நாமக்கல் பழைய அரசு மருத்துவமனை கட்டிடத்தில் தாலுகா மருத்துவமனை அமைக்க வேண்டும்: கலெக்டரிடம் எம்.பி. நேரில் கோரிக்கை

நாமக்கல் நகரின் மையப்பகுதியில் செயல்பட்டு வந்த பழைய அரசு மருத்துவமனை கட்டிடத்தில், தாலுகா மருத்துவமனை அமைக்க வேண்டும் என்று அனைத்து கட்சிகள், சமூக அமைப்புகள் மற்றும் பல்வேறு சங்கங்கள் சார்பில், மாதேஸ்வரன் எம்.பி., மாவட்ட ஆட்சியரிடம் நேரில் கோரிக்கை மனு அளித்தார்.

நாமக்கல் பழைய அரசு மருத்துவமனையில், தாலுகா அளவிலான அரசு மருத்துவமனை துவக்க வேண்டும் என நாமக்கல் நகரைச்சேர்ந்த பல்வேறு அரசியல் கட்சிகள் மற்றும் பல்வேறு சமூக அமைப்புகள் வேண்டுகோள் விடுத்து வருகின்றனர். இது குறித்து நாமக்கல் கொமதேக எம்.பி., மாதேஸ்வரன் தலைமையில், திரளான பிரமுகர்கள் மாவட்ட ஆட்சியரை நேரில் சந்தித்து மனு அளித்தனர்.

இதுகுறித்து, எம்.பி., மாதேஸ்வரன் செய்தியாளர்களிடம் கூறியதாவது: நாமக்கல் மாவட்ட தலைமை அரசு மருத்துவமனை, மருத்துவக்கல்லூரி மருத்துவமனையாக தரம் உயர்த்தப்பட்டதை தொடர்ந்து, அரசு மருத்துவக்கல்லூரி வளாகத்திற்கு இடமாற்றம் செய்யப்பட்டது. தற்போது, பழைய அரசு மருத்துவமனை கட்டிடம்காலியாக உள்ளது. நகரின் மையப்பகுதியில் அமைந்துள்ள இந்த இடத்தில் தாலுகா அளவிலான அரசு மருத்துவமனை அமைத்தால் பொதுமக்கள், அரசு ஊழியர்கள், மாணவ மாணவிகள் உள்ளிட்ட பல்வேறு தரப்பினரும் பயனடைவார்கள்.

இதுதொடர்பாக கடந்த 5-ந்தேதி அனைத்து கட்சிகள், சமூக அமைப்புகள், வணிகர் சங்கங்கள் உள்ளிட்ட பல்வேறு அமைப்புகளின் ஆலோசனைக் கூட்டம் நடைபெற்றது. இதில் பழைய அரசு மருத்துவமனை கட்டிடத்தில் தாலுகா மருத்துவமனை அமைக்க அரசுக்கு அழுத்தம் கொடுக்க முடிவு செய்யப்பட்டது.

அதன் தொடர்ச்சியாக அனைத்து கட்சிகள் மற்றும் அமைப்புகளை சேர்ந்த நிர்வாகிகள் மாவட்ட மாவட்ட ஆட்சியரை நேரில் சந்தித்து கோரிக்கை விடுத்துள்ளோம். கோரிக்கையை பரிசீலித்து அரசு மருத்துவமனை அமைப்பதற்கான நடவடிக்கை எடுக்கப்படும் என்று மாவட்ட ஆட்சியர் உறுதியளித்துள்ளார். இதுதொடர்பாக மக்கள் நல்வாழ்வுத்துறை அமைச்சரிடமும் தொலைபேசி மூலம் பேசியுள்ளேன். அவரும் நடவடிக்கை எடுப்பதாக உறுதியளித்துள்ளார்.

இது அரசியல் பிரச்சினை அல்ல. மக்களின் அடிப்படை தேவையான மருத்துவ வசதியை பெறுவதற்காகவே அனைத்து கட்சிகளும், அமைப்புகளும் ஒன்றிணைந்துள்ளன.

மேலும், ஜேடர்பாளையம் பகுதியில் விவசாயிகளின் தண்ணீர் பிரச்சினை தொடர்பாகவும் தொடர்ந்து நடவடிக்கை எடுத்து வருகிறோம். விவசாயிகளுக்கு தேவையான தண்ணீர் கிடைக்க வேண்டும் என்பதே எங்களது நோக்கம். அதேபோல் நாமக்கல் அரசு கல்லூரி மாணவர்களின் விடுதி பிரச்சினை குறித்தும் சம்பந்தப்பட்ட அமைச்சரிடம் பேசினேன். 200 மாணவர்கள் தங்கும் விடுதியை 400 மாணவர்கள் தங்கும் வகையில் விரிவுபடுத்த நடவடிக்கை எடுக்கப்படும் என்று உறுதி அளித்துள்ளார் என்று கூறினார்.