்றான் எனும் ஆயிரத்தெழுநுாற்றுவ தாநாட்டான் ஆகிய சிவ பிராமணர்களுக்கு, பொற்காசுகளை தானமாக வழங்கிய தகவல் உள்ளது. மற்ற கல்வெட்டுகளை ஆராயும் பணி நடக்கிறது என்று கூறினார்.
மூன்றாம் குலோத்துங்க சோழனின் ஆட்சிக் காலத்தைச் சேர்ந்த, ‘மகாமண்டபத்தின்’ ‘ஜகதி’, ‘குமுதம்’, ‘பட்டிகை’ கல்வெட்டுகளில், ‘திருமஞ்சனத்திற்கு’ நன்கொடைகள் அளித்ததையும், தவறு செய்பவர்களுக்கு அபராதம் விதிக்கப்பட்டதையும் பதிவு செய்துள்ளதாக கூறினார்.
மற்றுமொரு கல்வெட்டு, இரண்டாம் இராஜராஜன் காலத்திலிருந்தே, ‘நந்தவிளக்கு’ கொளுத்துவதற்கு நன்கொடைகளைப் பதிவு செய்கிறது. கட்டிடக்கலை அம்சங்களின் அடிப்படையில், இந்த கோயில் பேரரச சோழர்களின் ஆரம்ப காலத்தைச் சேர்ந்தது என்று கூறினார்.
