நாடு முழுவதும் நிலவி வரும் சமையல் எரிவாயு விநியோகத் தட்டுப்பாடு மற்றும் விலை உயர்வு குறித்து நாடாளுமன்றத்தில் விரிவான விவாதம் நடத்தப்பட வேண்டும் என்று காங்கிரஸ் எம்பி பிரியங்கா வலியுறுத்தியுள்ளார்.
விலைவாசி உயர்வு, வேலையில்லாத் திண்டாட்டம் மற்றும் தற்போது சிலிண்டர் விலையில் ஏற்பட்டுள்ள கூடுதல் சுமையை மக்கள் நீண்ட காலத்திற்கு பொறுத்துக்கொள்ள முடியாது என்று அவர் எச்சரித்துள்ளார்.
இது குறித்து பிரியங்கா கூறியதாவது: நாடாளுமன்றத்தில் விவாதம் நடத்துவதன் மூலம் முக்கியமான பொதுப் பிரச்சினைகளை முன்வைக்க முடியும். மத்திய அரசின் தவறான திட்டங்களும் கொள்கைகளுமே இந்த நெருக்கடிக்குக் காரணம். பொதுமக்கள் இன்னும் எவ்வளவு காலம் தான் பொறுத்துக்கொள்வார்கள்? விலைவாசி தொடர்ந்து உயர்ந்து வருகிறது, வேலையில்லாத் திண்டாட்டம் அதிகரித்துள்ளது. அரசின் கொள்கைகளால் தற்போது எல்பிஜி சிலிண்டர் தட்டுப்பாடும் ஏற்பட்டுள்ளது. பார்லியில் இது குறித்து விவாதம் நடந்திருந்தால், குறைந்தபட்சம் மக்கள் எதிர்கொள்ளும் முக்கியப் பிரச்சினைகளையாவது முன்வைத்திருக்க முடியும் என்றார்.
மேற்கு ஆசியாவில் நிலவி வரும் போர்ச் சூழலால் சர்வதேச அளவில் எரிசக்தி விநியோகம் பாதிக்கப்பட்டுள்ளது. இதன் விளைவாக, மத்திய அரசு அண்மையில் சமையல் எரிவாயு சிலிண்டர் விலையை 60 ரூபாய் உயர்த்தியது.
மேற்கு ஆசியப் போர் காரணமாக, ஹார்முஸ் ஜலசந்தி வழியாக இந்தியா பெற்று வந்த 30 சதவீத இயற்கை எரிவாயு விநியோகத்தில் சிக்கல் ஏற்பட்டுள்ளது. இதனால், மத்திய அரசு அத்தியாவசியப் பொருட்கள் சட்டத்தை அமல்படுத்தியுள்ளது. அதன்படி, வீட்டு உபயோக சிலிண்டர்களை அடுத்தடுத்து பதிவு செய்வதற்கு 25 நாட்கள் இடைவெளி கட்டாயமாக்கப்பட்டுள்ளது. வீடுகள், மருத்துவமனைகள் மற்றும் அத்தியாவசிய சேவைகளுக்கு 100 சதவீத விநியோகம் உறுதி செய்யப்பட்டுள்ளது. அதே சமயம், வணிக ரீதியிலான விநியோகத்திற்குக் கட்டுப்பாடுகள் விதிக்கப்பட்டுள்ளன.
இந்திய கம்யூனிஸ்ட் கட்சி எம்பி சந்தோஷ் குமார் உள்ளிட்ட பல எதிர்க்கட்சி எம்பிக்கள், இந்தத் தட்டுப்பாடு மக்களிடையே பெரும் பாதிப்பை ஏற்படுத்தியுள்ளதாகக் கூறி, மாநிலங்களவையில் விவாதம் நடத்த நோட்டீஸ் அளித்துள்ளனர்.
