திருவண்ணாமலை அருகே இரிடியம் விற்பனை செய்வதாக கூறி பல்வேறு மாவட்டங்களை சேர்ந்தவர்களிடம் மோசடியில் ஈடுபட்டதாக கூறப்படும் கும்பலை தனிப்படை போலீசார் கைது செய்தனர்.
திருவண்ணாமலை மாவட்டம், கீழ்பென்னாத்தூர் காவல் நிலையத்திற்கு உட்பட்ட பகுதிகளில் பல கோடி ரூபாய் மதிப்பில் இரிடியம் வியாபாரம் நடைபெற்று வருவதாகக் கிடைத்த ரகசியத் தகவலின் அடிப்படையில், மாவட்ட காவல் கண்காணிப்பாளர் உதயகுமார் உத்தரவின் பேரில் தனிப்படை போலீசார் பல்வேறு இடங்களில் தீவிரமாகத் தேடுதல் வேட்டையில் ஈடுபட்டனர்.
அப்போது, அரசம்பட்டு கிராமத்தில் தனியாக உள்ள வீட்டில் வாடகைக்கு எடுத்து, தங்கியிருந்த 10 பேரை பிடித்து விசாரணை நடத்தினர். தொடர்ந்து 2 நாட்கள் நடைபெற்ற விசாரணையில், இரிடியம் விற்பனை மோசடியில் ஈடுபட்டது தெரியவந்தது.
சென்னை, காஞ்சிபுரம், மதுரை, பெங்களூரு உள்ளிட்ட பல்வேறு பகுதிகளைச் சேர்ந்த வியாபாரிகளை வரவழைத்து, பல கோடி ரூபாய் மதிப்பிலான இரிடியம் இருப்பதாகக் கூறி ஏமாற்றி வருவதாகவும் விசாரணையில் காவல் துறையினருக்கு தெரியவந்தது.
குறிப்பாக, காஞ்சிபுரம் மற்றும் மதுரை பகுதிகளைச் சேர்ந்த இடைத்தரகர்கள் அந்தக் கும்பலிடம் பணம் கொடுத்து இரிடியம் பெற்றுச் செல்வதற்காக வந்திருந்ததாகக் கூறப்படுகிறது. அப்போது காவல் துறையினர் அவர்களைச் சுற்றிவளைத்தனர்.
இதையடுத்து, கும்பலிடம் இருந்து இரண்டு பித்தளைச் சொம்புகள் மற்றும் இரண்டு பித்தளைக் குடங்கள் பறிமுதல் செய்யப்பட்டன. இதனை தொடர்ந்து, அவர்களிடம் பல்வேறு கட்டங்களாக விசாரணை நடத்தப்பட்டது.
இரிடியம் கும்பலிடம் நடத்தப்பட்ட முதல் கட்ட விசாரணையில், அவர்களிடம் இரிடியம் போன்ற எந்தப் பொருளும் இல்லை என்பது தெரியவந்ததாகக் கூறப்படுகிறது. பித்தளைச் சொம்புகள் மற்றும் குடங்களை பிரத்யேகமாகத் தயாரித்து, அவற்றை இரிடியம் எனக் கூறி விற்பனை செய்து வந்ததும் விசாரணையில் தெரியவந்ததாக காவல் துறையினர் தெரிவித்துள்ளனர்.
இதை நம்பி பலரிடம் இருந்து கோடிக்கணக்கில் பணம் பறித்திருக்கலாம் எனக் கூறப்படுகிறது. இதனால், இவர்களிடம் இதுவரை யார் யார் பணம் கொடுத்து ஏமாந்துள்ளனர்? யார் யார் இந்தப் பித்தளைச் சொம்புகள் மற்றும் குடங்களை இரிடியம் எனக் கூறி வாங்கிச் சென்றுள்ளனர்? இந்த மோசடியில் வேறு யாருக்கெல்லாம் தொடர்பு உள்ளது? என்பது உள்ளிட்ட பல்வேறு கோணங்களில் காவல் துறையினர் தீவிரமாக விசாரணை மேற்கொண்டு வருகின்றனர்.
