தேர்தல் ஆணையத்தின் பார்வையாளர்கள் முன்னிலையில், நாமக்கல் மாவட்டத்தில் தேர்தல் பணியில் ஈடுபட உள்ள அதிகாரிகளுக்கான ஆலோசனைக் கூட்டம், மாவட்ட ஆட்சியர் அலுவலகத்தில் நடைபெற்றது.
மாவட்ட தேர்தல் அலுவலரும், ஆட்சியருமான துர்கா மூர்த்தி தலைமை வகித்தார். தேர்தல் கமிஷன் நியமித்துள்ள ராசிபுரம், சேந்தமங்கலம் தொகுதி தேர்தல் பொதுப்பார்வையாளர் அன்கித்குமார் அகர்வால், செலவின பார்வையாளர் பிரதீப், நாமக்கல், பரமத்தி வேலூர் தொகுதி பொதுப்பார்வையாளர் மனோஜ் புஷப், நாமக்கல் தொகுதி செலவின பார்வையாளர் முகேஷ் கட்டாரியா, ப.வேலூர், திருச்செங்கோடு தொகுதி செலவின பார்வையாளர் ரோஹித்குமார், திருச்செங்கோடு, குமாரபாளையம் தொகுதி பொதுப்பார்வையாளர் லாலாசாஹிப் யாதவ், குமாரபாளையம் தொகுதி செலவின பார்வையாளர் புத்தி பிரகாகாஷ் மற்றும் 6 சட்டசபை தொகுதிகளுக்கான தேர்தல் போலீஸ் பார்வையாளர் மயூர் குலாப்ராவ் பாட்டில் ஆகியோர் முன்னிலை வகித்தனர்.
தொடர்ந்து, மாவட்ட ஆட்சியர் தலைமையில் தேர்தல் பார்வையாளர்கள் மாவட்ட ஆட்சியர் அலுவலகத்தில் அமைக்கப்பட்டுள்ள 24 மணி நேரமும் செயல்படும் ஊடக சான்றளிப்பு மற்றும் கண்காணிப்பு மையத்தில், டிவிக்கள் மூலம் தேர்தல் தொடர்பான நிகழ்வுகள் கண்காணிக்கப்பட்டு வருவதையும், தேர்தல் கட்டுப்பாட்டு அறையில் தேர்தல் தொடர்பான புகார்கள் பதிவு செய்யப்பட்டு வருவதையும், மேலும் ஜிபிஎஸ் கருவி பொருத்தப்பட்ட பறக்கும் படை, நிலையான கண்காணிப்பு குழு மற்றும் வீடியோ கண்காணிப்பு குழு வாகனங்களின் செயல்பாட்டினை கண்காணிக்கும் பணிகளையும் பார்வையிட்டு, ஆய்வு மேற்கொண்டனர்.
பின்னர், மாவட்ட ஆட்சியர் அலுவலக வளாகத்தில் 100 சதவீத வாக்குப்பதிவை வலியுறுத்தி வரையப்பட்ட விழிப்புணர்வு கோலத்தை அவர்கள் பார்வையிட்டனர். தேர்தல் விழிப்புணர்வு செல்ஃபி ஸ்டாண்டில் அவர்கள் போட்டோ எடுத்துக்கொண்டனர்.
கூட்டத்தில் மாவட்ட எஸ்.பி., விமலா, மாவட்ட வன அலுவலர் மாதவி யாதவ், டிஆர்ஓக்கள் சரவணன், கண்ணன் உள்ளிட்ட அனைத்து தேர்தல் அலுவலர்கள், பொறுப்பு அலுவலர்கள் கலந்துகொண்டனர்.
