கத்தாரில் உள்ள உலகின் மிக முக்கியமான இயற்கை எரிவாயு தளம் மற்றும் குவைத்தின் இரண்டு எண்ணெய் சுத்திகரிப்பு நிலையங்கள் மீது ஈரான் நடத்திய தாக்குதலைத் தொடர்ந்து, சர்வதேச சந்தையில் கச்சா எண்ணெய் மற்றும் இயற்கை எரிவாயு விலைகள் விண்ணைத் தொட்டன.
உலகின் மொத்த இயற்கை எரிவாயு தேவையில் ஐந்தில் ஒரு பகுதியை பூர்த்தி செய்யும் கத்தாரின் ராஸ் லஃபான் முனையம் மீது ஈரான் ட்ரோன் தாக்குதல் நடத்தியது. இத்தாக்குதலால் அந்த ஆலை தற்காலிகமாக மூடப்பட்டுள்ளது. இது தவிர, குவைத்தில் உள்ள இரண்டு முக்கிய எண்ணெய் சுத்திகரிப்பு நிலையங்களும் இலக்கு வைக்கப்பட்டுள்ளன.
ஏற்கனவே ஹார்முஸ் ஜலசந்தி வழியாகக் கப்பல் போக்குவரத்து முடங்கியுள்ள நிலையில், இந்த நேரடித் தாக்குதல்கள் எரிசக்தி நெருக்கடியை மேலும் தீவிரப்படுத்தியுள்ளன. எண்ணெய் மற்றும் எரிவாயு உற்பத்தியில் நீண்டகால பாதிப்புகள் ஏற்படக்கூடும் என்ற அச்சம் முதலீட்டாளர்களிடையே எழுந்துள்ளது.
சர்வதேச அளவுகோலான பிரெண்ட் கச்சா எண்ணெய் விலை ஒரு பேரல் 114 அமெரிக்க டாலராக உயர்ந்துள்ளது. போர் தொடங்குவதற்கு முன்பு இது 73 டாலருக்கும் குறைவாக இருந்தது குறிப்பிடத்தக்கது. ஐரோப்பிய சந்தையில் இயற்கை எரிவாயுவின் விலை நேற்று ஒரே நாளில் 24 சதவீதம் அதிகரித்துள்ளது.
கத்தார் உலகின் 20 சதவீத எல்என்ஜியை கப்பல்கள் மூலம் விநியோகம் செய்கிறது. தற்போது ராஸ் லஃபான் தளம் மூடப்பட்டதாலும், ஹார்முஸ் ஜலசந்தி வழியாகக் கப்பல்கள் செல்ல முடியாததாலும், உற்பத்தி செய்யப்பட்ட எரிவாயுவை வெளிநாடுகளுக்கு அனுப்ப முடியாத சூழல் உருவாகியுள்ளது.
இந்தத் தாக்குதல்கள் உலக நாடுகளின் எரிசக்தி பாதுகாப்பிற்குப் பெரும் சவாலாக மாறியுள்ளன. இதனால் வரும் நாட்களில் பெட்ரோல், டீசல் மற்றும் மின்சாரக் கட்டணங்கள் உலகளவில் அதிகரிக்கக்கூடும் என எதிர்பார்க்கப்படுகிறது.
