திருவண்ணாமலை அண்ணாமலையார் கோவிலில் சித்திரை வசந்த உற்சவ விழா நிறைவு பெறுவதை ஒட்டி நடைபெற்ற மன்மத தகனத்தில், ஏராளமான பக்தர்கள் சாமி தரிசனம் செய்தனர்.
பஞ்சபூத ஸ்தலங்களில் அக்னி தலமாகவும், நினைக்க முக்தித்தரும் திருத்தலமாகவும் திகழும் அண்ணாமலையார் கோயிலில், ஆண்டுதோறும் சித்திரை மாதத்தில் தொடர்ந்து 10 நாட்கள் நடைபெறும் சித்திரை வசந்த உற்சவம் மிகவும் சிறப்புமிக்கது.
அதன்படி, சித்திரை வசந்த உற்சவம் கடந்த 19ம் தேதி கோயில் மூன்றாம் பிரகாரத்தில் அமைந்துள்ள சம்மந்த விநாயகர் சன்னதி முன்பு பந்தக்கால் முகூர்த்தத்துடன் விமரிசையாக தொடங்கியது. அப்போது, சுவாமிக்கும் அம்மனுக்கும் சிறப்பு அலங்காரம், பூஜைகள் நடந்தது.
விழாவின் தொடர்ச்சியாக, கடந்த 20ம் தேதி முதல் தினமும் அண்ணாமலையாருக்கும் உண்ணாமுலையம்மனுக்கும் சிறப்பு அலங்காரம், அபிஷேகம் மற்றும் சேடி பெண்கள் சுவாமிக்கு பூச்சொரிதல் நிகழ்ச்சியும் நடைபெற்றது.
மேலும், தினமும் இரவு நேரத்தில் சுவாமிக்கு மண்டகபடியும் செலுத்தப்பட்டது. விழாவின் நிறைவாக, ஐயங்குளத்தில் சுவாமி தீர்த்தவாரி நேற்று நடைபெற்றது. அப்போது, அலங்கார ரூபத்தில் அண்ணாமலையார், பராசக்தி அம்மன் அலங்கார ரூபத்தில் எழுந்தருளி பக்தர்களுக்கு அருள் பாலித்தனர். அதைத்தொடர்ந்து, நேற்று இரவு கோபால விநாயகர் கோயிலில் மண்டகபடியும் நடந்தது. மேலும், அண்ணாமலையார் கோயில் மூன்றாம் பிரகாதத்தில் மன்மத தகனம் நிகழ்ச்சி நேற்று இரவு 11 மணி அளவில் நடந்தது.
மன்மதனை எரித்த மகேசன்:
இதனைத் தொடர்ந்து திருக்கோவிலுக்குள் வந்த அண்ணாமலையார் உண்ணாமுலை அம்மன் தங்கக் கொடிமரம் அருகே உள்ள சபா மண்டபத்தில் எழுந்தருளினர். இதனைத் தொடர்ந்து அண்ணாமலையார் ஆழ்ந்த தியானத்தில் சென்று விட்டார். அப்போது உலகம் முழுக்க உள்ள அனைத்து ஜீவராசிகளும் சிருஷ்டி அடையும் விதமாக மன்மதன் அண்ணாமலையார் மீது பானம் தொடுத்த நேரத்தில் அண்ணாமலையார் தியானம் கலைந்து எதிரே இருந்த மன்மதனை தீப்பிழம்பால் சுட்டு அழித்தார். இந்த நிகழ்வையே மன்மத தகனம் என்று அழைப்பர். இந்த நிகழ்வில் ஏராளமான பக்தர்கள் கலந்துகொண்டு சாமி தரிசனம் செய்தனர்.
சிவாலயங்களில் மன்மத தகனம் நடைபெறும் சிறப்பு திருவண்ணாமலை கோயிலுக்கு மட்டுமே உண்டு என்பது குறிப்பிடத்தக்கது.
