குமாரபாளையத்தில், காவல் துணை கண்காணிப்பாளர் அலுவலகம் அமைக்க கோரி, அப்பகுதியைச் சேர்ந்த அனைத்துக்கட்சி மற்றும் பொது நல அமைப்புகள் சார்பில், நாமக்கல் மாவட்ட ஆட்சியர் அலுவலகம் முன்பு கோரிக்கை ஆர்ப்பாட்டம் நடைபெற்றது.
நாமக்கல் மாவட்டம் குமாரபாளையம் பலவேறு தொழில் நிறுவனங்கள் நிறைந்த பகுதியாகும். தாலுகா ஆபீஸ், நீதிமன்றங்கள் உள்ளிட்ட பல்வேறு அரசு துறை அலுவலகங்கள் அங்கு செயல்பட்டு வருகின்றன.
இந்நிலையில், குமாரபாளையத்தில் காவல் உட்கோட்ட அலுவலகம் அமைப்பதற்காக கடந்த மார்ச் மாதம் நடைபெற்ற சட்டசபைக் கூட்டத் தொடரில், அத்தொகுதி எம்எல்ஏ தங்கமணி கேள்வி எழுப்பினார். இதையொட்டி, தமிழ்நாடு அரசால், காவல் உட்கோட்ட அலுவலகம் அமைக்க அரசு உத்தரவு பிறப்பித்தது.
இதனடிப்படையில், குமாரபாளையம் பகுதியில் போதிய காவல் நிலையங்கள் மற்றும் காவல் ஆய்வாளர்கள் இல்லாததை நிரப்பும் வகையில், பேட்டை பகுதியில் ஒரு காவல் நிலையமும் அதற்கு அலுவலர்களும் நியமிக்கப்பட்டனர். ஒரு காவல்நிலையத்தின் உதவி துணை ஆய்வாளர் பணியிடத்தை, காவல் ஆய்வாளர் பணி இடமாக தகுதி உயர்த்தி அறிவிக்கப்பட்டது.
இந்த நிலையில், குமாரபாளையம் பகுதியை காவல் உட்கோட்டமாக பிரிக்காமல் பள்ளிபாளையம் உட்கோட்டமாக பிரிக்கப்பதற்கு எதிர்ப்பு தெரிவித்து, குமாரபாளையத்தை சேர்ந்த அனைத்து கட்சியினர், பொதுநல அமைப்பினர் ஏற்கனவே மாவட்ட ஆட்சியர், மேற்கு மண்டல ஐஜி, மாவட்ட எஸ்.பி., ஈரோடு எம்.பி., குமாரபாளையம் எம்எல்ஏ உள்ளிட்டோருக்கு கோரிக்கை மனு அளித்துள்ளனர்.
இந்த நிலையில் இதுகுறித்து, இதுவரை எந்தவித நடவடிக்கையும் எடுக்கப்படாததால், தமிழக அரசின் கவனத்தை ஈர்க்கும் வகையில், குமாரபாளையம் பகுதியைச் சேர்ந்த அனைத்துக் கட்சியினர் மற்றும் பொதுநல அமைப்பினர், நாமக்கல் ஆட்சியர் அலுவலகம் முன்பு கோரிக்கை விளக்க ஆர்ப்பாட்டத்தில் ஈடுபட்டனர்.
அதிமுகவின் ஒருங்கிணைப்பு குழு மாவட்ட செயலாளர் நாகராஜன் தலைமையில் நடைபெற்ற இந்த ஆர்ப்பாட்டத்தில், குமாரபாளையம் பகுதியைச் சேர்ந்த திரளானவர்கள் கலந்துகொண்டு, குமாரபாளையத்தில் போலீஸ் டிஎஸ்பி ஆபீஸ் அமைக்க கோரி கோஷங்களை எழுப்பினர்.
