நாமக்கல் மாவட்டத்தில், விநாயகர் சதுர்த்தி விழா, கோலாகலமாக கொண்டாடப்பட்டது. ஏராளமான பக்தர்கள் உற்சாகமாக விநாயகரை வழிபட்டனர்.
இந்தியா முழுவதும் விநாயர் சதுர்த்தி விழா மிகவும் உற்சாகமாக கொண்டாடப்பட்டு வருகிறது. தமிழகத்தில் ஆண்டுதோறும், ஆவணி மாதம் வளர்பிறை சதுர்த்தி நாளன்று இவ்விழா கொண்டாடப்படுகிறது. இந்த நாள், பொதுவாக விநாயகரின் பிறந்தநாளாக கொண்டாடப்படுகிறது.
இவ்விழா, 1655ல், மராட்டிய மன்னன் சத்ரபதி சிவாஜி ஆட்சிக் காலத்திலேயே நடத்தப்பட்டுள்ளது. தற்போதும் மகாராஷ்டிராவில் வீடு தோறும் விநாயகரை அலங்கரித்து வைத்து, இந்த விழாவை குடும்ப விழாவாக கொண்டாடி வருகின்றனர்.
நாமக்கல் மாவட்டத்தில், நாமக்கல், ராசிபுரம், சேந்தமங்கலம், மோகனூர், ப.வேலூர், திருச்செங்கோடு, குமாரபாளையம் உள்ளிட்ட பகுதிகளில், கிராமங்கள் மற்றும் நகரங்கள் தோறும், பந்தல்கள் அமைத்து, மேடையில் விநாயகர் சிலைகளை பிரதிஷ்டை செய்து, சதுர்த்தி விழாவை உற்சாகமாக கொண்டாடி வருகின்றனர்.
நாமக்கல் ஆஞ்சநேயர் கோவில் வளாகத்தில் உள்ள விநாயகருக்கு, அதிகாலையிலேயே சிறப்பு அபிஷேகம் நடந்தது. ஏராளமான பக்தர்கள் கலந்துகொண்டு சுவாமிக்கு எருக்கம்பூ மாலை, அருகம்புல் மாலை அணிவித்து வழிபட்டனர்.
நாமக்கல் சந்தைபேட்டை புதூர் செல்வவிநாயகர் கோயிலில், விநாயகருக்கு பிரமாண்டமாக தசாவதார அலங்காரம் செய்யப்பட்டு, விநாயகர் சயனக் கோலத்தில் பக்தர்களுக்கு காட்சி அளித்தார். சிறப்பு பூஜைகள் நடத்தப்பட்டு பக்தர்களுக்கு பிரசாதம் வழங்கப்பட்டது.
நாமக்கல் மெயின் ரோட்டில் உள்ள செங்கழநீர் பிள்ளையார் கோயில், சேலம் ரோட்டில் உள்ள மாயம்பிள்ளையார் கோயில், திருச்செங்கோடு ரோட்டில் உள்ள மாப்பிள்ளை விநாயகர் கோயில், கணேசபுரம் பிள்ளையார் கோவில், மோகனூர் ரோடு, டீச்சர்ஸ் காலனி கல்வி விநாயகர் கோயில், அன்பு நகர் விநாயகர் கோயில், முல்லை நகர் செல்வகணபதி கோயில், அழகு நகர் சக்தி கணபதி கோயில் உள்ளிட்ட அனைத்து விநாயகர் கோயில்களிலும், விநாயகருக்கு சிறப்பு அபிஷேகம் மற்றும் அலங்காரம் நடைபெற்றது.
ஏராளமான பக்தர்கள் விழாவில் கலந்துகொண்டு சுவாமி தரிசனம் செய்தினர். பக்தர்கள் அனைவருக்கும் பிரசாதம் மற்றும் அன்னதானம் வழங்கப்பட்டது.
