மதுரை மாவட்டம் சோழவந்தான் பேருந்து நிலையத்திற்கு வந்து செல்லும் அணுகுசாலைகள் மிகவும் குறுகலாக இருப்பதால், பல்வேறு வழித்தடங்களில் இயக்கப்படும் பேருந்துகள் பேருந்து நிலையத்திற்குள் வர முடியாமல் வெளியேறும் நிலை ஏற்பட்டுள்ளதாகப் பொதுமக்களும் சமூக ஆர்வலர்களும் குற்றம்சாட்டியுள்ளனர்.
கருப்பட்டி, நாச்சிகுளம், நிலக்கோட்டை உள்ளிட்ட பல்வேறு பகுதிகளுக்குச் சென்று திரும்பும் பேருந்துகள் சோழவந்தான் பேருந்து நிலையத்தை அடையும்போது, அங்கிருந்து வெளியேறும் சாலை வசதி மிகவும் குறுகலாக இருப்பதால் ஓட்டுநர்கள் மிகுந்த சிரமத்திற்கு உள்ளாகின்றனர்.
குறிப்பாக ஒரே நேரத்தில் இரண்டு பேருந்துகள் சென்று வருவதற்குப் போதிய இடவசதி இல்லாத நிலை நீடிக்கிறது. இதனால் அண்ணா நிலையம், துவரிமான் வழியாகப் பெரியார் நிலையம் செல்லும் பேருந்துகள், நகரி வழித்தடப் பேருந்துகள், மதுரை ஆரப்பாளையம் பேருந்துகள் மற்றும் வாடிப்பட்டி செல்லும் பேருந்துகள் உள்ளிட்ட பல பேருந்துகள் பேருந்து நிலையத்திற்குள் நுழைவதைத் தவிர்த்து, இடையிலேயே பயணிகளை இறக்கிவிட்டு அந்தந்த பகுதிகளுக்குத் திரும்பிச் செல்கின்றன.
பேருந்து நிலையம் அமைக்கப்பட்டிருந்தும் பேருந்துகள் முழுமையாக உள்ளே வந்து செல்லாததால், சோழவந்தான் பேருந்து நிலையத்தையே முழுமையாக நம்பியிருக்கும் தொலைதூரப் பகுதி பயணிகள் கடுமையாகப் பாதிக்கப்பட்டுள்ளனர்.
பொதுமக்கள் மற்றும் சமூக ஆர்வலர்களின் கோரிக்கைகள்:
பேருந்துகள் தடையின்றி பேருந்து நிலையத்திற்குள் வந்து செல்லும் வகையில் உள்கட்டமைப்பை உடனடியாக மேம்படுத்த வேண்டும் என கோரிக்கைகள் வலுத்து வருகின்றன.
மேம்பாலத்தின் மறுபுறம் அமைந்துள்ள சர்வீஸ் சாலையைப் பேருந்துகள் எளிதாக இயங்குவதற்கு ஏற்ற வகையில் அகலப்படுத்த வேண்டும். சர்வீஸ் சாலை அகலப்படுத்தும் பணியை உடனடியாக மேற்கொள்ள இயலாவிட்டாலும், தற்போது பேருந்துகள் வெளியேறப் பயன்படுத்தப்படும் சாலையையாவது ஒரே நேரத்தில் இரண்டு பேருந்துகள் சென்று வரக்கூடிய வகையில் அகலப்படுத்த வேண்டும்.
அமைக்கப்பட்ட பேருந்து நிலையத்தைப் பயணிகள் முழுமையாகப் பயன்படுத்த முடியாத நிலை நீடிப்பது மிகுந்த ஏமாற்றத்தை அளிப்பதாகச் சமூக ஆர்வலர்கள் தெரிவிக்கின்றனர். எனவே, மாவட்ட நிர்வாகமும் தொடர்புடைய அதிகாரிகளும் உடனடியாகத் தலையிட்டு அணுகுசாலை பிரச்சனையைத் தீர்த்து, அனைத்து வழித்தடப் பேருந்துகளும் பேருந்து நிலையத்திற்குள் வந்து செல்லும் வகையில் உள்கட்டமைப்பை மேம்படுத்த வேண்டும் என்பதே அனைவரின் எதிர்பார்ப்பாகும்.
