தென்காசி நகரின் மிக முக்கிய நீராதாரமாக விளங்கும் சித்ரா நதி மாசடைவதைத் தடுத்து, அதனைப் பாதுகாக்க உடனடியாக உரிய நடவடிக்கை எடுக்க வலியுறுத்தி ‘வீ த லீடர்ஸ்’ இயக்கத்தின் சார்பில் தென்காசி மாவட்ட ஆட்சியர் ரஞ்ஜீத் சிங் அவர்களிடம் கோரிக்கை மனு அளிக்கப்பட்டது.
இந்தக் கோரிக்கை மனுவை இயக்கத்தின் நிர்வாகிகள் முத்துசெல்வம், செந்தில்குமரன், வழக்கறிஞர் கோபாலகிருஷ்ணன், ஐயப்பன், முத்துவேல், சுப்பிரமணியன், கண்ணன் மற்றும் கருப்பசாமி ஆகியோர் நேரில் சென்று ஆட்சியரிடம் வழங்கினர்.
அந்த மனுவில் குறிப்பிடப்பட்டுள்ள முக்கிய அம்சங்கள் வருமாறு:
தென்காசி நகர மக்களின் முக்கிய குடிநீர் மற்றும் வாழ்வாதார ஆதாரமாக சித்ரா நதி விளங்கி வருகிறது. இந்நிலையில், நகரின் யானைப்பாலம் பகுதியைத் தாண்டிய பிறகு, நகர்ப்பகுதிகளில் இருந்து வெளியேறும் கழிவுநீர் நேரடியாக இந்த ஆற்றில் கலப்பதால் நதிநீர் கடுமையாக மாசடைந்து வருகிறது. இதனால் ஆற்றுநீரைப் பயன்படுத்தி விவசாயம் செய்து வரும் சுற்றியுள்ள கிராமப் பகுதிகளும், விவசாய நிலங்களும் பெரிதும் பாதிக்கப்படும் அபாயகரமான நிலை உருவாகியுள்ளது.
யானைப்பாலம் படித்துறை பகுதியை முழுமையாகத் தூய்மைப்படுத்தி, அதனைத் தொடர்ந்து சுத்தமாகப் பராமரிக்கப் பஞ்சாயத்து/நகராட்சி நிர்வாகம் நடவடிக்கை எடுக்க வேண்டும்.
நகர்ப்பகுதிகளிலிருந்து ஆற்றில் கழிவுநீர் கலக்கும் அனைத்து இடங்களையும் கண்டறிந்து, சுத்திகரிக்கப்படாத கழிவுநீர் நேரடியாகச் சித்ரா நதியில் கலப்பதைத் தடுக்க நிரந்தரக் தீர்வை ஏற்படுத்த வேண்டும்.
வாய்க்கால்பாலம் பகுதியில் மருத்துவக் கழிவுகள் மற்றும் திடக்கழிவுகள் கொட்டப்படுவதைத் தடுக்க தடுப்பு வேலிகள் மற்றும் எச்சரிக்கைப் பலகைகளை அமைக்க வேண்டும்.
தென்காசி பஜார் உள்ளிட்ட முக்கியமான வணிகப் பகுதிகளில் போதுமான அளவிலான குப்பைத்தொட்டிகளை அமைத்து, கடைகளில் சேரும் குப்பைகளை முறையாகச் சேகரித்து உடனுக்குடன் அகற்ற வேண்டும்.
ஆற்றங்கரையோரம் அமைந்துள்ள உணவகங்கள், தங்கும் விடுதிகள் மற்றும் மருத்துவமனைகளின் கழிவுநீர் வெளியேற்றத்தை அதிகாரிகள் தீவிரமாக ஆய்வு செய்ய வேண்டும். சுத்திகரிக்கப்படாத கழிவுநீரை ஆற்றில் திறப்பவர்கள் மீது கடுமையான நடவடிக்கை எடுக்கப்பட வேண்டும்.
மேலும், நெகிழிப் பைகளின் பயன்பாட்டைக் கடுமையாகக் கட்டுப்படுத்துதல், சித்ரா நதிநீரின் தரத்தைத் தொடர்ச்சியாகப் பரிசோதித்துக் கண்காணித்தல் மற்றும் ஆற்றுப் பாதுகாப்பில் பொதுமக்களிடையே விழிப்புணர்வை ஏற்படுத்துதல் ஆகிய கோரிக்கைகளும் அந்த மனுவில் வலியுறுத்தப்பட்டுள்ளன.
மனுவைப் பெற்றுக்கொண்ட மாவட்ட ஆட்சியர், இதுகுறித்து சம்பந்தப்பட்ட துறை அதிகாரிகளுடன் கலந்தாலோசித்துத் தகுந்த நடவடிக்கை எடுக்கப்படும் என்று உறுதியளித்துள்ளார்.
