லாரி உரிமையாளர்கள் சங்க பிரதிநிதிகளை தமிழக போக்குவரத்து அமைச்சர் அழைத்துப் பேசி, லாரித் தொழிலில் உள்ள பிரச்சினைகளை தீர்க்க வேண்டும் என கொமதேக வேண்டுகோள் விடுத்துள்ளது.
இது குறித்து கொங்குநாடு மக்கள் தேசிய கட்சி பொதுச் செயலாளர் ஈஸ்வரன் வெளியிட்டுள்ள அறிக்கையில் கூறியுள்ளதாவது: அகில இந்திய அளவில் சாலைப் போக்குவரத்து தொழிலில் நாமக்கல் மாவட்டம் முன்னோடியாக விளங்கி வருகிறது.
நாமக்கல், திருச்செங்கோடு மற்றும் சங்ககிரி பகுதியில் இத்தொழிலில் அதிகமானவர்கள் ஈடுபட்டு வருகின்றனர். நாமக்ககல் பகுதியில் இருந்து இந்தியா முழுவதற்கும் சரக்கு ஏற்றிச்செல்லும் லாரிகள், டிரெய்லர் லாரிகள் மற்றும் கேஸ் டேங்கர் லாரிகள் உள்ளிட்ட அனைத்து வகையான லாரிகளும் இயக்கப்படுகின்றன.
திருச்செங்கோடு ரிக் வாகனங்கள் உலகம் முழுவதும் இயங்கி வருகின்றன. தமிழகத்தின் பல்வேறு பகுதிகளிலும் லாரி தொழிலை நம்பி பல லட்சக்கணக்கான குடும்பங்கள் நேரடியாகவும், மறைமுகமாகவும் வாழ்ந்து வருகின்றனர். இத்தொழிலை நம்பி அரசு வங்கிகள், தனியார் வங்கிகள் மற்றும் ஏராளமான பைனான்ஸ் நிறுவனங்கள் லாரிகளுக்கு கடன் வழங்கி வருவாய் ஈட்டி வருகிறது.
லாரி தொழில் பிற தொழில்களை காட்டிலும் அரசுக்கு முன்கூட்டியே வரிகளை செலுத்தி அரசிற்கு வருமானத்தை தருகிற நிலையில் உள்ளது சமீபகலாமாக லாரி தொழிலில் உதிரிபாகங்கள் விலை உயர்வு, வளைகுடா போரின் காரணமாக டீசல் விலை உயர்வு, ஆன்லைன் வரிவிதிப்பு, காலாவதியான சுங்கச்சாவடி, நடைமுறையில் உள்ள சுங்கச்சாவடி, கட்டாய ஜிபிஎஸ் கருவி, 3எம் ஸ்டிக்கர் போன்ற அரசின் கெடுபிடிகளால் பாதிக்கப்பட்டுள்ளது.
மேலும் டிரைவர் பற்றாக்குறையாலும் இத்தொழில் பாதிப்படைந்துள்ளது. இன்றைய லாரி உரிமையாளர்களின் கோரிக்கையான எப்சி மற்றும் புதிய வாகனங்கள் பதிவு செய்யும் ஆர்சி உள்ளிட்ட ஆவணங்கள் தபால் வழியில் தருவதை தவிர்த்து முன்பு போல் நேரடியாக தர வேண்டும் என்பது உள்ளிட்ட கோரிக்கைகள் நீண்ட நாட்களாக இருந்து வருகிறது. லாரி உரிமையாளர்களின் நியாயமான கோரிக்கைகளை மத்திய மாநில அரசுகள் கண்டுகொள்வதில்லை.
இந்திய அளவில் சிறப்பிடம் பெற்று தமிழக லாரித்தொழிலை காப்பதற்காக, தற்போது பொறுப்பேற்றுள்ள தமிழக போக்குவரத்து துறை அமைச்சர், லாரி உரிமையாளர்கள் சங்க நிர்வாகிகளை அழைத்துப் பேசி அவர்களின் கோரிக்கைகளை நிறைவேற்ற முயற்சிக்க வேண்டும். இதன் மூலம் தமிழகத்தினுடைய பொருளாதார வளர்ச்சியை அதிகரிக்க முடியும் என அதில் கூறப்பட்டுள்ளது.
