பள்ளி மாணவர்களை உடல் ரீதியாக துன்புறுத்துவது கண்டறியப்பட்டால், சம்பந்தப்பட்டவர்கள் மீது சட்டபூர்வமான நடவடிக்கை எடுக்கப்படும் என மாவட்ட முதன்மை கல்வி அலுவலர் எச்சரிக்கை விடுத்தார்.
நாமக்கல் மாவட்டத்தில் உள்ள தனியார் பள்ளி முதல்வர்கள் மற்றும் தலைமையாசிரியர்களுக்கான ஆய்வுக் கூட்டம், நாமக்கல் தெற்கு அரசு மேல்நிலைப் பள்ளியில் நடந்தது. டி.இ.ஓ., ஜோதி (தனியார் பள்ளிகள்) முன்னிலை வகித்தார்.
மாவட்ட முதன்மை கல்வி அலுவலர் எழிலரசி தலைமை வகித்து பேசியதாவது:
தமிழ் தாய் வாழ்த்து, தேசிய கீதம் ஆகியவற்றை மாணவர்களைக் கொண்டு இறைவணக்க கூட்டத்தில் பாட வைக்க வேண்டும். ஒலிபெருக்கி மூலம் மேற்கண்ட செயல்பாடுகளை செய்யக் கூடாது.
ஆசிரியர்கள் பாடம் நடத்தும்போது, கற்றல் கற்பித்தல் கல்வி உபகரணங்களை கொண்டு, மாணவர்களுக்கு பாடம் நடத்துவதை முதல்வர்கள் உறுதி செய்ய வேண்டும்.
அனைத்து பள்ளி வாகனங்களுக்கும், கட்டாயம் ஆண் மற்றும் பெண் உதவியாளர் ஒருவர் என, இரண்டு பேர் இருக்க வேண்டும். பழுதடைந்த வாகனங்களை எக்காரணத்தை கொண்டும் இயக்கி பள்ளி மாணவ, மாணவியரை பள்ளிக்கு அழைத்து வரக்கூடாது.
பள்ளியில் படிக்கும் எந்த ஒரு மாணவரையும், உடல் ரீதியாக எவ்வித துன்புறுத்தலும் ஆசிரியர்கள் மற்றும் முதல்வர்கள், பள்ளி நிர்வாகத்தினர் செய்யக்கூடாது. மாணவர்கள் உடல் ரீதியாக துன்புறுத்துவது கண்டறியப்பட்டால், சம்பந்தப்பட்ட நபர்கள் மீது சட்டபூர்வமான கடும் நடவடிக்கை எடுக்கப்படும்.
ஏற்கனவே தனியார் பள்ளிகள் இயக்குனரால் வழங்கப்பட்ட அறிக்கைபடி, பள்ளிகளில் கழிவறை தவிர மற்ற அனைத்து இடங்களிலும் கண்காணிப்பு கேமரா (சிசிடிவி) அவசியம் பொருத்த வேண்டும்.
அரசு பள்ளிகளில் பராமரிக்கப்படும் பதிவேடுகள் அனைத்தையும், தனியார் பள்ளிகளிலும் பராமரிக்க வேண்டும். மாணவ, மாணவியர் எடுத்து வரும் புத்தகப் பைகளில், ஏதாவது போதை தரும் பொருட்களை எடுத்து வருகின்றனரா என்பதை ஆசிரியர்கள் மற்றும் முதல்வர்கள் கண்காணிக்க வேண்டும். இவ்வாறு அவர் பேசினார்.
இந்த கூட்டத்தில் மாவட்ட போதை பொருள் தடுப்பு இயக்க ஒருங்கிணைப்பாளர் ராஜேஸ்கண்ணன், எமிஸ் மாவட்ட ஒருங்கிணைப்பாளர் சதீஷ்குமார், சுற்றுச்சூழல் ஒருங்கிணைப்பாளர் திருஞானம், தனியார் பள்ளிகள் கண்காணிப்பாளர் விவேக் உள்பட பலர் பங்கேற்றனர்.
