கோவையில் தொழில்துறை மற்றும் கண்டுபிடிப்புகளுக்கு அடித்தளம் அமைத்த ஜி.டி. நாயுடு அவர்களின் வாழ்க்கை வரலாற்றை மையமாகக் கொண்டு வெளிவந்த திரைப்படம்.
ஜி.டி. நாயுடுவின் தொடக்க கால வாழ்க்கை, மோட்டார் சைக்கிள்கள் மற்றும் இயந்திரங்கள் மீதான தீராத ஆர்வம், முதல் இந்திய தயாரிப்பு மோட்டார் உருவாக்கம், ஜெர்மனி பயணம் மற்றும் ஹிட்லர் சந்திப்பு, பேருந்து சேவை என அவரது சாதனைகளையும், பிற்காலத்தில் அவர் எதிர்கொண்ட சட்டப் போராட்டங்களையும் இப்படம் பேசுகிறது.
இந்தியனாக, தமிழனாக, அறிவியல் மேதையாக இருந்த அவரது கண்டுபிடிப்புகளை கண்டுகொள்ளாமல், அங்கீகாரம் தராமல் செய்தது அரசாங்கம். தன் கண்டுபிடிப்புகளை வெளிநாடுகளுக்கு விற்றுவிடாத தன் தேசத்தின் மக்கள் மீதான பற்று, உலகப்புகழ் என்ற வெளிச்சம் அவர்மேல் படாமல் செய்துவிட்டன.
ஜி.டி. நாயுடுவின் வயதுக்கேற்ற உடல்மொழி, தோற்றம் மற்றும் உழைப்பில் மாதவனின் அர்ப்பணிப்புத் தன்மையை ஒவ்வொரு காட்சியிலும் காண முடிகிறது. துணை நடிகர்கள் சத்யராஜ், ஜெயராம் மற்றும் துஷாரா விஜயன் ஆகியோர் தங்களது கதாபாத்திரங்களுக்கு நியாயம் சேர்த்துள்ளனர். கோவிந்த் வசந்தாவின் பின்னணி இசை படத்திற்குத் தேவையான உணர்வைச் சேர்க்க முயன்றுள்ளது.
அரங்கம் அமைப்பு, காலகட்டத்தை கண்முன் நிறுத்திய விதம் மற்றும் கோயம்புத்தூரின் பழையத் தோற்றத்தை அருமையாகக் கொண்டு சேர்த்துள்ள ஒளிப்பதிவு பாராட்டுக்குரியது. செயற்கை நுண்ணறிவு தொழிற்நுட்பம் தழைத்தோங்கிய இன்றைய சூழலில் இன்னும் கொஞ்சம் கூடுதலான தரத்தில் கொண்டு வந்திருக்கலாம்.
பல வரலாற்று நிகழ்வுகளை அடுத்தடுத்து சொல்லிச் செல்லும்போது, ஒரு ஆவணப்படம் போன்ற பிரமையை உருவாக்கி விடுகிறது. கதையை சுருங்க சொல்ல வேண்டும் என்கிற திரைக்கதை சூத்திரத்தில் சிக்குண்டதால், உலகப் போர் காலம், தலைவர்களுடனான சந்திப்புகள் போன்றவற்றில் ஆழமான உணர்ச்சிப்பூர்வமான தருணங்களை கொண்டு வர இயலவில்லை. பயோ பிக் படத்தில் இப்படியான குறைகள் தவிர்க்க முடியாதவை.
ஜி.டி. நாயுடு போன்ற ஒரு மாபெரும் சாதனையாளரின் வாழ்க்கையைத் ஓரளவு தெரிந்துக் கொள்ள இப்படத்தை ஒரு முறை தாராளமாகப் பார்க்கலாம். திரைக்கதையில் இன்னும் கொஞ்சம் ஆழம் இருந்திருந்தால் இப்படம் ஒரு சிறந்த வரலாற்றுப் படமாக மாறியிருக்கும்.
கோவை திருப்பூர் தொழில் நகரங்களாக உருவாக ஜிடி அய்யாவின் விஞ்ஞான மற்றும் தொழில் வளர்ச்சிக்கு அய்யாவின் பங்கு அளப்பரியது. “ரேசன்ட் பிளேடு” கண்டுபிடிக்கப்பட்டதே ஒரு சுவாரஸ்யமான கதை. அதை மற்றொரு பதிவில் விரிவாக காண்போம்.
அடுத்த முறை ஊருக்கு செல்கிற போது, கோவை அவிநாசி சாலையில் இவரது கண்டுபிடிப்புகளுடன் கூடிய கண்காட்சி, அருங்காட்சியகத்தை பார்வையிட வேண்டும்.
இங்கிலாந்திலிருந்து சங்கர்
