தேர்தலில் வெற்றி பெறுவதற்காக வேட்பாளா்கள் புதுவிதமான தந்திரங்களை கையாளுவது வழக்கம், பரோட்டா போடுவது, குளிர்பானங்கள் வழங்குவது, டீ போடுவது என வேட்பாளர்களை கவர்வதற்காக இவர்களது தேர்தல் தந்திரங்கள் கையாளுவது வழக்கமாக இருப்பதும் அதனை பொதுமக்கள் ரசிப்பதும் வழக்கமாக இருக்கிறது.
அந்த வகையில் திருவண்ணாமலை மாவட்டத்தில் உள்ள வேட்பாளர்கள் சற்று வித்தியாசமாக வாக்கு சேகரித்தனர்.
ஆரணி பஜாரில் கடை வியாபாரிகளிடம் பிரசாரம் மேற்கொண்ட அதிமுக வேட்பாளா் ஜெயசுதா அங்குள்ள போளி கடையில், போளி சுட்டு வாடிக்கையாளா்களுக்கு வழங்கி இரட்டை இலை சின்னத்திற்கு வாக்கு சேகரித்தாா். அவரது இந்த இனிமையான அணுகுமுறை சுற்றியுள்ளவா்களை சிந்திக்க வைத்தது.
செய்யாறு செய்யாறு தொகுதி வெம்பாக்கம் மேற்கு ஒன்றியத்துக்கு உள்பட்ட வயலூா், அழிவிடைத்தாங்கி, ஜம்போடை, பைரவபுரம் உள்ளிட்ட கிராமங்களில் செய்யாறு தொகுதியில் போட்டியிடும் அதிமுக வேட்பாளரும், திருவண்ணாமலை வடக்கு மாவட்டச் செயலருமான முக்கூா் என். சுப்பிரமணியன் மாட்டு வண்டி ஓட்டிச் சென்று இரட்டை இலை சின்னத்திற்கு தீவிரமாக வாக்கு சேகரித்தாா்.
முன்னதாக, அதிமுக வேட்பாளருக்கு அப்பகுதி பெண்கள் உற்சாகமாக வரவேற்பு அளித்தனா். அதனைத் தொடா்ந்து அதிமுக பொதுச் செயலா் அறிவித்த 297 வாக்குறுதிகள் அடங்கிய துண்டு பிரசுரங்களை கிராம மக்களிடம் வழங்கி பிரசாரம் செய்தாா்.
செய்யாறு தொகுதி வெம்பாக்கம் மேற்கு ஒன்றிய திமுக சாா்பில் அசனமாபேட்டை, பெருங்கட்டூா், பெருமாந்தாங்கல், வடமணப்பாக்கம், மேல்பூதேரி, தென்னம்பட்டு, பொக்கசமுத்திரம், நாட்டேரி, பிரம்மதேசம், பனமுகை, புலிவலம், சுனைப்பட்டு உள்ளிட்ட 40-க்கும் மேற்பட்ட கிராமங்களில் திமுக வேட்பாளா் ஒ.ஜோதி வாக்கு சேகரிப்பில் ஈடுபட்டாா். கொளுத்தும் வெயிலில் குளிா்பானம் தயாா் செய்து கிராம மக்களுக்கு வழங்கி திமுகவிற்கு வாக்கு சேகரித்தாா்.
வந்தவாசி கிழக்கு ஒன்றிய அதிமுகவுக்கு உள்பட்ட உளுந்தை கிராமத்தில் அதிமுக வேட்பாளா் பி.ராணி காலை பிரசாரத்தை தொடங்கினாா். அப்போது, அந்தக் கிராம விவசாய நிலத்தில் நெல் அறுவடை செய்து விவசாயிகளிடம் அவா் வாக்கு சேகரித்தாா்.
இதைத் தொடா்ந்து சாலவேடு, கீழ்க்கொடுங்காலூா், கீழ்பாக்கம், கீழ்நா்மா உள்ளிட்ட பல்வேறு கிராமங்களில் திறந்த வாகனத்தில் சென்றும், நடந்து சென்றும் அவா் வாக்கு சேகரித்தாா்.
