நாமக்கல், ராசிபுரம், சேந்தமங்கலம் ஆகிய 3 சட்டசபைத் தொகுதிகளில் போட்டியிடும் திமுக வேட்பாளர்களை, மாவட்ட திமுக செயலாளர் ராஜேஷ்குமார், எம்.பி., கூட்டணி நிர்வாகிகளுக்கு அறிமுகம் செய்து வைத்தார்.
நாமக்கல் கிழக்கு மாவட்ட திமுக மற்றும் கூட்டணி கட்சி நிர்வாகிகள் ஆலோசனைக் கூட்டம், மாவட்ட திமுக அலுவலகத்தில் நடைபெற்றது. மாவட்ட திமுக அவைத்தலைவர் மணிமாறன் தலைமை வகித்தார்.
தொகுதி பொறுப்பாளர்கள் நன்னியூர் ராஜேந்திரன், முனைவர் ஜான், நாமக்கல் கொமதேக எம்.பி., மாதேஸ்வரன் மற்றும் கூட்டணிக் கட்சி நிர்வாகிகள் முன்னிலை வகித்தனர்.
கூட்டத்தில் நாமக்கல் கிழக்கு மாவட்ட திமுக செயலாளர், ராஜேஷ்குமார், எம்.பி., நிகழ்ச்சியில் கலந்துகொண்டு, திமுக வேட்பாளர்கள் ராசிபுரம் தொகுதி டாக்டர் மதிவேந்தன், சேந்தமங்கலம் தொகுதி பூமலர், நாமக்கல் தொகுதி ராணி ஆகியோரை அறிமுகம் செய்து பேசியதாவது:
நடைபெற உள்ள சட்டசபைத் தேர்தலில் நாமக்கல் கிழக்கு மாவட்டத்திற்குட்பட்ட 3 தொகுதிகளிலும், பெரும்பான்மை வாக்குகள் வித்தியாசத்தில் திமுக வேட்பாளர்களை வெற்றி பெறச் செய்ய வேண்டும். இதற்காக திமுக, கூட்டணிக் கட்சி நிர்வாகிகள், தொண்டர்கள் அனைவரும் ஒன்றிணைந்து தீவிரமாக செயல்பட வேண்டும்.
குறிப்பாக கிராமப்புறங்களில், மகளிர் அணியினர் வீடு வீடாகச் சென்று அரசின் திட்டங்களை எடுத்துக்கூறி திண்ணை பிரச்சாரத்தில் ஈடுபட வேண்டும். மேலும் புதிய வாக்காளர்களிடம் அரசின் பல்வேறு நலத்திட்டங்களை எடுத்துரைத்து ஆதரவு பெற வேண்டும்.
ஒன்றிய, நகர, பேரூராட்சி பகுதிகளில் உள்ள நிர்வாகிகள் அனைவரும் ஒற்றுமையுடன் செயல்பட்டு 3 வேட்பாளர்களும் மாபெரும் வெற்றியடையச் செய்ய வேண்டும் என கேட்டுக் கொண்டார்.
கூட்டத்தில் காங்கிரஸ், கொமதேக, விசிக, சிபிஐ, சிபிஐ (எம்), தேமுதிக, இந்திய யூனியன் முஸ்லிம் லீக் உள்ளிட்ட கூட்டணி கட்சி நிர்வாகிகள், திமுக நிர்வாகிகள் உள்ளிட்டோர் கலந்துகொண்டனர்.
