நாமக்கல்லில் நடைபெற்ற சுதந்திர தின விழாவில், மாவட்ட ஆட்சியர் துர்காமூர்த்தி தேசியக்கொடியை ஏற்றி வைத்து, பயனாளிகளுக்கு நலத்திட்ட உதவிகளை வழங்கினார்.
நாமக்கல் மாவட்ட நிர்வாகத்தின் சார்பில், மாவட்ட விளையாட்டுத்திடலில் சுதந்திர தினவிழா நடைபெற்றது. மாவட்ட ஆட்சியர் துர்காமூர்த்தி தேசியக் கொடியினை ஏற்றி வைத்து மரியாதை செலுத்தினார்.
தொடர்ந்து, திறந்த ஜீப்பில் சென்று, போலீசாரின் அணிவகுப்பு மரியாதையை ஏற்றுக் கொண்டார். பின்னர், மாவட்ட ஆட்சியர் துர்காமூர்த்தி, காவல் கண்காணிப்பாளர் விமலா ஆகியோர் வெண்புறாக்களையும், வண்ண பலூன்களையும் வானில் பறக்க விட்டனர்.
சுதந்திர போராட்ட வீரர்களின் தியாகத்தை போற்றும் வகையில் அவர்களின் வாரிசுதாரர்களுக்கு கதர் ஆடை அணிவித்து பரிசுகளை வழங்கினார்.
தொடர்ந்து விழாவில் மாற்றுத்திறனாளிகள் துறை, கூட்டுறவுத்துறை, கால்நடைபராமரிப்புத்துறை உள்ளிட்ட பல்வேறு அரசு துறைகளின் சார்பில் மொத்தம் 15 பயனாளிகளுக்கு ரூ. 35.32 லட்சம் மதிப்பில் அரசு நலத்திட்ட உதவிகளை மாவட்ட ஆட்சியர் வழங்கினார்.
மாவட்டத்தில், சிறப்பாக பணியாற்றிய 35 போலீசார், 253 அரசு துறை அலுவலர்கள் மற்றும் பணியாளர்கள் என மொத்தம் 288 பேருக்கு பாராட்டு சான்றிதழ்களை வழங்கினார்.
விழாவில், திருச்செங்கோடு அரசு மகளிர் மேல்நிலைப்பள்ளி, நாமக்கல் ஸ்ரீசைதன்யா டெக்னோ பள்ளி, தொ.ஜேடர்பாளையம் அரசு மேல்நிலைப்பள்ளி, குமாரபாளையம் எஸ்.எஸ்.எம். லட்சுமி அம்மாள் மெட்ரிக் மேல்நிலைப்பள்ளி, பாச்சல் அரசு மேல்நிலைப்பள்ளி, எருமப்பட்டி ஸ்ரீ விவேகானந்தா வித்யாலயா மெட்ரிக் மேல்நிலைப்பள்ளி என மொத்தம் 6 அரசு மற்றும் தனியார் பள்ளிகளை சேர்ந்த 640 மாணவ, மாணவிகள் பங்கு பெற்ற வண்ணமிகு கலைநிகழ்ச்சிகள் நடைபெற்றன.
கலைநிகழ்ச்சிகளில் பங்கு பெற்ற பள்ளி மாணவ, மாணவிகளுக்கு மாவட்ட ஆட்சியர் பரிசு மற்றும் சான்றிதழ்களை வழங்கினார்.
விழாவில் மாவட்ட வன அலுவலர் மாதவி யாதவ்., டிஆர்ஓ சுமன், திருச்செங்கோடு உதவி ஆட்சியர் அங்கித்குமார் ஜெயின், டிஆர்டிஓ திட்ட இயக்குநர் வடிவேல், கூட்டுறவு சங்கங்கள் இணை பதிவாளர் அருளரசு, நாமக்கல் ஆர்டிஓ சாந்தி உள்ளிட்ட பலர் கலந்துகொண்டனர்.
