கொங்கு மண்டலத்தில் அதிமுகவின் அசைக்க முடியாத கோட்டையாகத் திகழும் அவிநாசி (தனி) சட்டமன்றத் தொகுதியை, வரும் 2026 தேர்தலில் பாஜகவிற்கு அதிமுக தலைமை விட்டுக்கொடுத்துள்ளது. இந்த முடிவால் முன்னாள் சபாநாயகர் தனபால் மற்றும் உள்ளூர் அதிமுக தொண்டர்கள் கடும் அதிர்ச்சியில் உள்ளனர்.
1980 முதல் 2021 வரை நடந்த தேர்தல்களில், ஒருமுறை தவிர மற்ற அனைத்து முறையும் அதிமுகவே இங்கு வெற்றி வாகை சூடியுள்ளது. கடந்த 2021 தேர்தலில் அதிமுக சார்பில் போட்டியிட்ட முன்னாள் சபாநாயகர் தனபால், சுமார் 50,000 வாக்குகள் வித்தியாசத்தில் பிரம்மாண்ட வெற்றி பெற்றார். இத்தகைய செல்வாக்கு மிக்க தொகுதியை கூட்டணிக் கட்சிக்கு ஒதுக்கியது அரசியல் வட்டாரத்தில் சலசலப்பை ஏற்படுத்தியுள்ளது.
நீலகிரி நாடாளுமன்றத் தொகுதிக்கு உட்பட்ட அவிநாசி சட்டமன்றப் பகுதியில், கடந்த 2024 மக்களவைத் தேர்தலின் போது பாஜக கணிசமான வாக்குகளைப் பெற்றது. அங்கு போட்டியிட்ட மத்திய அமைச்சர் எல். முருகன் வெற்றி பெறாவிட்டாலும், அவிநாசி பகுதியில் அவருக்குக் கிடைத்த ஆதரவு பாஜக மேலிடத்தை கவர்ந்தது.
எல். முருகன் எளிதாக சட்டமன்றத்திற்குள் நுழைய அவிநாசி ஒரு பாதுகாப்பான தளம் என்று கருதிய பாஜக தலைமை, இதற்காக எடப்பாடி பழனிசாமிக்கு அழுத்தம் கொடுத்ததாகத் தெரிகிறது.
74 வயதாகும் மூத்த தலைவர் தனபாலுக்கு வயது முதிர்வு காரணமாக இம்முறை ஓய்வு அளித்துவிட்டு, இளைஞர்களுக்கும் கூட்டணிக் கட்சியினருக்கும் வாய்ப்பளிக்க எடப்பாடி பழனிசாமி முடிவு செய்துள்ளார். இருப்பினும், பாஜகவின் தேசியத் தலைமையுடன் இணக்கமான உறவைப் பேணவே இத்தகைய ‘ரிஸ்க்’ எடுக்கப்பட்டுள்ளதாக அரசியல் விமர்சகர்கள் கருதுகின்றனர்.
“வெற்றி உறுதி செய்யப்பட்ட ஒரு தொகுதியை எதற்காகத் தாரை வார்க்க வேண்டும்?” என்று மேற்கு மண்டல அதிமுக தொண்டர்கள் கேள்வி எழுப்பி வருகின்றனர்.
தொகுதிப் பங்கீடு என்ற பெயரில் கோட்டையை விட்டுக்கொடுத்தது கட்சிக்கு பின்னடைவை ஏற்படுத்துமா என்பது தேர்தல் முடிவுகளில்தான் தெரியவரும்.
