வருவாய்த்துறை சங்கங்களின் கூட்டமைப்பு சார்பில், கோரிக்கைகளை வலியுறுத்தி, நாமக்கல் மாவட்ட ஆட்சியர் அலுவலகம் முன்பு ஆர்ப்பாட்டம் நடைபெற்றது. கூட்டமைப்பின் ஒருங்கிணைப்பாளர்கள் ஆனந்தன், லட்சுமி நரசிம்மன், பாலசுப்ரமணியம், செந்தில்குமார், செங்கமலை, மணிவேல் ஆகியோர் முன்னிலை வகித்தனர்.
- நாமக்கல் மாவட்டத்தில், அரசால் அங்கீகரிக்கப்படாத தீர்வு ஆப்பில் அனைத்து அலுவலர்களையும் பணிபுரிய வற்புறுத்துவதை தவிர்த்து, ஆப்பை முற்றிலுமாக கைவிட வேண்டும்.
- நாமக்கல் மாவட்ட நிர்வாகம், ஒரு சிலருக்கு மட்டும் சாதகமாக பணிமாறுதல் வழங்கியதை தவிர்த்து, பெரும்பான்யைமாக உள்ளவர்களின் நியாயமான கோரிக்கைகளை கேட்டு, மாவட்ட நிர்வாகத்தில் உள்ள குளறுபடிகளை சரி செய்ய வேண்டும்.
- அரசு விழாக்கள், பல்வேறு முகாம்கள், நீதிமன்ற வழக்குகள் உள்ளிட்ட பணிகளுக்கு, அரசு உரிய நிதி ஒதுக்கீடு வழங்காத பட்சத்தில், செலவினங்களை செய்ய மாவட்ட நிர்வாகம் நிர்ப்பந்தம் செய்யக்கூடாது.
- அலுவலக நேரம் முடிந்த பின்பும், விடுமுறை நாட்களிலும் ஆய்வு கூட்டங்கள், தல தணிக்கை உள்ளிட்ட பணிகளை செய்ய உயர் அலுவலர்கள் வற்புறுத்தக் கூடாது.
- ஆன்லைன் சான்றிதழ், பட்டா மாறுதல், அனைத்து விதமான மக்களின் கோரிக்கை மனுக்கள், அத்தியாவசிய பணிகளை மேற்கொள்ள, உரிய கால அவகாசம் வழங்க வேண்டும்
என்பவை உள்ளிட்ட பல்வேறு கோரிக்கையை வலியுறுத்தி கோஷம் எழுப்பினர்.
தொடர்ந்து, திரளான வருவாய்த்துறை அலுவலர்கள், மாவட்ட ஆட்சியர் அலுவலக நுழைவு வாயில் முன் அமர்ந்து கோஷம் எழுப்பினார்கள். அப்போது, அங்கு பாதுகாப்பு பணியில் இருந்த போலீசார், அவர்களிடம் பேச்சு வார்த்தை நடத்தனர். மாவட்ட ஆட்சியர் நேரில் வந்து தங்களின் கோரிக்கைகளை கேட்க வேண்டும் என அவர்கள் வலியுறுத்தினார்கள்.
அதையடுத்து, டி.ஆர்.ஓ., சரவணன் வந்து, போராட்டத்தில் ஈடுபட்டவர்களிடம் சமரச பேச்சுவார்த்தை நடத்தினார். பின்னர் போராட்டத்தை கைவிட்டு கலைந்து சென்றனர். எங்களின் கோரிக்கை மீது நடவடிக்கை எடுக்காவிட்டால், அடுத்த கட்ட போராட்டத்தில் ஈடுபடுவோம் என ஒருங்கிணைப்பாளர்கள் தெரிவித்தனர்.
