மத்திய அரசின் எம்.பி., தொகுதி மறு வரையறை சட்டத்திற்கு எதிர்ப்பு தெரிவித்து, தமிழக முதல்வர் ஸ்டாலின் நாமக்கல்லில் கருப்புக்கொடி ஏற்றி, சட்ட நகலை எரித்து, மத்திய அரசுக்கு எதிராக ஆர்பாட்டத்தில் ஈடுபட்டார்.
மத்திய அரசு பார்லி.யில் கொண்டுவந்துள்ள, மக்களவை தொகுதிகளை அதிகரிக்கும் மறு வரையறை சட்டத் திருத்தம் தமிழ்நாட்டுக்கும், தென் மாநிலங்களுக்கும் இழைக்கப்படும் அநீதி என திமுக தலைவரும், தமிழக முதல்வருமான ஸ்டாலின் தொடர்ந்து எதிர்ப்பு தெரிவித்து வருகிறார்.
இன்று தமிழ்நாடு முழுவதும் திமுகவினரும், பொதுமக்கள் தங்கள் வீடுகளில் கருப்புக்கொடி ஏற்றி மத்திய அரசுக்கு எதிர்ப்பு தெரிவிக்க வேண்டும் என அவர் வேண்டுகோள் விடுத்திருந்தார்.
சட்டசபை தேர்தல் பிரச்சாரத்திற்காக புதன்கிழமை இரவு நாமக்கல் வந்த ஸ்டாலின், நாமக்கல்லில் உள்ள தனியார் ஹோட்டலில் ஓய்வெடுத்தார். இன்று காலை நாமக்கல், நல்லிபாளையத்தில், கட்சி உறுப்பினர் ஒருவரின் வீட்டு முன்பு அவர் மத்திய அரசின் எம்.பி., தொகுதி மறுவரையரை சட்டத்தை எதிர்த்து கருப்புக்கொடியேற்றினார்.
பின்னர் அந்த சட்ட நகலை அவர் தீ வைத்து எரித்தார். தொடர்ந்து மத்திய அரசுக்கு எதிராக கோஷங்களை எழுப்பி அவர் கண்டன ஆர்ப்பாட்டம் நடத்தினார். கிழக்கு மாவட்ட திமுக செயலாளர் ராஜேஷ்குமார், எம்.பி., அமைச்சர் மதிவேந்தன், எம்எல்ஏ ராமலிங்கம், நாமக்கல் தொகுதி திமுக வேட்பாளர் ராணி உள்ளிட்டோர் ஆர்ப்பாட்டத்தில் கலந்துகொண்டு கோஷங்களை எழுப்பினர்.
தொடர்ந்து வாக்கிங் சென்ற முதல்வர் ஸ்டாலின், நாமக்கல் உழவர் சந்தைக்கு வருகை புரிந்து அங்குள்ள விவசாயிகள், பொதுமக்களிடம் அவர் திமுக வேட்பாளர் ராணியை ஆதரித்து வாக்கு சேகரித்தார். விவசாயிகள் தங்களுடைய பிரச்சினைகள், குறைகளை முதல்வரிடம் கூறினர்.
தற்போது கடும் வெயில் நிலவுவதால் உழவர் சந்தை முழுவதும் மேற்கூரை அமைக்க வேண்டும் என உழவர்கள் கோரிக்கை விடுத்தனர். தொடர்ந்து மக்களுடன் கைகளை குலுக்கி ஆதரவு கோரி, உதயசூரியனுக்கு வாக்களிக்க வேண்டும் என வாக்கு சேரித்தார். பின்னர் அவர் தங்கியிருந்த ஓட்டலுக்கு புறப்பட்டுச் சென்றார்.
