அரசு அலுவலர்களின் உயிர், உடமைகளை பாதுகாக்கவும், தாக்குதல் நடக்கும் பட்சத்தில் குற்றவாளிகளுக்கு கடும் தண்டனை வழங்கவும் சிறப்பு பணி பாதுகாப்பு சட்டத்தை தமிழக அரசு இயற்ற வேண்டும் என, வருவாய் துறை சங்கங்களின் கூட்டமைப்பு மாநாட்டில் தீர்மானம் நிறைவேற்றப்பட்டது.
வருவாய் துறை சங்கங்களின் கூட்டமைப்பின், நாமக்கல் மாவட்ட மையம் சார்பில், மாவட்ட கோரிக்கை மாநாடு நடைபெற்றது. சங்க நிர்வாகிகள் ஆனந்தன், லட்சுமி நரசிம்மன் ஆகியோர் தலைமை வகித்தனர்.
கூட்டமைப்பு நிர்வாகிகள் பாலசுப்ரமணியன், செந்தில்குமார், செங்கமலை ஆகியோர் முன்னிலை வகித்தனர். மாவட்ட நிர்வாகிகள் பிரகாஷ், தமிழ்செல்வன், சரவணன் ஆகியோர் சிறப்பு அழைப்பாளர்களாக பங்கேற்று, கோரிக்கை குறித்து விளக்கி பேசினர்.
மாநாட்டில் நிறைவேற்றப்பட்ட தீர்மானங்கள்:
- வருவாய் மற்றும் பேரிடர் மேலாண் துறை, நில அளவைத்துறையில் பணியாற்றிவரும் அனைத்து நிலையிலான அலுவலர்களின் உயிர் மற்றும் உடமைகளை பாதுகாக்கவும், தாக்குதல் நடக்கும் பட்சத்தில், குற்றவாளிகளுக்கு கடுமையான தண்டனைகள் வழங்கவும், சிறப்பு பணி பாதுகாப்பு சட்டத்தை, தமிழக அரசு உடனடியாக இயற்ற வேண்டும்.
- பொதுமக்களுக்கு தேவைவான பணிகளை மேலும் சிறப்பாக செய்திட, வருவாய் மற்றும் பேரிடர் மேலாண் துறையில், காலியாக உள்ள அனைத்து நிலையிலான பணியிடங்களையும், காலமுறை ஊதியத்தில் நிரப்ப வேண்டும்.
- அலுவலர்களின் பணித்தன்மை மற்றும் பணிப்பளுவை கருத்தில் கொண்டு, மேம்படுத்தப்பட்ட ஊதியம் மற்றும் தனி ஊதியம் வழங்க வேண்டும். குறிப்பாக கிராம உதவியாளர்களுக்கு வரையறுக்கப்பட்ட காலமுறை ஊதியம் வழங்க வேண்டும்.
- அரசு பணியின்போது உயிரிழக்கும் அரசு ஊழியர்களின் குடும்பத்தின் வரிய சூழல் மற்றும் வாழ்வாதரத்தை கருத்தில் கொண்டு, கருணை அடிப்படை பணி நியமனத்திற்கு உச்சவரம்பு, 5 சதவீதம் என குறைக்கப்பட்டுள்ளது, அதை ரத்து செய்து, ஏற்கனவே இருந்ததைப் போல், 25 சதவீதமாக நிர்ணயம் செய்ய வேண்டும்.
- பணியில் மரணமடையும் கிராம உதவியாளர்களின் வாரிசுகளுக்கு, கல்வி தகுதி அடிப்படையில் உரிய பணியிடம் வழங்க வேண்டும்
என்பவை உள்பட பல்வேறு தீர்மானங்கள் நிறைவேற்றப்பட்டது.
