தமிழ்நாடு அரசியலில் மதுராந்தகம் (தனி) மற்றும் தாராபுரம் (தனி) ஆகிய இரு சட்டமன்றத் தொகுதிகளுக்கான இடைத்தேர்தல் அக்டோபர் 6 அன்று நடைபெறவுள்ளது. முதலமைச்சர் ஜோசப் விஜய்யின் சுமார் ஐந்து மாத கால தவெக அரசுக்கு இது முதல் இடைத்தேர்தல் களம்.
எதிர்க்கட்சிகள் நாலாபுறமும் சூழ்ந்துள்ள சூழலில், ஐந்து முனைப் போட்டியாக உருவெடுத்துள்ள இந்தத் தேர்தல் களம், ஆளும் தவெகவுக்கே கணித ரீதியாக சாதகமாக மாறியுள்ளது.
வரலாற்று ரீதியாக ஒரு சட்டமன்றத் தொகுதி காலியாவது என்பது உறுப்பினரின் மறைவு, நீதித்துறைத் தகுதிநீக்கம் அல்லது தவிர்க்க முடியாத சூழ்நிலைகளால் நிகழக்கூடியது. ஆனால், இந்த இரண்டு தொகுதிகளிலும் அரசியல் லாபங்களுக்காக செயற்கையாகவே இடைத்தேர்தல் உருவாக்கப்பட்டுள்ளது.
கடந்த சட்டமன்ற தேர்தலில் மதுராந்தகம் தொகுதியில் அதிமுக சார்பில் போட்டியிட்டு வெற்றி பெற்ற கே. மரகதம் குமரவேல், தாராபுரம் தொகுதியில், அதிமுக சார்பில் வெற்றி பெற்ற பி. சத்தியபாமா இருவரும் சட்டமன்ற உறுப்பினர்களாகப் பதவியேற்ற சில நாட்களிலேயே, மே 25 அன்று தங்கள் பதவிகளை ராஜினாமா செய்துவிட்டு தவெகவில் இணைந்தனர். தேர்தல் முடிந்து சில நாட்களிலேயே மீண்டும் மக்களிடம் சென்று அதே வேட்பாளர்களை விசில் சின்னத்தில் நிறுத்தியுள்ளது தவெக.
பொதுமக்களின் வரிப்பணத்தில் பல கோடிகளை வீணடித்து நடத்தப்படும் இந்த இடைத்தேர்தல் குறித்து சென்னை உயர்நீதிமன்றமும் கடும் கண்டனம் தெரிவித்துள்ளது. “எம்.எல்.ஏக்கள் பதவி விலகி உடனடியாக வேறு சின்னத்தில் போட்டியிடுவது ஜனநாயகத்தைக் கேலிக்கூத்தாக்குவதுடன் வாக்காளர்களை அவமதிக்கும் செயலாகும்” என நீதிபதிகள் கவலை தெரிவித்தனர்.
ஐந்து முனைப் போட்டியின் வாக்குக் கணிதம்
ஒரு தொகுதியில் வாக்குகள் ஐந்து வழிகளில் சிதறும்போது, வெற்றிபெறுவதற்கான வாக்குகளின் சதவீதம் 28% முதல் 32% வரை குறைகிறது. எதிர்க்கட்சிகள் தங்களுக்குள் வாக்குகளைப் பிரித்துக் கொள்ளும்போது, ஆளும் கட்சி தனது நிலையான வாக்கு வங்கியைக் காப்பாற்றினாலே போதுமானது.
சென்ற தேர்தலில் கட்சிகள் பெற்ற வாக்குகள்
மதுராந்தகம் (தனி): அதிமுக: 69,284, தவெக: 62,090, திமுக: 59,838
தாராபுரம் (தனி): அதிமுக: 81,100, திமுக: 64,373, தவெக: 46,438
இந்த இடைத்தேர்தலில் எதிர்க்கட்சிகள் ஒன்று திரண்டு போட்டியிடாமல் தனித்தனியாகக் களம் காண்பது ஆளுங்கட்சிக்கு மேலும் பாதையை எளிதாக்கியுள்ளது.
- கடந்த பல ஆண்டுகளாக வலுவான கூட்டணி அமைத்துப் போட்டியிட்ட திமுக, இம்முறை காங்கிரஸ், விசிக, முஸ்லிம் லீக் போன்ற தோழமைக் கட்சிகள் தவெகவின் கூட்டணியில் இணைந்ததால் தனித்து களம் காண்கிறது.
- துரோகத்திற்குப் பாடம் புகட்டுவோம் என எடப்பாடி பழனிசாமி பிரச்சாரம் செய்தாலும், பாமக நடுநிலை வகிப்பது வட மாவட்டப் பகுதியான மதுராந்தகத்தில் பின்னடைவாகப் பார்க்கப்படுகிறது.
- சிபிஎம் மற்றும் சிபிஐ கட்சிகள் முறையே மதுராந்தகம், தாராபுரத்தில் தனித்துப் போட்டியிடுகின்றன. தவெகவின் குதிரை பேரத்தைக் கண்டிக்கும் இடதுசாரிகள், அதேவேளையில் அரசுக்கு அளித்து வரும் வெளியார் ஆதரவை வாபஸ் பெறவில்லை.
- சீமானின் நாம் தமிழர் கட்சி களம் காண்பதால், ஆட்சிக்கு எதிரான இளைஞர்கள் மற்றும் நடுநிலை வாக்காளர்களின் வாக்குகள் பிரியும்.
பொதுவாக இடைத்தேர்தல்கள் ஆளும் அரசின் மீதான மதிப்பீடாகப் பார்க்கப்படும். ஆனால், இந்த ஐந்து முனைப் போட்டியில் எதிர்க்கட்சிகளின் பிளவு, தவெக வேட்பாளர்களின் வெற்றி வாய்ப்பை எளிதாக்கியுள்ளது.
அக்டோபர் 6-ல் வாக்காளர்கள் அளிக்கும் தீர்ப்பு எதுவாக இருப்பினும், சில மாதங்களுக்கு முன் வாக்களித்துத் தேர்ந்தெடுத்த பிரதிநிதிகளின் அரசியல் நகர்வுகளுக்காக மீண்டும் வரிசையில் நிற்கும் நிலைக்கே சராசரி குடிமகன் தள்ளப்பட்டுள்ளான்.
