இந்தியப் பெருங்கடலில் இலங்கை கடற்பரப்பிற்கு அருகே ஈரானிய போர்க்கப்பல் மீது அமெரிக்க நீர்மூழ்கிக் கப்பல் நடத்திய ஏவுகணைத் தாக்குதலில் குறைந்தது 80 பேர் கொல்லப்பட்டதாகத் தகவல்கள் வெளியாகியுள்ளன.
ஈரானின் ‘ஐரிஸ் டெனா’ என்ற போர்க்கப்பல் மீது இந்தத் தாக்குதல் நடத்தப்பட்டுள்ளது. சில வாரங்களுக்கு முன்பு இந்தியாவில் நடைபெற்ற கடற்படைப் பயிற்சியில் பங்கேற்றுவிட்டுத் திரும்பிக் கொண்டிருந்தபோது, இந்தத் தாக்குதல் நடந்ததாகக் கூறப்படுகிறது. அமெரிக்க நீர்மூழ்கிக் கப்பலில் இருந்து ஏவப்பட்ட டார்பிடோ ரக ஏவுகணை தாக்கியதில் ஈரானிய கப்பல் கடலில் மூழ்கியது.
இந்தத் தாக்குதலை அமெரிக்க பாதுகாப்புச் செயலர் பீட் ஹெக்செத் உறுதிப்படுத்தியுள்ளார். இது குறித்து அவர் கூறுகையில், “சர்வதேச கடற்பரப்பில் தங்களுக்குப் பாதுகாப்பு இருப்பதாக நினைத்த ஈரானிய போர்க்கப்பலை அமெரிக்க நீர்மூழ்கிக் கப்பல் வெற்றிகரமாகத் தாக்கி அழித்துள்ளது. இது அமெரிக்காவின் வலிமையையும், உலகளாவிய எட்டையும் நிரூபிக்கிறது” என்று தெரிவித்துள்ளார். இரண்டாம் உலகப் போருக்குப் பிறகு அமெரிக்க நீர்மூழ்கிக் கப்பல் ஒன்றால் எதிரிக் கப்பல் ஒன்று மூழ்கடிக்கப்படுவது இதுவே முதல் முறை என்றும் பென்டகன் தரப்பில் கூறப்படுகிறது.
இலங்கை கடற்படையினர் இந்தத் தாக்குதல் நடந்த பகுதியில் மீட்புப் பணிகளில் ஈடுபட்டுள்ளனர். இதுவரை சில உடல்கள் மீட்கப்பட்டுள்ளதாகவும், 32 பேர் உயிருடன் மீட்கப்பட்டுள்ளதாகவும் இலங்கை வெளியுறவுத் துறை அமைச்சகம் தெரிவித்துள்ளது. பாதிக்கப்பட்ட கப்பலில் மொத்தம் 180 பேர் இருந்ததாகத் தெரியவந்துள்ளது. மாயமான மற்றவர்களைத் தேடும் பணி தீவிரமாக நடைபெற்று வருகிறது.
ஈரான் மற்றும் இஸ்ரேல் இடையே நிலவி வரும் போர் பதற்றத்திற்கு மத்தியில், அமெரிக்காவின் இந்த நேரடித் தாக்குதல் மத்திய கிழக்கு மற்றும் தெற்காசிய பிராந்தியத்தில் பெரும் பரபரப்பை ஏற்படுத்தியுள்ளது. இந்தத் தாக்குதலுக்கு ஈரான் கடுமையான பதிலடி கொடுக்கக்கூடும் என்பதால் உலக நாடுகள் கவலையடைந்துள்ளன.
இதற்கிடையில், மத்திய கிழக்கு நாடுகளின் மோதல் தீவிரமடைந்துள்ளதால் இந்திய அரசு நிலைமையைக் கண்காணிக்க ஒரு கட்டுப்பாட்டு அறையையும் அமைத்துள்ளது.
