ஈரானின் அணுசக்தி திட்டம் தொடர்பாக அமெரிக்க ஜனாதிபதி டொனால்ட் டிரம்ப் கடுமையான நிலைப்பாட்டை எடுத்துள்ளார். யுரேனியம் செறிவூட்டலை முழுமையாகத் தடைசெய்யும் புதிய ஒப்பந்தத்தை அவர் வலியுறுத்துகிறார். ஆனால், பேச்சுவார்த்தைகளில் முன்னேற்றம் ஏற்படாததால், அமெரிக்கா இராணுவ ரீதியான அழுத்தத்தை வழங்கத் தொடங்கியுள்ளது.
“ஈரானிய பாதுகாப்பு வசதிகள் அல்லது தலைவர்களைக் குறிவைத்து தாக்குதல் நடத்தவும், தேவைப்பட்டால் ஆட்சி மாற்றத்தைத் தொடரவும் இராணுவம் தயாராக உள்ளது,” என்று அமெரிக்க அதிகாரிகள் எச்சரித்துள்ளனர்.
ஈரானுடனான அணுசக்தி ஒப்பந்த பேச்சுவார்த்தைகளில் ஏற்பட்டுள்ள தேக்கநிலை மற்றும் அதிகரித்து வரும் மோதல் சூழலுக்கு மத்தியில், மத்திய கிழக்கு பிராந்தியத்தில் அமெரிக்கா தனது இராணுவ பலத்தை முன்னெப்போதும் இல்லாத வகையில் குவித்து வருகிறது. போர் விமானங்கள், வெடிமருந்துகள் மற்றும் வீரர்களை ஏற்றிச் செல்லும் நூற்றுக்கணக்கான விமானங்கள் அட்லாண்டிக் கடலைக் கடந்து இடைவிடாது பயணிப்பதை ஒரு “வான் பாலம்” என்றே பாதுகாப்பு நிபுணர்கள் வர்ணிக்கின்றனர்.
விண்ணை ஆக்கிரமிக்கும் போர் விமானங்கள்
விமான கண்காணிப்பு தரவுகளின்படி, அமெரிக்காவிலிருந்து ஐரோப்பா வழியாக மத்திய கிழக்கு நோக்கி இராணுவ விமானங்களின் தொடர்ச்சியான ஓட்டம் காணப்படுகிறது. இதில் பல்வேறு வகையான அதிநவீன போர் விமானங்கள் களமிறக்கப்பட்டுள்ளன:
F-16 ஃபைட்டிங் ஃபால்கன்கள் ஜெர்மனியின் ஸ்பாங்டாஹ்லெம், இத்தாலியின் அவியானோ மற்றும் தென் கரோலினாவின் மெக்என்டைர் தளங்களிலிருந்து புறப்பட்டுள்ளன.
F-15E ஸ்ட்ரைக் ஈகிள்ஸ் இங்கிலாந்தின் லேகன்ஹீத் தளத்திலிருந்து அனுப்பப்பட்டுள்ளன.
F-22 ராப்டர்கள் வர்ஜீனியாவின் ஜாயிண்ட் பேஸ் லாங்லி-யூஸ்டிஸிலிருந்து அதிநவீன ஸ்டெல்த் விமானங்கள் நகர்த்தப்பட்டுள்ளன.
முன்னதாக ஈரானிய அணுசக்தி தளங்களைக் குறிவைத்து நடத்தப்பட்ட ‘ஆபரேஷன் மிட்நைட் ஹேமர்’ போன்ற ரகசிய நடவடிக்கைகளில் இந்த விமானங்கள் பங்கேற்றது குறிப்பிடத்தக்கது.
தாக்குதல் விமானங்களுக்குப் பின்னால் ஒரு பெரிய ஆதரவுப் படையும் இயங்குகிறது. வான்வழி கண்காணிப்பு மற்றும் தகவல் தொடர்புகளை உறுதிப்படுத்த பின்வரும் விமானங்கள் நிறுத்தப்பட்டுள்ளன:
RC-135 Rivet Joint: உளவுத் தகவல்களைச் சேகரிக்க இவை கிரேக்க தீவான கிரீட்டிற்கு மாற்றப்பட்டுள்ளன.
P-8 Poseidon: கடல்சார் ரோந்துப் பணிகளுக்காக இவை பணியமர்த்தப்பட்டுள்ளன.
எரிபொருள் நிரப்பும் விமானங்கள்: போர் விமானங்கள் நீண்ட தூரம் இடைநில்லாமல் பறக்க வான்வழியில் எரிபொருள் நிரப்பும் விமானங்கள் தயார் நிலையில் உள்ளன. வான்வழித் தாக்குதல்களுக்கு வலுசேர்க்கும் விதமாக, அமெரிக்கக் கடற்படையும் தனது இருப்பை அதிகரித்துள்ளது.
USS ஆபிரகாம் லிங்கன் F-35C மற்றும் EA-18 போர் விமானங்களுடன் அரபிக் கடலில் நிலைகொண்டுள்ளது. உலகின் மிகப்பெரிய விமானம் தாங்கி கப்பலான USS ஜெரால்ட் ஆர் ஃபோர்டு, கிழக்கு மத்தியதரைக் கடலை நோக்கி நகர்ந்து வருகிறது.
மறுபுறம், தங்கள் மீது நடத்தப்படும் எந்தவொரு தாக்குதலுக்கும் மிகக் கடுமையான பதிலடி கொடுக்கப்படும் என்று ஈரான் எச்சரித்துள்ளது. இந்த “வான் பாலம்” அமைப்பு, மத்திய கிழக்கில் ஒரு பெரிய அளவிலான போர் வெடிக்கக்கூடும் என்ற அச்சத்தை உலக நாடுகளிடையே ஏற்படுத்தியுள்ளது.
