தமிழ் மாதங்களில் ஒவ்வொரு மாதத்திற்கும் ஒவ்வொரு சிறப்பு உண்டு. அதில், ஆடி மாதத்திற்கு பல்வேறு தனிச்சிறப்புகள் உள்ளன. குலதெய்வ வழிபாடும், அம்மன் வழிபாடும் ஆடி மாதத்தில் மிகவும் சிறப்பாக நடக்கிறது.
குறிப்பாக, பருவமழை காரணமாக ஆடி மாதத்தில் காவிரி ஆற்றில் வெள்ளம் கரைபுரண்டோடும். நாமக்கல் மாவட்டம் மோகனூர் காவிரி ஆற்றில் உள்ள படித்துறையில் ஆடி மாதத்தில் 18 படிகளை தொட்டு தண்ணீர் பெருக்கெடுத்து ஓடும். ஆடிப் பெருக்கு நாளில் ஆயிரக்கணக்கான பொதுமக்கள் காவிரி படித்துறையில் இருந்து புனித நீராடி வாழை இலையை விரித்து, மஞ்சளால் பிள்ளையார் பிடித்து வைத்து தீபம் ஏற்றி வழிபடுவது வழக்கம்.
பெண்கள் தாலி பாக்கியத்திற்காக, மஞ்சள் பூசிய கயிறுகளை தங்கள் கழுத்தில் கட்டிக்கொள்வார். பின்னர் முன்னோர்களின் ஆசி பெறுவதற்காக வாழை மட்டையில் தீபத்தை வைத்து மோட்ச தீபமாக காவிரி ஆற்றில் மிதக்கவிட்டு வழிபடுவார்கள்.
இந்த ஆண்டு பருவமழை பொய்த்ததால் காவிரி ஆறு வறண்டுள்ளது. காவிரி ஆற்றின் நடுப்பகுதியில் மிக குறைவான அளவில் தண்ணீர் செல்கிறது. ஆடிப்பெருக்கை முன்னிட்டு அதிகாலை முதல் ஏராளமான ஆண்களும், பெண்களும் குடும்பத்துடன் காவிரி ஆற்றுக்குள் சென்று புனித நீராடினார்கள். பின்னர் காவிரி கரையில் அமைந்துள்ள பிரசித்திபெற்ற மதுகரவேணி அம்மன் சமேத அசலதீபேஸ்வரர் சுவாமியை, நீண்ட கியூவில் நின்று வழிபட்டனர்.
ஆடிப்பெருக்கை முன்னிட்டு, ஏராளமான பக்தர்கள், டூ வீலர், கார், வேன் உள்ளிட்ட வாகனங்களில், கூட்டம் கூட்டமாக காவிரி ஆற்றுக்கு வந்து புனித நீராடினர். பக்தர்கள் கூட்டத்தை கட்டுப்படுத்த, மோகனூர் காவல் ஆய்வாளர்லட்சுமணதாஸ் தலைமையில், போலீசார் பாதுகாப்பு பணியில் ஈடுபடுத்தப்பட்டனர்.
காவிரி ஆற்றில் ஏற்பட்ட வெள்ளப்பெருக்கு காரணமாக, கடந்த 2022, 2024ல், பக்தர்கள் ஆற்றில் குளிக்க தடை விதிக்கப்பட்டிருந்தது குறிப்பிடத்தக்கது. தற்போது, காவிரி ஆற்றில் போதுமான அளவு தண்ணீர் வரத்து இல்லாத நிலையிலும் பொதுமக்கள் நடு ஆற்றுக்கு சென்று சொற்ப நீரில் புனித நீராடி உற்சாகமாக ஆடிப்பண்டிகையை கொண்டாடி மகிழ்ந்தனர்.
