நாமக்கல் மாவட்டத்தில் தொழிலாளர் நல வாரியம் மூலம் 14 பெண்கள் ஆட்டோ மற்றும் டாக்சி வாங்கி சுய தொழில் புரிந்திட ரூ. 14 லட்சம் மானியம் வழங்கப்பட்டுள்ளது.
இது குறித்து மாவட்ட ஆட்சியர் துர்கா மூர்த்தி வெளியிட்டுள்ள செய்திக்குறிப்பில் கூறியுள்ளதாவது: நாமக்கல் மாவட்டத்தில், தொழிலாளர் நலன் மற்றும் திறன் மேம்பாட்டுத் துறையின், சமூக பாதுகாப்புத் திட்டத்தின் மூலம் தமிழ்நாடு கட்டுமானம் மற்றும் உடலுழைப்புத் தொழிலாளர்கள் சமூக பாதுகாப்பு நலவாரியம் உட்பட 20 வாரியங்களில் சுமார் 93,688 தொழிலாளர்கள் உறுப்பினர்களாக பதிவு செய்துள்ளனர்.
அவர்களுக்கு கல்வி, திருமணம், மகப்பேறு, ஓய்வூதியம் உள்ளிட்ட பல்வேறு உதவித்தொகை தமிழக அரசால் வழங்கப்பட்டு வருகிறது. நாமக்கல் மாவட்டத்தில், தொழிலாளர் நலத்துறையின் சமூக பாதுகாப்புத் திட்டத்தின் கீழ், தமிழ்நாடு அமைப்புசாரா டிரைவர்கள் மற்றும் ஆட்டோமெபைல் வாகனங்கள் பழுதுபார்க்கும் தொழிலாளர்கள் நல வாரியத்தில் பதிவு பெற்ற பெண் மற்றும் திருநங்கை டிரைவர்களுக்கு சொந்தமாக புதிய ஆட்டோ ரிக்சா மற்றும் டாக்சி வாங்க தலா ரூ. 1 லட்சம் மானியம் வழங்கப்பட்டு வருகிறது.
அந்த வகையில் நாமக்கல் மாவட்டத்தில் 13 பெண் ஆட்டோ டிவைர்களுக்கு புதிய ஆட்டோ ரிக்சா வாங்குவதற்கும், ஒரு பெண் டாக்சி டிரைவருக்கு டாக்சி வாங்குவதற்கும் என 14 பெண்களுக்கு தலா ரூ. 1 லட்சம் வீதம் மொத்தம் ரூ. 14 லட்சம் அரசு மானியம் வழங்கப்பட்டுள்ளது.
மானிய உதவி பெற்று புதிய ஆட்டோ வாங்கி ஓட்டிக்கொண்டிருக்கு, திருச்செங்கோடு பகுதியைச் சேர்ந்த பிரேமா கூறியதாவது: எனது கணவர் கடந்த 8 ஆண்டுகளுக்கு முன்பு இறந்து விட்டார். எனக்கு ஒரு மகன் மற்றும் ஒரு மகள் உள்ளனர். எனது குழந்தைகளின் எதிர்காலத்தை கருத்தில் கொண்டு, சொந்தமாக தொழில் தொடங்க வேண்டும் என்ற எண்ணத்தில், ஆட்டோ ஓட்டி லைசென்ஸ் பெற்றேன்.
பின்னர், நலவாரியத்தில் பதிவு பெற்ற பெண் டிரைவர்களுக்கு மானியம் வழங்கப்படுவதை தெரிந்து, உறுப்பினராக சேர்ந்தேன். தற்போது எனக்கு ஆட்டோ வாங்குவதற்கு மானியமாக ரூ. 1 லட்சம் வழங்கியுள்ளனர். புதிய ஆட்டோ வாங்கி நானே ஓட்டி வருகிறேன். இதன்மூலம் நாளொன்றுக்கு சுமார் ரூ. 700 வரை வருமானம் ஈட்டி வருகிறேன் என்று கூறினார்.
