தடை செய்யப்பட்ட பிளாஸ்டிக் பொருட்களை பயன்படுத்தினால் கடும் நடவடிக்கை எடுக்கப்படும் என மாவட்ட ஆட்சியர்எச்சரிக்கை விடுத்துள்ளார்.
நாமக்கல் ஆட்சியர் அலுவலகத்தில் வருகிற விழா காலங்களில் தடை செய்யப்பட்ட பிளாஸ்டிக் பொருட்கள் பயன்பாட்டினை தடுத்தல் குறித்த ஆய்வுக் கூட்டம் நடைபெற்றது.
கூட்டத்திற்கு தலைமை வகித்து மாவட்ட ஆட்சியர் துர்காமூர்த்தி பேசியதாவது:
தமிழகத்தில் 2019ம் ஆண்டு முதல், ஒரு முறை பயன்படுத்தப்பட்டு தூக்கி எறியப்படும் பிளாஸ்டிக் பொருட்களை தடை செய்து தமிழ்நாடு அரசு தடை செய்துள்ளது. நாமக்கல்லில் மாவட்ட அளவிலான சிறப்பு பணிக்குழு அமைக்கப்பட்டு, தமிழ்நாடு மாசு கட்டுப்பாடு வாரியம் மற்றும் உள்ளாட்சி அமைப்புகள் மூலம் தொடர்ந்து கண்காணிக்கப்பட்டு நடவடிக்கை எடுக்கப்பட்டு வருகிறது.
தமிழ்நாடு முதலமைச்சர், ஒவ்வொரு மாதமும் 4-வது சனிக்கிழமை தமிழ்நாடு முழுவதும் உள்ள உள்ளாட்சி அமைப்புகள் மற்றும் தமிழ்நாடு மாசு கட்டுப்பாடு வாரியம் இணைந்து பிளாஸ்டிக் பொருட்களை சேகரித்து அகற்றுதல், பிளாஸ்டிக் பொருட்களால் ஏற்படும் சுகாதாரக்கேடுகள் மற்றும் அதற்கு மாற்றாக பயன்படுத்த வேண்டிய பொருட்கள் குறித்து தீவிர விழிப்புணர்வு முகாம் நடத்திட உத்தரவிட்டுள்ளார்.
இதையொட்டி நாமக்கல் மாவட்டத்தில் இந்த முகாம்கள் தொடர்ந்து நடத்தப்பட்டு வருகிறது. குமாரபாளையத்தில் வருகின்ற நாளை 27 அன்று மாபொரும் பிளாஸ்டிக் ஒழிப்பு விழிப்புணர்வு பேரணி மற்றும் முகாம் நடைபெறவுள்ளது.
மேலும், பொது மக்கள் அனைவரும் எதிர்வரும் விழாக் காலங்கள் உட்பட, அனைத்து நாட்களிலும் ஒரு முறை பயன்படுத்தப்பட்டு தூக்கி எறியப்படும், தடை செய்யப்பட்ட பிளாஸ்டிக் பொருட்களை பயன்படுத்த கூடாது. அவற்றிற்கு பதிலாக சுற்றுச்சூழலுக்கு உகந்த, மாற்றுப்பொருட்களான மஞ்சப்பை போன்றவற்றை பயன்படுத்தலாம்.
தடை செய்யப்பட்ட பிளாஸ்டிக் பொருட்கள் பயன்படுத்துவது கண்டறியப்பட்டால் அரசின் விதிமுறைகளுக்கு உட்பட்டு அபராதம் விதிக்கப்படுவதோடு, கடுமையான நடவடிக்கை மேற்கொள்ளப்படும் என கூறினார்.
